ەلباسى VIII استانا ەكونوميكالىق فورۋمىنا قاتىسۋشىلارمەن كەزدەستى

استانا. 22 مامىر. ەلباسى نوبەل سىيلىعىنىڭ لاۋرەاتتارىمەن, حالىقارالىق ۇيىمدار جانە دامۋ ينستيتۋتتارىنىڭ باسشىلىعىمەن, سونداي-اق, VIII استانا ەكونوميكالىق فورۋمىنا قاتىسۋعا كەلگەن كومپانيالار جەتەكشىلەرىمەن كەزدەستى. بۇل تۋرالى akorda.kz حابارلادى. مەملەكەت باسشىسىمەن كەزدەسۋگە نوبەل سىيلىعىنىڭ لاۋرەتتارى ف.-ە.كيدلاند, ە.ماسكين, دج.سمۋت, ت.كارمان, سونداي-اق, فرانتسۋز ەكونوميسى ج.اتتالي, بۇۇ ازىق-ت ۇلىك جانە اۋىل شارۋاشىلىعى ۇيىمىنىڭ باس ديرەكتورى ج.-گ.دا سيلۆا, بۇۇ دامۋ باعدارلاماسى اكىمشىسى ح.كلارك, ەكونوميكالىق ىنتىماقتاستىق جانە دامۋ ۇيىمىنىڭ سىرتقى بايلانىس جونىندەگى ديرەكتوراتىنىڭ باسشىسى م.بونتۋري, ەۋروپالىق قايتا قۇرۋ جانە دامۋ بانكىنىڭ ۆيتسە-پرەزيدەنتى ب.نەلسون, ازيا دامۋ بانكىنىڭ ۆيتسە-پرەزيدەنتى چ.ۆەنچاي جانە McKinseyGlobalInstitute ديرەكتورى ر.دوببس قاتىستى. اڭگىمە بارىسىندا ينفراقۇرىلىمدىق جانە يندۋستريالىق-يننوۆاتسيالىق دامۋدى قامتاماسىز ەتۋ تۇرعىسىنان قازاقستاننىڭ قابىلداپ جاتقان شارالارى تالقىلاندى. نۇرسۇلتان نازارباەۆ ولارعا VIII استانا ەكونوميكالىق فورۋمى جۇمىسىنا قاتىسقاندارى ءۇشىن العىس ايتىپ, بيىلعى پىكىرتالاس وڭىرلىك ينفراقۇرىلىمدىق دامۋ ماسەلەلەرىنە ارنالىپ وتىرعانىنا توقتالدى. «بۇگىندە ءبىز كوپتەگەن دامۋشى ەلدەر ەكونوميكالىق ءوسىمنىڭ ىركىلۋى مەن ينۆەستيتسيالاردىڭ سىرتقا كەتۋى ماسەلەسىنە كەزىككەنىن كورىپ وتىرمىز. دامىعان ەلدەردە دە بىرقاتار تۇيتكىلدەر بار. قازاقستان جاھاندىق ەكونوميكانىڭ ءبىر بولشەگى بولا وتىرىپ, وڭىرىمىزدە تۇراقتىلىقتى قامتاماسىز ەتۋگە جانە ورنىقتى دامۋ ۇلگىسىن كورسەتۋگە تىرىسىپ كەلەدى. ءبىزدىڭ باستى مىندەتتەرىمىزدىڭ ءبىرى ادامي كاپيتالدى دامىتۋعا ينۆەستيتسيا تارتۋ بولىپ سانالادى. وسى ورايدا استانا ەكونوميكالىق فورۋمى يگى داستۇرگە اينالدى. ءبىزدىڭ فورۋمعا قاتىسۋشىلارعا, اسىرەسە, قازاقستاننىڭ ينفراقۇرىلىمدىق دامۋ ءۇشىن قابىلداپ جاتقان شارالارى تۋرالى ايتارىمىز بار. ءبىزدىڭ پىكىرتالاستارىمىز الەمدىك ەكونوميكانىڭ دامۋىنا ءوز ۇلەسىن قوسادى دەپ ۇمىتتەنەمىن», – دەدى قازاقستان پرەزيدەنتى. مەملەكەت باسشىسى كەزدەسۋگە قاتىسۋشىلار نازارىن