قازاقستان فۋتبول فەدەراتسياسىنىڭ باس مەنەدجەرى تاعايىندالدى

استانا. 16 قازان. قازاقستان فۋتبول فەدەراتسياسىنىڭ باس مەنەدجەرى قىزمەتىنە بەلگىلى رەسەيلىك مامان دميتري ۆاسيلەۆ تاعايىندالدى. بۇل تۋرالى فەدەراتسيانىڭ ءباسپاسوز قىزمەتى حاباارلادى. دميتري پانتەلەەۆيچ م.ۆ.لومونوسوۆ اتىنداعى ممۋ جانىنداعى ازيا جانە افريكا ەلدەرى ينستيتۋتىنىڭ ەكونوميكا فاكۋلتەتىن بىتىرگەن. سونىمەن قاتار, ەكونوميكا جانە كاسىپكەرلىك ينستيتۋتىنىڭ زاڭ فاكۋلتەتىن ءتامامدادى. ءتورت شەت ءتىلىن مەڭگەرگەن. ونىڭ سوڭعى جۇمىس ورنى «جەتىسۋ» فۋتبول كلۋبى بولدى. قىسقا ۋاقىتتىڭ ىشىندە قارجىلىق وڭتايلاندىرۋعا قاراماستان جاقسى سپورتتىق ناتيجەگە قول جەتكىزدى. دميتري ۆاسيلەۆ بۇعان دەيىن رەسەيدىڭ «دينامو» (ماسكەۋ), «موسكۆا», «ۋرال» (ەكاتەرينبۋرگ), «روستوۆ», «تيۋمەن» فۋتبول كلۋبتارىندا جەتەكشىلىك قىزمەتتەردى اتقاردى. مولدوۆالىق «پوليتەحنيكا» كلۋبىنىڭ ۆيتسە-پرەزيدەنتى, رەسەي فۋتبولى ۇلتتىق ليگاسىنىڭ پرەزيدەنتىنە ۇمىتكەر بولدى. ەلامان قوڭىر. دەرەك, سۋرەت: قازاقستان فۋتبول فەدەراتسياسىنىڭ ءباسپاسوز قىزمەتى.