رونالدۋ باق وكىلدەرىنە بايكوت جاريالادى

استانا. 11 ناۋرىز. كريشتيانۋ رونالدۋ تىلشىلەرگە وكپەلەپ قالدى. وكپەلەگەنى سونشالىق ماۋسىم سوڭىنا دەيىن قولىندا ميكرافونى مەن كامەراسى بار بىردە ءبىر اداممەن سويلەسپەۋ تۋرالى شەشىم قابىلدادى. بۇل تۋرالى egemen.kz حابارلادى. كەشە تۇندە رونالدۋدىڭ كومانداسى چەمپيوندار ليگاسىندا گەرمانيانىڭ «شالكەسىنەن» 3:4 ەسەبىمەن جەڭىلىپ قالدى. بۇل ناتيجە پورتۋگال فۋتبولشىسىنا قاتتى اسەر ەتتى. ءتىپتى ويىننان كەيىن الاڭنان كەتىپ بارا جاتقان رونالدۋ كوماندالاس ارىپتەسى بەنزەماعا «بۇل ناعىز ۇيات بولدى» دەپ, كوڭىل-كۇيىنىڭ بولماي تۇرعانىن جەتكىزگەن. سونداي-اق, ول تارتىستىڭ ناتيجەسى مەن كوماندانىڭ ويىنىنا كوڭىلى تولماعانىن, سول سەبەپتى باق وكىلدەرىمەن كەزدەسكىسى كەلمەيتىنىن ءبىلدىردى. 90 مينۋتتىق تارتىستان كەيىن ءباسپاسوز وكىلدەرىنىڭ قارشا بوراعان سۇراقتارىنا كريشتيانۋ «مەن قازىر ەش نارسە ايتپايمىن. جالپى, ماۋسىم سوڭىنا دەيىن باق وكىلدەرىمەن سويلەسپەيمىن», – دەپ قىسقا دا نۇسقا ءسوز ايتىپ, جونىنە كەتە باردى. ماۋسىمنىڭ مامىر ايىندا اياقتالاتىنى بەلگىلى. دەمەك, فۋتبولشى سول ۋاقىتقا دەيىن ءتىلشى اتاۋلىعا بايكوت جاريالاپ وتىر. ايتا كەتەيىك, «رەال مادريد» «شالكەدەن» جەڭىلگەنىنە قاراماستان, چەمپيوندار ليگاسىنىڭ شيرەك فينالىنا شىقتى. سەبەبى, ءۇش اپتا بۇرىن گەلزەنكيرحەندە وتكەن العاشقى ويىندا مادريدتىكتەر 2:0 ەسەبىمەن جەڭگەن ەدى. سول ويىندا رونالدۋ ءبىر مارتە مەرگەندىگىمەن كوزگە تۇسسە, كەشەگى باسەكەدە ەكى گولدىڭ اۆتورى اتاندى. سونىڭ ناتيجەسىندە, كريشتيانۋ چەمپيوندار ليگاسىندا سۇرمەرگەندەر كوشىن باستادى. ونىڭ ەنشىسىندە بۇگىندە 77 دوپ بار. بۇل كورسەتكىشپەن رونالدۋ راۋل گونسالەس پەن لەونەل مەسسيدى اينالىپ ءوتتى. ەلامان قوڭىر. دەرەك: egemen.kz. سۋرەت: ronaldo7.net.