«ەير استانا» اۋە كولىكتەرى ەكسپو-2017 لوگوتيپىمەن ۇشادى

ەكسپو-نىڭ بىرنەشە نەگىزگى ماقساتى بولسا, ونىڭ باسىندا ءتۋريزمدى دامىتۋ دا بار. قازاقستانعا كەلەتىن تۋريستەر سانىن ارتتىرۋ ارقىلى ءتۋريزمدى تابىس كوزىنە اينالدىرۋ الميساقتان ارمان. ال الداعى كورمەگە ەكى ميلليوننان استام جەرگىلىكتى جانە شەتەلدىك تۋريستەر كەلەدى دەپ بولجام جاسالىپ جاتقانى بەلگىلى. – بۇل – ناقتى بولجام, ناقتى ساندار. «استانا ەكسپو-2017» ۇلتتىق كومپانياسى بىرنەشە الەمدىك تۋروپەراتورلارمەن كەلىسىمشارت جاساپ ۇلگەردى. ولار ءوز كەزەگىندە, 2017 جىلى قازاقستانعا تۋرلاردى ساتاتىن بولادى. بۇل رەتتە, پاكەتتىك تۋرلار ەكسپو+بۋراباي, ەكسپو+الماتى جانە باسقا باعىتتار ۇسىنىلادى, – دەيدى «استانا ەكسپو-2017» كومپانياسىنىڭ قوعاممەن بايلانىس دەپارتامەنتىنىڭ ديرەكتورى سەرگەي كۋيانوۆ. سونىمەن جاقىندا الماتى اۋەجايىندا «ەمبراەر 190» ۇشاعىنا استانا ەكسپو-2017 كورمەسىنىڭ لوگوتيپى ورنالاستىرىلدى. بۇل بورت – كورمە لوگوتيپىمەن برەندتەلگەن العاشقى ۇشاقتاردىڭ ءبىرى. وسىناۋ باستاما «استانا ەكسپو-2017» ۇك»اق پەن «ەير استانا» اق اراسىندا قول قويىلعان ىنتىماقتاستىق مەموراندۋمىنىڭ اياسىندا جۇزەگە اسىرىلىپ وتىر. الداعى ۋاقىتتا ەكسپو لوگوتيپى كومپانيا اۋە پاركىندەگى 30 ۇشاققا قويىلاتىن بولادى. «ەير استانا» «ەكسپو-2017 كورمەسىنىڭ رەسمي تاسىمالداۋشىسى» ەكسكليۋزيۆتى مارتەبەگە يە جانە «استانا ەكسپو-2017 حالىقارالىق كورمەسىنىڭ رەسمي سەرىكتەسى بولىپ تابىلادى. بۇل مەموراندۋمعا اعىمداعى جىلدىڭ 17 تامىزىندا «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ پەن «ەير استانا» اۋە كومپانياسىنىڭ پرەزيدەنتى پيتەر فوستەر قول قويعان بولاتىن. كەلەسى جىلدىڭ باسىنان سەرىكتەستەر حالىقارالىق دەڭگەيدە كورمەنى ىلگە­رىلەتۋگە قاتىستى ارنايى ناۋقاندى جۇزەگە اسىرۋدى باستايدى دەپ كۇتىلىپ وتىر. «ەير استانا» اۋە كومپانياسىنىڭ قازىرگى تاڭدا سەرىكتەستىك جۇيەسى, وعان قوسا 40 000 اگەنتتەرى بار. سونداي-اق, اۋە كومپانياسىنىڭ ترانزيتتىك جولاۋشىلارى كورمە وتكىزىلەتىن كۇندەرى كورمەنى تەگىن تاماشالاي الادى. استاناداعى كورمە «جاسىل» ەنەرگەتيكا اياسىندا وتەدى, سوندىقتان ەنەرگوتۇتىنۋ, ەنەرگوتيىمدى تەحنولوگيالاردى پايدالانۋ ماسەلەلەرى ءىس-شارانىڭ باستى تاقىرىبىنا اينالماق. «ەير استانا» پرەزيدەنتى پيتەر فورستەردىڭ ايتۋىنشا, اۋاعا زالالدى قالدىقتاردىڭ شىعارىلۋىن بارىنشا ازايتۋ كومپانيانىڭ باسىمدىلىقتارىنا جاتادى. سوڭعى اۋەشوۋدا لە بۋرجە قوزعالتقىشى زياندى شىعىندى 15 پايىزعا قىسقارتاتىن NEO بۋىنىنا جاتاتىن Airbus A320 ساتىپ الۋ نيەتىمەن بولىسكەن ەدى. ايناش ەسالي, «ەگەمەن قازاقستان». الماتى.