نازارباەۆ, پۋتين جانە لۋكاشەنكو استانا كەزدەسۋىن كەيىنگە شەگەردى

استانا. 11 ناۋرىز. قازاقستان, رەسەي جانە بەلارۋس پرەزيدەنتتەرى نۇرسۇلتان نازارباەۆ, ۆلاديمير پۋتين جانە الەكساندر لۋكاشەنكو استانادا وسى اپتادا وتتەتىن بولىپ بەلگىلەنگەن كەزدەسۋدى بىرنەشە كۇنگە كەيىنگە شەگەردى. بۇل تۋرالى رەسەي مەملەكەتى باسشىسىنىڭ ءباسپاسوز حاتشىسى دميتري پەسكوۆتىڭ سوزىنە سىلتەمە جاساعان «روسسيسكايا گازەتا» حابارلادى. مۇنى الدىمەن قازاقستاننىڭ ديپلوماتياسىنداعى مانبەلەر جەتكىزدى. سودان كەيىن اقپاردى كرەملدىڭ ءباسپاسوز قىزمەتى راستادى. «شىنىندا ءۇش مەملەكەت ليدەرلەرىنىڭ استانادا وتەتىن بولىپ بەلگىلەنگەن كەزدەسۋىن كەيىنگە شەگەرۋ تۋرالى شەشىم قابىلداندى», - دەدى وسى ورايدا پەسكوۆ. بۇدان بۇرىن ۆلاديمير پۋتين 12-13 ناۋرىز كۇندەرى استانا قالاسىنا رەسمي ساپار جاساپ, قازاقستان جانە بەلارۋس باسشىلارىمەن كەزدەسەتىنى ايتىلعان بولاتىن. كۇن تارتىبىنە ءۇش ەلدىڭ ساۋدا-ەكونوميكالىق ىنتىماقتاستىعىنىڭ قازىرگى احۋالى جانە پەرسپەكتيۆاسى, الەم ەكونوميكاسىندا بولىپ جاتقان وزگەرىستەر جاعدايىنداعى ەۋرازيالىق ينتەگراتسيالىق ۇدەرىستەر تۋرالى ماسەلەلەر قارالاتىن بولىپ بەكىتىلگەن ەدى. ليدەرلەر سونداي-اق حالىقارالىق وزەكتى ماسەلەلەر, ەڭ الدىمەن ۋكرايناداعى جاعداي تۋراسىندا ءوزارا پىكىر الماسۋعا دا ۋاقىت تاباتىن بولعان-دى. مۇرات ايتقوجا.