ريگادا بۇرىنعى كەڭەس وداعى قۇرامىنداعى 6 ەلدىڭ ءسامميتى وتۋدە

الماتى. 22 مامىر. لاتۆيا استاناسى ريگا قالاسىندا بۇرىنعى كەڭەس وداعىنىڭ 6 رەسپۋبليكاسى باس قوسقان ەۋروپالىق وداق ءسامميتى ءوتىپ جاتىر. جيىننىڭ باعدارلاماسى «شىعىس ارىپتەستىگى» دەپ اتالادى. تۇپكى ماقسات – بۇرىنعى كسرو مەملەكەتتەرىن جالپىەۋروپالىق ساياسي, ەكونوميكالىق كەڭىستىككە تارتۋ. بۇل تۋرالى اسسوشيەيتەد پرەسس حابارلادى. 2009 جىل قۇرىلعان «شىعىس ارىپتەستىگى» باعدارلاماسىنا ۋكراينا, مولداۆيا, ازەربايجان, ارمەنيا, گرۋزيا جانە بەلارۋسسيا رەسپۋبليكالارى قاتىسادى. ەۋروپالىق كەڭەستىڭ جەتەكشىسى دونالد تۋسك ءسامميتتى اشۋ بارىسىنداعى سوزىندە ماسكەۋدىڭ بەيبىت كورشىلەرىنە «باسقىنشىلىقپەن كۇش كورسەتۋ تاكتيكاسىن» قولدانىپ كەلەتىنىن باسىپ ايتتى. تۋسك ءوز ءسوزىن: «رەسەي ويلاعانداي – ءبىز, ماسكەۋدى پوستكەڭەستىك كەڭىستىككە يتەرمەلەۋدەن اۋلاقپىز, شىعىس ارىپتەستىگى ەشكىمگە قارسى قۇرىلماعان, كەرىسىنشە, قاتىسۋشى مەملەكەتتەر اراسىنداعى ىنتىماقتاستىقتى ناعايتۋعا باعىتتالعان»,– دەپ تۇيىندەدى. ريگاعا اتتانار الدىندا بۋندەستاگتا سويلەگەن سوزىندە گەرمانيا كانتسلەرى انگەلا مەركەل – بۇل ۇيىمنىڭ جانە ونىڭ قىزمەتىنە تۇسىنىستىكپەن وڭ قاباق تانىتىپ كەلەتىن ەۋروپالىق وداقتىڭ ەكسپانتسيونيستىك پيعىلدان ادا ەكەنىن دە اتاپ ءوتتى. «كىممەن تىعىز بايلانىس جاساپ, كىممەن قاتىناس ورناتۋ ءاربىر ارىپتەس مەملەكەتتەردىڭ  تاۋەلسىز ەركى بولىپ سانالادى. وعان بوگەت جاساۋعا ەشكىمنىڭ قۇقى جوق»,– دەدى كانتسلەر. تالعات ءسۇيىنباي. دەرەك, سۋرەت:ار.