كەشە ەلباسى نۇرسۇلتان نازارباەۆ ەلورداداعى «اتامەكەن» ەتنو-مەموريالدى كەشەنى الاڭىندا جىل سايىنعى ءداستۇر بويىنشا مەملەكەتتىك تۋ كوتەرۋ سالتاناتتى راسىمىنە قاتىستى. ءراسىم اياسىندا مەملەكەت باسشىسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى ەلدىڭ جوعارى اسكەري وقۋ ورىندارىنىڭ تۇلەكتەرىنە وفيتسەرلىك شەن تاپسىردى. قازاقستان پرەزيدەنتىنىڭ قولىنان 12 تۇلەك – قورعانىس مينيسترلىگى قۇرلىق اسكەرلەرى اسكەري ينستيتۋتىن, ىشكى ىستەر مينيسترلىگى ۇلتتىق گۆاردياسىنىڭ اسكەري ينستيتۋتىن, ۇلتتىق قاۋىپسىزدىك كوميتەتىنىڭ اسكەري ينستيتۋتىن ۇزدىك بىتىرۋشىلەر پوگون الدى.
ەڭ الدىمەن, مەملەكەت كۇزەت قىزمەتى ۇرمەلى اسپاپتار وركەسترىنىڭ سۇيەمەلدەۋىمەن مەملەكەتتىك تۋ اكەلىنىپ, ەل ءانۇرانى شىرقالدى. بۇدان كەيىن شاراعا قاتىسۋشىلارعا ارناعان سوزىندە قازاقستان پرەزيدەنتى مەملەكەتتىك تۋ كوتەرىلىپ, ءانۇران ورىندالعان سايىن ءاربىر قازاقستاندىقتىڭ ايرىقشا سەزىمگە بولەنەتىنىن ايتتى. «بۇل – ءبارىمىزدىڭ ورتاق تابىسىمىزعا, تاۋەلسىز ەلدىڭ باتىل قادامىنا دەگەن ماقتانىش. بۇگىندە بۇكىل الەم ءۇشىن بۇل بايراق – تابىستى مەملەكەتتىڭ جانە ءبىزدىڭ ۇلتتىق بىرلىگىمىزدىڭ سيمۆولى. قازاقستاننىڭ تۋىندا التىن كۇن بەينەلەنگەن, سول كۇن مەن ماڭگىلىك اسپان استىندا ۇلان-بايتاق دالامىز كوسىلىپ جاتىر. تاياۋدا وسى بايراق دۇنيەجۇزىلىك «ەكسپو-2017» كورمەسىنىڭ اجارىن اشاتىن بولادى. تۋ كوتەرۋ ارقىلى الداعى وليمپيا ويىندارى مەن وزگە دە سپورت جارىستارىندا ەلىمىزدىڭ ءالى تالاي جەڭىستەرى اسپەتتەلەتىنىنە سەنىمدىمىن. بايراق مەملەكەتتىلىگىمىزدى ساقتاۋ, ونى نىعايتۋ كەرەكتىگىن كۇن سايىن ەسىمىزگە سالىپ تۇرادى», – دەدى نۇرسۇلتان نازارباەۆ.
مەملەكەت باسشىسى جوعارى اسكەري وقۋ ورىندارىنىڭ ءتۇلەكتەرى وفيتسەرلىك اتاق العان سوڭ مارتەبەلى جانە جاۋاپتى جاڭا جولعا تۇسەتىنىن ايتتى. «وفيتسەر – بۇل, ەڭ الدىمەن, بورىش, سودان كەيىن – ماماندىق. وفيتسەرلىك بورىشتى ءمىنسىز اتقارۋ ەرلىكتى, بيىك مورالدىق قاسيەتتەردى, ءتارتىپ پەن تاباندىلىقتى قاجەت ەتەدى. جاس جاۋىنگەرلەردى, وزدەرىڭنەن جاسى كىشى باۋىرلارىڭدى ءتاربيەلەۋ, ولارعا قامقورلىق كورسەتۋ – سىزدەردىڭ ۇنەمى قاپەردە ۇستايتىن مىندەتتەرىڭىز. بۇل ءۇشىن بويلارىڭىزدان بيىك ادامگەرشىلىك قاسيەتتەر تابىلۋى ءتيىس. قازاق جەرىنىڭ تاريحى باتىر ۇلداردىڭ ەرلىگىنە تولى. تاياۋدا عانا ءبىز ارداگەرلەرگە ۇلى جەڭىستىڭ 70 جىلدىعىنا بايلانىستى قۇرمەت كورسەتتىك», – دەدى قازاقستان پرەزيدەنتى.
