وسكەمەندە كيەلى ترويتسكي شىركەۋىندەگى جوندەۋ جۇمىستارى اياقتالدى

وسكەمەن. 16 قازان. رۋحاني كەلىسىم كۇنى قارساڭىندا وسكەمەندەگى كيەلى ترويتسكي شىركەۋىنە جۇرگىزىلگەن قايتا جوندەۋ جۇمىستارى اياقتالدى. وسى شاراعا وراي وبلىس ورتالىعىنا ميتروپوليت الەكساندر كەلدى. بۇل تۋرالى egemen.kz ءتىلشىسى حابارلادى. وبلىس اكىمى دانيال احمەتوۆ قازاقستاننىڭ پراۆوسلاۆيالىق شىركەۋلەرىنىڭ باسشىسىمەن كەزدەسۋ بارىسىندا كونفەسسياارالىق كەلىسىم مەن بايلانىستاردى نىعايتۋ ماسەلەلەرىن تالقىلادى. كيەلى ترويتسكي شىركەۋى وسكەمەن قالاسىنداعى العاشقى تاستان قالانعان شىركەۋ جانە ساۋلەتتىك ەسكەرتكىشتەر ساناتىنا جاتقىزىلعان عيمارات. 2013 جىلى باستالعان جوندەۋ جۇمىستارىنان سوڭ شىركەۋدىڭ العاشقى قاسبەتى قالپىنا كەلتىرىلدى. كەزدەسۋ اياسىندا دانيال احمەتوۆ ءميتروپوليتتى الداعى مەرەكەمەن قۇتتىقتاي وتىرىپ, وبلىس اكىمدىگىنىڭ ءارى قاراي دا كومەك قولىن سوزا بەرەتىنىن جەتكىزدى. ءوز كەزەگىندە ميتروپوليت الەكساندر وبلىس اكىمىنە جىلى قابىلداۋى ءۇشىن العىس ايتىپ, اتقارىلعان ءىستىڭ ۇجىمدىق ەڭبەك ءھام ەپارحيا جۇمىسى مەن بارلىق تاراپتان بەرىلگەن كومەكتىڭ ارقاسىندا ورىندالعانىن تىلگە تيەك ەتتى. سونداي-اق ول شىعىسقازاقستاندىقتاردى قازاق حاندىعىنىڭ 550 جىلدىعىمەن جانە باسقا دا مەرەيتويلارمەن قۇتتىقتادى. قازىرگى كەزدە وبلىستا قازاقستان پراۆوسلاۆتىق شىركەۋلەرىنىڭ وسكەمەن جانە سەمەي ەپارحياسىندا جەرگىلىكتى 41 ءدىني بىرلەستىكتەر تىركەلىپ, قىزمەت ەتۋدە. دۋمان اناش. دەرەك, سۋرەت: egemen.kz.