ەلباسى استاناداعى قۇرىلىس نىساندارىندا بولدى

استانا. 22 مامىر. مەملەكەت باسشىسى كوپفۋنكتسيونالدى «تالان تاۋەر» جانە «ءابۋ-دابي پلازا» كەشەندەرىنىڭ قۇرىلىس الاڭىندا, سونداي-اق, «جاسىل كۆارتال» تۇرعىن ءۇي كەشەنىنىڭ تانىستىرۋ بولمەسىندە (شوۋ-رۋم) بولدى. بۇل تۋرالى akorda.kz حابارلادى. ەلباسى جۇرگىزىلىپ جاتقان جۇمىستاردىڭ بارىسىمەن تانىسىپ, نىسان قۇرىلىسشىلارىمەن اڭگىمەلەستى. «تالان تاۋەر» كوپفۋنكتسيونالدى كەشەنى جوباسىنا 157 ورىندىق قوناق ءۇي, اۋدانى 8 300 شارشى مەتر ساۋدا گالەرەياسى, ا سىنىپتى بيزنەس-ورتالىق جانە تۇرعىن جايلار كىرەدى. نىسان قۇرىلىسىنا 40-تان اسا مەردىگەرلىك ۇيىم تارتىلعان. مۇندا قازاقستاندا ءبىرىنشى رەت «جاسىل» تەحنولوگيالار – «جاسىل» شاتىر, ەنەرگيا تۇرعىسىنان ءتيىمدى ليفتىلەر, ەنەرگيا ساقتاۋشى اينەكتەر, جاڭبىر سۋىن قايتا پايدالانۋ قوندىرعىسى قولدانىلادى. پاركينگ جانە ەلەكتروموبيلدەرگە ارنالعان زاريادتاۋشى ستانسالار, ارناۋلى ورىندار, ۆەلوسيپەدشىلەرگە ارنالعان كيىم شەشەتىن جانە جۋىناتىن ورىندار بولادى. «ءابۋ-دابي پلازا» كەشەنى – ءتۇرلى ماقساتتاعى بلوكتاردان قۇرالعان كوپفۋنكتسيونالدى ءزاۋلىم عيمارات. اتاپ ايتقاندا, وعان كەڭسەلەر, قوناق ءۇي جانە تۇرعىن ءۇي كەشەنى كىرەدى. قۇرىلىستىڭ جالپى اۋدانى – 500 مىڭ شارشى مەتر. «جاسىل كۆارتال» كەشەنى جوباسى ەنەرگيا ساقتاۋدىڭ جاڭا تەحنولوگيالارىنا نەگىزدەلگەن. 20 گەكتاردان استام اۋماقتا كوپقاباتتى ۇيلەر, كەڭسە عيماراتتارى, پاركينگ, سونداي-اق, سۋبتروپيكالىق ميكروكليماتى, ەكزوتيكالىق دەندروساياباعى بار شاعىن كول, بيوكۇمبەزدى مادەني جانە الەۋمەتتىك ينفراقۇرىلىم نىساندارىن سالۋ جوسپارلانعان. مۇندا سۋعارىلمايتىن لاندشافت جۇيەسى, «قالدىق سۋدى» كوممەرتسيالىق عيماراتتاردا قايتا پايدالانۋ, قوقىستى ورتالىقتاندىرىلعان جيناۋ جۇيەسى, «اقىلدى» اۆتوتۇراق جۇيەسى, ۆەلوكولىكتەردى قويۋعا ارنالعان ورىندار, ەلدەگى ەلەكترمەن زاريادتايتىن العاشقى تولىققاندى ستانسا قاراستىرىلعان. ەلامان قوڭىر. دەرەك, سۋرەت: akorda.kz.