اقتوبەدە ۇزدىك ينسپەكتورلار بايقاۋى ءوتتى

اقتوبە. 16 قازان. اۋىل شارۋاشىلىعى مينيسترلىگى اگروونەركاسىپ كەشەنىندەگى مەملەكەتتىك ينسپەكتسيا كوميتەتىنە قاراستى اقتوبە وبلىستىق اۋماقتىق ينسپەكتسياسى ەڭ ۇزدىك ينسپەكتورلار انىقتايتىن بايقاۋ ۇيىمداستىردى. بۇل تۋرالى egemen.kz ءتىلشىسى حابارلادى. بايقاۋدا اۋماقتىق ينسپەكتسيانىڭ وسىمدىكتەردى قورعاۋ, كارانتين, استىق جانە اسىل تۇقىمدى مال شارۋاشىلىعى سالالارىندا ەڭبەك ەتەتىن ينسپەكتورلارى سايىستى. ۇزدىك ينسپەكتور بايقاۋىنا وبلىسىمىزدىڭ اۋداندارىنان بارلىعى 40-قا تارتا ينسپەكتور قاتىستى. وبلىستىق اۋماقتىق ينسپەكتسيا باسشىسىنىڭ ورىنباسارى ەرلان ورىنباەۆتىڭ ايتۋىنشا, ۇزدىك ينسپەكتورلار بايقاۋىن وتكىزۋدەگى ماقسات — ولاردىڭ ءوز سالاسىن قانشالىقتى جەتىك مەڭگەرگەنىن, جۇمىستارىن قالاي ورىندايتىنىن انىقتاۋ بولىپ تابىلادى. ينسپەكتورلار الدىمەن تەست سۇراقتارىنا جاۋاپ بەرىپ, ءوز بىلىمدەرىن دالەلدەدى. سونان سوڭ كاسىبي بىلىكتىلىكتەرىن دالەلدەيتىن تاجىريبەلىك سۇراقتاردىڭ شەشىمىن تاپتى. ال ءۇشىنشى كەزەڭدە القا مۇشەلەرى قويعان جالپى سۇراقتارعا جاۋاپ بەردى. جوعارىدا اتالعان ءتورت سالا بويىنشا ۇزدىك دەپ تانىلعان ينسپەكتورلار استانا قالاسىندا وتكىزىلەتىن رەسپۋبليكالىق بايقاۋدا وبلىسىمىزدىڭ نامىسىن قورعايتىن بولادى. ساتىبالدى ءساۋىرباي. دەرەك, سۋرەت: egemen.kz.