كەشە وتانىمىز بويىنشا 1200 ادام «نۇر وتان» قاتارىنا قابىلداندى
استاناداعى قازاقستان رەسپۋبليكاسىنىڭ تۇڭعىش پرەزيدەنتى مۋزەيىندە ەلوردا كۇنىنە وراي ازاماتتاردى «نۇر وتان» پارتياسىنىڭ قاتارىنا قابىلداۋدىڭ ءداستۇرلى ءراسىمى ءوتتى. جيىندا پارتيا توراعاسىنىڭ ءبىرىنشى ورىنباسارى باۋىرجان بايبەك «نۇر وتاننىڭ» 12 جاڭا مۇشەسىنە پارتيالىق بيلەتتەردى تابىس ەتتى.
سالتاناتتى باسقوسۋدا باۋىرجان بايبەك قازىرگى تاڭدا «نۇر وتاننىڭ» 860 مىڭ مۇشەسى بار ەكەنىن, استانا كۇنىنىڭ قۇرمەتىنە وراي پارتيا قاتارىنا تاعى دا ەلىمىزدىڭ بارلىق وڭىرلەرىنەن 1 258 ادام قوسىلعالى تۇرعانىن, ولاردىڭ جاڭا ۇلگىدەگى پارتيالىق بيلەتتەرگە يە بولاتىنىن اتاپ ءوتتى. ونىڭ ايتۋىنشا, «نۇر وتانعا» مۇشەلىككە وتكەندەردىڭ بارلىعى دا پارتيانىڭ يدەيالارى مەن قاعيداتتارىن قولدايتىن, ءوز ەڭبەكتەرىمەن ەلىمىزدىڭ دامۋىنا زور ۇلەس قوسىپ كەلە جاتقان لايىقتى ازاماتتار.
– جىل سايىن ءبىزدىڭ قاتارىمىزعا قوسىلعىسى كەلەتىندەر سانىنىڭ ارتىپ كەلە جاتقانى قۋانتادى. مۇنداي نيەتتەگىلەردى پارتيانىڭ نەگىزىن قالاۋشى ءارى ساياسي يدەالى نۇرسۇلتان نازارباەۆتىڭ سارابدال ساياساتى ارقاسىندا العا باسقان ەلىمىزدىڭ دامۋىنا اتسالىسقىسى كەلەتىن ازاماتتار دەپ بىلەمىن. مەملەكەت باسشىسى اتاپ وتكەندەي, «رەفورمالار ءاربىر ازاماتتىڭ قاتىسۋىن تالاپ ەتەدى». ەلباسى رەفورمالارى ەلىمىزدى تۇبەگەيلى وزگەرتەدى, ازاماتتاردىڭ ءال-اۋقاتىن ارتتىرادى, الەمدەگى الدىڭعى قاتارلى 30 مەملەكەتتىڭ قاتارىنا قوسىلۋعا مۇمكىندىك بەرەدى. نەگىزىنەن, ءبىزدىڭ پارتيانىڭ مىندەتى – ەلىمىزدىڭ بىرلىگى مەن ىنتىماعىن قامتاماسىز ەتۋ. بىرلىكسىز, تاتۋلىقسىز ەلدىڭ دامۋىنا قول جەتكىزىلمەيدى, – دەدى پارتيا توراعاسىنىڭ ءبىرىنشى ورىنباسارى.
بۇدان كەيىن باۋىرجان بايبەك پارتيا بيلەتىن العالى تۇرعان 12 وتانداسىمىزعا قاراپ:
– ءبىز سىزدەردىڭ «نۇر وتان» پارتياسىنىڭ قاتارىنا وتۋگە قاتىستى قابىلداعان شەشىمدەرىڭىزدى قۇرمەتتەيمىز. بارلىقتارىڭىز ءوز ايماقتارىڭىزدا, رەسپۋبليكامىزدا وتە تانىمال تۇلعالارسىزدار, ەڭبەكتەرىڭىز بەن تابىستارىڭىز ارقىلى ەل بولاشاعى ءۇشىن تەر توگە الاتىندارىڭىزدى كورسەتە ءبىلدىڭىزدەر. پارتيا سىزدەرگە ەلىمىزدىڭ وركەندەۋىنە ۇلەس قوسۋعا جاڭا مۇمكىندىكتەر بەرەتىنىنە سەنەمىز», – دەدى ب.بايبەك.
بۇدان كەيىن پارتيانىڭ جاڭا مۇشەلەرىنە سالتاناتتى جاعدايدا بيلەت تاپسىرۋ ءراسىمى ءوتتى.
سونىمەن, بۇل كۇنى پرەزيدەنت جانىنداعى مەملەكەتتىك باسقارۋ اكادەمياسىنىڭ پروفەسسورى زينايدا فەدوتوۆا, «جامبىل ەلەكتر جەلىلەرى» جشس باس ديرەكتورى ءاليحان جاربولوۆ, Kazakhstan Computer Graphics جشس باس ديرەكتورى ەرنار قۇرماشەۆ, «جاسىل ەل» جاستار ەڭبەك جاساعى رەسپۋبليكالىق شتابىنىڭ جەتەكشىسى راحات حاميدۋللين, «قازاقستان» رترك اق اقپاراتتىق-ساراپتامالىق ديرەكتسياسىنىڭ ديرەكتورى قۇرمانبەك قازانباسوۆ, جامبىل اتىنداعى قازاق مەملەكەتتىك فيلارمونياسىنىڭ ديرەكتورى اقان ابدۋاليەۆ, قوستاناي وبلىسىنىڭ «تورو» كومپانياسىنىڭ ديرەكتورى مايل تورويان, اقتوبە وبلىسىنىڭ «وسەرباي» شارۋا قوجالىعىنىڭ باسشىسى لاريسا يۋ, باتىس قازاقستان وبلىسىنداعى «زەنيت» زاۋىتىنىڭ ينجەنەر-قۇراستىرۋشىسى داۋرەن وحاسوۆ, رەجيسسەر جانە اكتەر ماكسيم اكباروۆ, ەسترادالىق انشىلەر قايرات نۇرتاس پەن جانار دۇعالوۆا پارتيا قاتارىنا ءوتتى.
