تارازدا ۆەلوسيپەدپەن ادام قاققان قىزعا ۇكىم شىقتى

تاراز. 16 قازان. تاراز قالاسىنىڭ № 2-ءشى سوتى جازدا ايەل ادامدى قاعىپ كەتكەن 19 جاستاعى قالا تۇرعىنى كوركەم راحمەتقۇلعا قاتىستى قىلمىستىق ءىستى قارادى. بۇل تۋرالى تاراز قالاسى № 2-ءشى سوتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. بيىلعى جىلدىڭ ماۋسىم ايىندا ك. راحمەتقۇل, قۇربىلارىمەن بىرگە ۆەلوسيپەدتى جالعا الىپ, «دوستىق» الاڭىندا ايداپ جۇرگەن. 20 مينۋت ايداعاننان كەيىن, ورتالىق ستاديونعا قاراي ۆەلوسيپەدتەرىمەن بارماقشى بولىپ ءوز-ارا كەلىسكەن. جولدا ك.راحمەتقۇل قۇربىلارىنان وزىپ كەتىپ, جاياۋ جۇرگىنشىلەرگە ارنالعان جولاققا شىعىپ, بالالى ايەلدى قاعىپ كەتكەن, العان جاراقاتىنان ايەل ادام ەسىنە كەلمەي قالالىق اۋرۋحانادا قايتىس بولدى. سوت ۇكىمىمەن ك. راحمەتقۇل قىلمىستىق كودەكستىڭ 104-بابىنىڭ 1-بولىگىمەن (ابايسىزدا قازاعا ۇشىراتۋ) كىنالى دەپ تانىلىپ, وعان 3 جىلعا باس بوستاندىعىن شەكتەۋ جازاسى تاعايىندالعان جانە ناق سول مەرزىمگە پروباتسيالىق باقىلاۋ بەلگىلەنگەن. ورالحان ءداۋىت. دەرەك: egemen.kz. سۋرەت: proza.ru.