وسكەمەن. شىعىس ءوڭىرىنىڭ اياگوز اۋدانىندا «نۇرلى جول – بولاشاققا باستار جول» باعدارلاماسى اياسىندا 600 ورىندىق مەكتەپ اشىلدى. بۇل تۋرالى egemen.kz ءتىلشىسى حابارلادى.
سالتاناتتى تۇردە تۇساۋى كەسىلگەن جاڭا ءبىلىم ورداسىندا بالالارعا بارلىق قولايلى جاعداي جاسالعان. اتالعان شاراعا اۋدان باسشىسى باقىتجان باياحمەتوۆ قاتىستى. مەكتەپتە وقۋ كابينەتتەرىمەن بىرگە لوگوپەد جانە پسيحولوگيالىق قىزمەت كابينەتتەرى, اسحانا, ءماجىلىس جانە سپورت زالدارى, كىتاپحانا بار. وقۋ بولمەلەرى قاجەتتى قۇرال-جابدىقتارمەن, جيھازدارمەن قامتاماسىز ەتىلگەن. مەكتەپ اۋلاسىندا سپورت جانە دەمالىس الاڭدارى ورنالاسقان. وندا سپورتتىق جانە مەرەكەلىك شارالار وتكىزىلەتىن بولادى. سونداي-اق ساباقتان تىس ۋاقىتتا مەكتەپىشىلىك ۇيىرمەلەر جۇمىس ىستەمەك.
سونىمەن قاتار, اياگوز اۋدانىندا «نۇرلى جول – بولاشاققا باستار جول» باعدارلاماسى اياسىندا 140 ورىنعا ارنالعان بالاباقشا مەن 600 ورىندىق مەكتەپ-ليتسەيدىڭ قۇرىلىسى ءجۇرىپ جاتىر.
دۋمان اناش.
دەرەك, سۋرەت: egemen.kz