زينايدا فەدوتوۆا پارتيالىق بيلەتتى قابىلداپ الۋ ساتىندە: «2015 جىلدىڭ ماۋسىمىندا قوعامدىق ساياسات ينستيتۋتى ساراپشىلار قاۋىمداستىعى جۇرگىزگەن ساۋالداما ناتيجەسى ەل ازاماتتارىنىڭ 83,3 پايىزى «نۇر وتان» پارتياسىنا سەنەتىنىن كورسەتىپ بەردى. مەن دە ءوز پارتياما سەنەمىن جانە قوعام ومىرىنە بەلسەنە اتسالىسامىن, پارتيامىزدىڭ كوشباسشىسى ۇسىنىپ وتىرعان بارلىق باستامالاردى قولدايمىن. بۇدان ءارى قاراي دا وسى باعىتتا ءوز ۇلەسىمدى قوسا بەرەتىنىمە سەنىمدىمىن», – دەدى.
ءوز كەزەگىندە مەملەكەت باسشىسىنىڭ ومىرىنە ارنالعان «مەنىڭ بالالىق شاعىمنىڭ اسپانى», «ەلباسى جولى» فيلمدەرىنىڭ كومپيۋتەرلىك گرافيكاسىن جانە «قازاقستاندىقتار – كەڭەس وداعىنىڭ باتىرلارى» بەينەانتولوگياسىن دايىنداۋعا قاتىسقان ەرنار قۇرماشەۆ: «نۇر وتان» پارتياسىنىڭ بيزنەستى, كاسىپكەرلىكتى قولداپ كەلە جاتقانىن كورىپ ءجۇرمىن. نەگىزىندە, بيزنەسمەندەر ەلىمىزدىڭ ءوسىپ-وركەندەۋىنىڭ قوزعاۋشى كۇشى بولىپ تابىلادى. سوندىقتان, كاسىپكەرلەردىڭ, ولاردىڭ اراسىندا جاس بيزنەسمەندەردىڭ بويىنا پاتريوتيزم مەن ەل الدىنداعى جاۋاپكەرشىلىك سەزىمىن سىڭىرە ءبىلۋىمىز كەرەك», – دەگەن پىكىرىن جەتكىزدى.
ەسترادا ءانشىسى, «ەلباسىمەن بىرگە – جاڭا جەڭىستەرگە!» جاستار فورۋمىنىڭ قاتىسۋشىسى قايرات نۇرتاس پارتيانىڭ قوعامىمىزداعى ورنى, بەدەلى جونىندە ايتا كەلىپ: «نۇر وتان» – ەلباسىمىزدىڭ پارتياسى. پارتيانىڭ بارلىق باستامالارى قازاقستاندىقتاردىڭ جاسامپازدىعى مەن ولاردىڭ ىنتىماعىن نىعايتۋعا باعىتتالعان. مۇنى بارشامىز بىلەمىز. سوندىقتان مەن ءوز ەلىمنىڭ كەلەشەگى ءۇشىن ايانباي ەڭبەك ەتۋ ماقساتىندا نۇروتاندىقتاردىڭ قاتارىندا بولۋدى قۇپ كوردىم», – دەدى.
سونداي-اق, پارتياعا مۇشەلىككە قابىلداۋ ءراسىمى ساتىندە ەسترادا ءانشىسى, «Turkvizyon-2014» بايقاۋىنىڭ جەڭىمپازى جانار دۇعالوۆا ەلباسى پارتياسىنىڭ مۇشەسى بولۋ زور قۇرمەت قانا ەمەس, سونداي-اق, ۇلكەن جاۋاپكەرشىلىك جۇكتەيتىنىن جەتكىزە وتىرىپ: «جاس وتاننىڭ» سەزىندە پرەزيدەنتتىڭ الدىندا ءسوز سويلەپ, سايلاۋدا رەسپۋبليكالىق شتاب قۇرامىندا تۇرعىندارمەن كەزدەسىپ, ولاردىڭ ەلباسىن قالاي قولدايتىندارىن كورىپ, ەلىمىزدىڭ ءوسىپ-وركەندەۋى ءۇشىن ۇلەس قوسا الاتىنىمدى ءتۇسىندىم. سوندىقتان دا مەن «نۇر وتان» پارتياسىنىڭ قاتارىنا ءوتۋدى ۇيعاردىم. مەن «نۇر وتاننىڭ» قوعامعا, قاراپايىم ازاماتتارعا, اسىرەسە, جاستارعا دەگەن كوزقاراسى مەن ۇستانىمدارىن تولىق قولدايمىن», – دەدى.
ايتا كەتەيىك, قازىرگى تاڭدا «نۇر وتاننىڭ» 5 700 باستاۋىش ۇيىمى جۇمىس ىستەۋدە. پارتيا مۇشەلەرىنىڭ 32 پايىزى عىلىم مەن ءبىلىم, مادەنيەت سالاسىنىڭ, 8 پايىزى دەنساۋلىق ساقتاۋ سالاسىنىڭ قىزمەتكەرلەرى. پارتيا ءمۇشەلەرىنىڭ 60 پايىزى – ايەلدەر.
جولدىباي بازار,
«ەگەمەن قازاقستان».