الەمدىك قوعامداستىق الدىندا تۇرعان ماسەلەلەر مەن قاۋىپ-قاتەرلەرگە اۋداردى. «بۇلارعا الەمدىك جۇيە تارتىبىندەگى داعدارىس پەن ەلدەر اراسىنداعى سەنىمنىڭ جوعالۋى, جاھاندىق ەكونوميكانىڭ تۋربۋلەنتتىلىگى, كليماتتىڭ وزگەرۋى, ارا-جىك اجىراتۋدىڭ جاڭا, سونىڭ ىشىندە ورتالىق ازيا وڭىرىندەگى كورىنىسى, سونداي-اق, الەمدىك قوعامداستىقتىڭ بەيبىتشىلىكتى ساقتاۋ قابىلەتىنىڭ السىرەۋى جاتادى. ەگەر ءبىز وسى قاتەرلەرمەن كۇرەسۋدىڭ جولدارىن ۇسىناتىن بولساق, ول ىلگەرىلەۋ مەن ەكونوميكانى دامىتۋدىڭ جاڭا كوكجيەگىن اشۋعا, دەمەك, ادامداردىڭ تۇرمىسىن جاقسارتۋعا مۇمكىندىك بەرەدى», – دەدى نۇرسۇلتان نازارباەۆ. كەزدەسۋگە قاتىسۋشىلار VIII استانا ەكونوميكالىق فورۋمى جاھاندىق الەۋمەتتىك-ەكونوميكالىق ماسەلەلەردى تالقىلايتىن ماڭىزدى پىكىرتالاس الاڭى بولىپ سانالاتىنىن ايتتى. نوبەل سىيلىعىنىڭ لاۋرەاتى ف.-ە.كيدلاند قازاقستان پرەزيدەنتىنە فورۋمعا شاقىرىلعانى ءۇشىن العىس ايتىپ, قازاقستان الەمدەگى مەيلىنشە جەدەل دامىپ كەلە جاتقان ەلدىڭ ءبىرى ەكەنىنە توقتالىپ ءوتتى. «قازاقستان بەتپە-بەت كەلگەن سىن-قاتەردىڭ ءبىرى – ورنىقتى ءوسىمدى ساقتاۋ ءۇشىن قاجەت بىلىكتى ماماندار ىزدەستىرۋ بولدى. وسىعان بايلانىستى ەلدىڭ مۇددەسىنە تولىق ساي كەلەتىن ءبىلىم بەرۋ جۇيەسىن دامىتۋ مەن جەتىلدىرۋگە ءسىزدىڭ جۇمساعان كۇش-جىگەرىڭىزدى اتاپ ايتۋعا رۇقسات ەتىڭىز», – دەدى ف.-ە.كيدلاند. ەكونوميكالىق ىنتىماقتاستىق جانە دامۋ ۇيىمىنىڭ سىرتقى بايلانىستار جونىندەگى ديرەكتوراتىنىڭ باسشىسى م.بونتۋري نۇرسۇلتان نازارباەۆتى ەلدىڭ پرەزيدەنتى بولىپ قايتا سايلانۋىمەن قۇتتىقتاپ, مەملەكەت قۇرۋ ىسىندەگى «100 ناقتى قادام» باعدارلاماسىنىڭ دەر كەزىندە قابىلدانعانىن ايتتى. «قازاقستانمەن ارادا نىعايىپ كەلە جاتقان ءوزارا ءىس-قيمىلدى ءبىز ماقتانىش ەتەمىز. ءبىزدىڭ ۇيىم حالىقتىڭ تابىسى تومەن, تۇرمىسى ناشار توبىنىڭ ءال-اۋقاتىن جانە ايەلدەردى ەڭبەككە تارتۋ دەڭگەيىن ارتتىرۋ ماسەلەلەرى بويىنشا ىنتىماقتاستىق جاسايدى. مەن ەكونوميكانىڭ ورنىقتى دامۋى مەن تەڭگەرمەلى ءوسىمىن قامتاماسىز ەتۋ باعىتىنداعى قازاقستاننىڭ كۇش-جىگەرى مەن ءورشىل جوسپارلارىن تولىق قولدايتىنىمىزعا ءسىزدى سەندىرگىم كەلەدى», – دەدى م.بونتۋري. ەلامان قوڭىر. دەرەك, سۋرەت: akorda.kz.