تاراز. 16 قازان. تاراز قالاسىنداعى «تاراز-ارەنا» سپورت سارايىندا ىشكى ىستەر ورگاندارىندا جانە ورتا مەكتەپتەردىڭ ىشكى ەسەبىندە تۇرعان «قيىن توپتاعى» كامەلەتتىك جاسقا تولماعان بالالاردىڭ اتاقتى سپورتشىلار جانە سپورت ارداگەرلەرىمەن كەزدەسۋى ءوتتى. بۇل تۋرالى egemen.kz ءتىلشىسى حابارلادى.
جامبىل وبلىستىق سپورت باسقارماسىنا 2015 جىلدىڭ جاڭا وقۋ جىلىندا ىشكى ىستەر ورگاندارىندا ەسەپتە تۇرعان قيىن توپتاعى 225 بالا ءبولىنىپ بەرىلگەن. ول بالالاردىڭ 150-ءى اۋداندىق سپورت بولىمدەرىنە, 75 بالا قالاداعى 7 سپورت مەكتەبىنە ورنالاستىرىلدى. قازىرگى تاڭدا 30-دان اسا بالا قالاداعى سپورت مەكتەپتەرىندە فۋتبول, بوكس, تاەكۆوندو, قول كۇرەسى, ءجۇزۋ, ۆەلوسپورت, ەركىن كۇرەس, گرەك-ريم, سامبو, قازاق كۇرەسى, دزيۋدو جانە تاعى باسقا سپورت تۇرلەرىنەن سەكتسيالارعا قاتىسۋدا. ءار بالا بەلگىلەنگەن سپورت ءتۇرى بويىنشا جاتتىقتىرۋشىلارعا جۇكتەلىپ, سول بالالارمەن جۇمىستار جۇرگىزىلۋدە.
كەزدەسۋدە وبلىستىڭ اتاقتى سپورتشىلارىنىڭ قاتارىنداعى ارمرەستلينگتەن بىرنەشە دۇركىن الەم چەمپيونى دميتري ترۋبين, جۇزۋدەن بۇكىلالەمدىك ويىنداردىڭ جەڭىمپازى جانە التى دۇركىن الەم چەمپيونى گابيدۋللينا زۋلفيا, بوكستان جاستار اراسىنداعى ازيا چەمپيونى ءتۇرسىنالى الديار, سامبودان 4 دۇركىن الەم چەمپيونى مۋسابەكوۆ الماس, سپورت ارداگەرى لوبانوۆا ماريا سپورتتاعى جەتىستىكتەرى جايلى اڭگىمە قوزعادى.
كەزدەسۋ بارىسىندا بالالارعا سپورتپەن اينالىسۋ ارقىلى قانداي جەتىستىكتەرگە جەتۋگە بولاتىندىعى ءتۇسىندىرىلدى.
سپورتشىلارمەن كەزدەسۋ اياقتالعاننان كەيىن بالالارعا «تاراز-ارەنا» سپورت سارايىمەن تانىستىرۋ جۇرگىزىلدى.
ورالحان ءداۋىت.
دەرەك, سۋرەت: egemen.kz.
