تمد مەملەكەتتەرى باسشىلارى كەڭەسىنىڭ وتىرىسى ءوتتى

استانا. 16 قازان. ەلباسى تمد مەملەكەتتەرى باسشىلارى كەڭەسىنىڭ شاعىن قۇرامدا وتكەن وتىرىسىنا قاتىستى. بۇل تۋرالى akorda.kz حابارلادى. ءىس-شاراعا سونداي-اق ازەربايجان, ارمەنيا, بەلورۋسسيا, قىرعىزستان, رەسەي, تاجىكستان, وزبەكستان پرەزيدەنتتەرى, تۇرىكمەنستان مينيسترلەر كابينەتى توراعاسىنىڭ ورىنباسارى مەن مولدوۆا رەسپۋبليكاسىنىڭ سىرتقى ىستەر جانە ەۋروپالىق ينتەگراتسيا ءمينيسترىنىڭ ورىنباسارى قاتىستى. وتىرىستى اشقان قازاقستان پرەزيدەنتى كەڭەسكە قاتىسۋشىلار اتىنان ا.لۋكاشەنكونى وتكەن سايلاۋداعى جەڭىسىمەن, سونداي-اق ا.اتامباەۆتى قىرعىزستانداعى پارلامەنتتىك سايلاۋدىڭ تابىستى وتۋىمەن قۇتتىقتادى. نۇرسۇلتان نازارباەۆ قازاقستان تمد قۇرىلعالى بەرى ەلدەرىمىزدىڭ اراسىندا كوپجاقتى ىنتىماقتاستىقتى جانداندىرۋدى, ىنتىماقتاستىقتىڭ نەگىزگى باعىتتارى بويىنشا ينتەگراتسيانى تەرەڭدەتە ءتۇسۋدى جاقتاعانىن جانە بۇل باعىتىن ءالى جالعاستىرىپ كەلە جاتقانىن ايتتى. «تمد – بۇرىنعى كەڭەستىك كەڭىستىكتەگى 11 مەملەكەتتى بىرىكتىرەتىن بىرەگەي قۇرىلىم. ءبىزدىڭ وڭىردە وعان بالاما جوق. ءبىز بۇل جەردە حالىقارالىق ساياساتتىڭ ەڭ ماڭىزدى جايتتارى بويىنشا سەنىمدى اۋاندا پىكىر الماسىپ, كوپجاقتى ىنتىماقتاستىعىمىزدىڭ كەز كەلگەن ماسەلەسىن تالقىلاي الامىز. ءبىزدىڭ بۇگىنگى ءىس-شارامىز تمد-نى دامىتۋ ىسىنە ءوز ۇلەسىن قوساتىنىنا سەنىمدىمىن», – دەدى مەملەكەت باسشىسى. قازاقستان پرەزيدەنتى سونداي-اق بۇگىنگى وتىرىستىڭ كۇن ءتارتىبى تىعىز ەكەنىن, 17 ماسەلە قارالاتىنىن اتاپ ءوتتى. «ماسەلەلەردىڭ ەلەۋلى بولىگى قاۋىپسىزدىك جانە قۇقىق ءتارتىبىن قامتاماسىز ەتۋگە ارنالعان, حالىقارالىق شارتتار توپتاماسىنا قول قويۋ, باعدارلامالىق قۇجاتتاردى بەكىتۋ, سونداي-اق تمد-عا مۇشە مەملەكەتتەر باسشىلارىنىڭ حالىقارالىق تەرروريزمگە قارسى كۇرەسكە جانە بۇۇ 70 جىلدىعىنا ارنالعان مالىمدەمەلەرىن قابىلداۋ جوسپارلانعان. ۇسىنىلعان قۇجاتتاردىڭ ءىس جۇزىندە زور ءمانى بار جانە ولاردى قابىلداۋ ەلدەرىمىزدىڭ ىنتىماقتاستىعىن نىعايتا تۇسۋگە ىقپال ەتەتىن بولادى», – دەدى ەلباسى. ايدار ورىسباەۆ. دەرەك: akorda.kz. سۋرەت: egemen.kz.