جاڭا ايالدامالار

ءىرى مەگاپوليستىڭ الەۋمەتتىك-ەكونوميكالىق تىرشىلىگىنىڭ ءتيىمدى دە ىركىلىسسىز جۇمىس ىستەۋى ءۇشىن جەتىلگەن جول-كولىك ينفراقۇرىلىمىنىڭ بولۋى قاجەت. وزىق تەحنولوگياعا نەگىزدەلگەن جول-كولىك ينفراقۇرىلىمى بار مەگاپوليس­تە ءومىر دەڭگەيى دە بارىنشا ساپالى ءارى قولايلى بولماق. مەملەكەت باسشىسىنىڭ ەلوردانى ودان ءارى وركەندەتۋ ماسەلەسىندە قالانىڭ بازالىق ينفراقۇرىلىمىن, ونىڭ ىشىندە قوعامدىق كولىك قاتىناسىن دامىتۋعا ۇنەمى باسىمدىق بەرىپ كەلە جاتقاندىعى دا سوندىقتان. كولىك ستراتەگياسىنىڭ ءتيىم­دىلىگى تەك جول-كولىك ينفرا­قۇ­رىلىمىن دامىتۋمەن عانا شەكتەلمەسە كەرەك. بۇل ورايدا قالا كوشەلەرىندەگى قوعامدىق كولىك قاتىناسىنىڭ جانە جولاۋشىلارعا كورسەتىلەتىن قىزمەت ساپاسىنىڭ دا ايرىقشا ءمانى بار. وسىعان وراي, ەلورداداعى قوعامدىق كولىك قاتىناسىن جاقسارتۋ جانە جولاۋشىلارعا بارىنشا ءتيىمدى دە ساپالى قىزمەت كورسەتۋ جايى بارعان سايىن جۇيەلى تۇردە جەتىلدىرىلىپ كەلەدى. قالامىزدا جۇردەك اۆتوبۋستار تاسىمالى جۇيەسىن سالۋ جۇمىسى دا قولعا الىندى. بۇگىندە استانانىڭ كولىك ينفرا­­قۇرىلىمىن جاڭعىرتۋ كەشەندى جۇمىستارمەن جالعاسۋدا. قالا اكىمدىگىنىڭ تاپسىرماسى بو­يىنشا جىل اياعىنا دەيىن ەلوردادا جابىق پىشىندەگى 55 ايالداما تۇرعىزىلماق. الداعى ۋاقىتتا قالامىزدا وسىنداي پىشىندەگى بارلىعى 82 جاڭا ايالداما تۇر­عىزىلادى دەپ جوسپارلانۋدا. بۇل ايالدامالاردىڭ بارلىعى الەۋمەتتىك ماڭىزى بار نىساندارعا جاقىن ورنالاستىرىلماق. سونىمەن بىرگە, قالا كوشەلەرى ينفراقۇرىلىمىن جاڭعىرتۋ جوباسىنا بايلانىستى ايالدامالاردا اقپاراتتىق جۇيەلەر قوندىرعىسىن ورناتۋ قولعا الىنادى. ايالدامالاردا ورناتىلاتىن ارناۋلى تابلو ارقىلى استانالىقتار مەن قالا قوناقتارى قاجەتتى باعىتتاعى اۆتوبۋستارىنىڭ ءجۇرۋ كەستەسىمەن تانىساتىن بولادى. ەلورداداعى قوعامدىق كولىكتەردە جولاقىسىن تولەۋ ەلەكتروندىق جۇيەگە كوشىرىلەدى. بۇل جوبا بيىلعى جىلدىڭ قازان-قاراشا ايلارىندا تولىق ءىس جۇزىنە اسىرىلماق. – ءبىز جولاۋشىلار تاسىمالى ديسپەتچەرلەرىن جاڭا ستاندارتتار بويىنشا جۇمىس ىستەۋ پىشىنىنە كوشىرۋدى باستادىق. كولىك قاتىناسىنىڭ كەستەسى ارناۋلى باعدارلاما بويىنشا قۇرىلادى. بۇگىندە بۇكىل الەم وسى تاجىريبەمەن جۇمىس ىستەۋدە. شىلدە ايىندا ءبىز بۇگىنگى زامان تالابىنا ساي جابدىقتالعان  call-ورتالىق اشامىز. بۇل قالا تۇرعىندارىنا قوعامدىق كولىك قاتىناسىندا ورىن العان كەلەڭسىزدىكتەردىڭ شۇعىل الدىن الۋىنا مۇمكىندىك بەرەدى. سونىمەن بىرگە, جاقىن ارادا ءبىز قالالىق قو­عامدىق كولىكتەردىڭ قاتىناسىن باقى­لاۋدىڭ جاڭا جۇيەسىن ەنگىزەمىز. بۇدان بىلاي قوعامدىق كولىكتە تەگىن جۇرۋگە تىرىساتىن جولاۋشىلار جاۋاپقا تارتىلادى, – دەيدى «استانا LRT» باسقارما توراعاسى تالعات اردان. جاراس سادۋاقاسوۆ.