نۇرسۇلتان نازارباەۆ جىل سايىن وتەتىن مەملەكەتتىك تۋ كوتەرۋ ءداستۇرلى ءراسىمى استانا كۇنىنە ارنالعان مەرەكەلىك شارالاردىڭ باستاۋى ەكەنىنە نازار اۋداردى. «استانا – ەلىمىزدىڭ بارشا ازاماتتارىنىڭ ورتاق جانە شابىتتى ەڭبەگىنىڭ جەمىسى. ولار قازاقستان عانا ەمەس, بۇكىل الەم ماقتان تۇتاتىن تۋعان ەلورداسىن سالۋ ءۇشىن رەسپۋبليكانىڭ تۇكپىر-تۇكپىرىنەن كەلدى. سوندىقتان استانا كۇنى – ءار وتباسىنىڭ, ءاربىر قازاقستاندىقتىڭ جۇرەگىنە جاقىن مەرەكە. بۇل قالادا ۋاقىتتىڭ قان تامىرى ەكى ەسە ءجيى سوعادى, ەلوردا كوركى جىل سايىن وزگەرىپ كەلەدى. بۇگىندە قالا الدىندا ەلىمىزدى جاڭا بيىكتەرگە باستايتىن بۇدان دا زور ماقساتتار تۇر. وسى تاماشا مەرەكەنى اتاپ وتە وتىرىپ, ءبىز حالقىمىزدىڭ ەڭبەكقورلىعى مەن تاباندىلىعىن, كۇش-قۋاتىن دارىپتەيمىز», – دەدى نۇرسۇلتان نازارباەۆ.
مەملەكەت باسشىسى, سونىمەن قاتار, ەلىمىزدىڭ بارلىق جوعارى اسكەري وقۋ ورىندارىنىڭ تۇلەكتەرىن قۇتتىقتادى. «بۇل – جاس وفيتسەرلەر ءۇشىن ايرىقشا قۋانىشتى كۇن. سىزدەر كوپ جۇمىس ىستەپ, ەڭبەكتەندىڭىزدەر, وسى ماقساتقا جەتۋ ءۇشىن كۇرەسىپ, جەڭىسكە جەتتىڭىزدەر. ءوز ءومىرلەرىڭىزدى اسكەري ىسكە ارناۋعا شەشىم قابىلدادىڭىزدار. وتانىڭا قىزمەت ەتۋ وڭاي مىندەت ەمەس جانە وعان اركىمنىڭ شاماسى جەتە بەرمەيدى. العان ءبىلىمدى ەلىڭە قىزمەت ەتۋ, قوعامعا جانە وتباسىڭا پايدا اكەلۋ, حالىقتىڭ بىرلىگىن ساقتاۋ ءۇشىن پايدالانۋ قاجەت», – دەدى قازاقستان پرەزيدەنتى.
ءسوزىنىڭ سوڭىندا نۇرسۇلتان نازارباەۆ بارشا قازاقستاندىقتاردى استانا كۇنىمەن قۇتتىقتاپ, ءاربىر شاڭىراققا باق-بەرەكە تىلەدى.
بۇل كۇنگى سالتاناتتى شارا بارىسىندا پاتريوتتىق كومپوزيتسيالار مەن اسكەري مارش ورىندالدى
.
ءلايلا ەدىلقىزى,
«ەگەمەن قازاقستان».
سۋرەتتەردى تۇسىرگەندەر
س.بوندارەنكو, ب.وتارباەۆ
