قوستانايدا «ورلەۋ» ۇزدىك ۇستازدار ءۇشىن بريفينگ وتكىزدى

قوستاناي. 16 قازان.  وبلىستىق ءباسپاسوز كلۋبىندا «ورلەۋ» بىلىكتىلىكتى كوتەرۋ ۇلتتىق ورتالىعىنىڭ فيليالى – قوستاناي وبلىسىنداعى پەداگوگيكا قىزمەتكەرلەرىنىڭ بىلكتىلىگىن كوتەرۋ ينستيتۋتى رەسپۋبليكالىق «ۇزدىك پەداگوگ-2015» بايقاۋىنىڭ جەڭىمپازدارى ءۇشىن بريفينگ وتكىزدى. بۇل تۋرالى egemen.kz ءتىلشىسى حابارلادى. «ۇزدىك پەداگوگ» رەسپۋبليكالىق بايقاۋى ءتورت جىلدان بەرى پەداگوگيكالىق ماماندىق بەدەلىن كوتەرىپ كەلەدى. بيىل وتكەن «ۇزدىك پەداگوگ-2015» بايقاۋىندا ەلىمىزدەگى 297 مىڭ مەكتەپ مۇعالىمدەرى مەن 45 مىڭ كوللەدج وقىتۋشىلارى اراسىنان قوستانايلىق ەكى مۇعالىم جەڭىمپاز اتاندى. مەكتەپكە دەيىنگى جانە جالپى ورتا ءبىلىم بەرۋ جۇيەسىندە رۋدنىي قالاسىنداعى №7 ورتا مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى قىمبات ءبىرمانوۆا مەن  تەحنيكالىق جانە كاسىبي ءبىلىم سالاسىندا قوستاناي پوليتەحنيكالىق كوللەدجىنىڭ ارنايى ءپان مۇعالىمى ەكاتەرينا ريجەنكو ءوزىنىڭ جوعارى بىلىكتىلىگىن مويىنداتا ءبىلدى. بريفينگتە رەسپۋبليكالىق سىرتتاي بايقاۋدىڭ جەڭىمپازدارى جۋرناليستەرگە وزدەرىنىڭ پەداگوگيتكالىق قىزمەتىندەگى نەگىزگى باستامالارى تۋرالى ايتىپ بەردى. قىمبات يسلامبەكقىزى مەن ەكاتەرينا تەرەنتەۆنا پەداگوگيكالىق تاجىريبەلەرىندە ءبىلىم الۋشىلارعا وقۋ جانە عىلىمي-كوپشىلىك اقپاراتتى تابۋعا ىزدەنگەندە, ونى وڭدەپ ءارى ۇسىنۋ ءۇشىن يننوۆاتسيالىق ادىستەردى بەلسەندى پايدالانالادى. ۇستازداردىڭ بىلىمدىلىگى, بىلىمدارلىعى, بىلىكتىلىگى, ەڭبەكقورلىعى, ادامدارعا جۋىقتىعى, ءتىل تابىسا بىلەتىندىگى وقۋ ۇدەرىسىن ءتيىمدى جانە تانىمدى ەتۋمەن بىرگە ۇجىمدا ءوزىن ۇزدىك جانە كاسىبي ۇستاز اتانۋعا ىقپال ەتەدى. بايقاۋ جەڭىمپازدارى جۋرناليستەردىڭ كوپتەگەن سۇراقتارىنا جاۋاپ بەردى. «ورلەۋ» باۇو اق فيليالى قوستاناي وبلىسى بويىنشا پق باي ديرەكتورى ماريونەللا سلەسار: «ءوز ماماندىعىڭدا ۇزدىك شىعۋ, ارينە, جاقسى. بىراق مۇنىڭ جاۋاپكەرشىلىگى وتە جوعارى. ۇستازدىڭ ەڭبەگىنىڭ قانشالىقتى اۋىر ەكەندىگىن مەن ايتىپ جاتپاي-اق قويايىن. ءبىزدىڭ ۇستازدار ۋاقىت تالابىنا ىلەسۋدى ماقسات تۇتادى. بالالارعا ساپالى ءبىلىمدى بىلىكتى ۇستازدار بەرەدى. سول ءۇشىن جاس مۇعالىمدەردىڭ ءوز ماماندىعىن ءسۇيىپ, ۇزدىكتەرگە ەلىكتەۋىن قالار ەدىم», – دەدى. ءنازيرا جارىمبەتوۆا. دەرەك, سۋرەت: egemen.kz.