قوستانايدا كاسىپكەردىڭ ساعاتتار كوللەكتسياسى قولدى بولدى

قوستاناي. 16 قازان. قوستانايداعى جاڭادان ءتۇسىپ جاتقان سولتۇستىك باتىس شاعىن اۋدانىنداعى تاۋنحاۋستان قوستاناي وبلىستىق ىشكى ىستەر دەپارتامەنتى باستىعىنىڭ Audemars Piguet, Zenith, Clerc, Breguet, Ulysse Nardin, Frederique Constant جانە Longines ماركالى ساعاتتار كوللەكتسياسى ۇرلانعانى, ولاردىڭ ارقايسىسى 500 دوللار تۇراتىندىعى جونىندە اقپاراتتار تاراعان بولاتىن. الايدا, وبلىستىق ىشىكى ىستەر دەپارتامەنتىنىڭ ءباسپاسوز قىزمەتى ساعاتتاردىڭ گەنەرال تىلەگەن ماتكەنوۆكە ەشقانداي قاتىسى جوق ەكەنىن حابارلادى. ۇرلىقتان زارداپ شەككەن باسقا كاسىپكەر ەكەن. بۇل تۋرالى alau.kz سايتىنا سىلتەمە جاساعان egemen.kz ءتىلشىسى حابارلادى. پوليتسيانىڭ ءباسپاسوز قىزمەتى ۇرلانعان باعالى ساعاتتار تىلەگەن ماتكەنوۆتىكى ەمەستىگىن, ول ءۇيدى گەنەرال جاز ايلارىندا جالداعانىن ايتتى. پوليتسياعا ماتكەنوۆ ارىز بەرگەن جوق, باسقا كاسىپكەر شاعىمدانعان. بىراق ءباسپاسوز قىزمەتى كاسىپكەردىڭ اتىن اتامايدى. سونىمەن قاتار كاسىپكەر الگى ساعاتتاردىڭ بارلىعىن قوسقاندا قۇنى 300 مىڭ تەڭگە بولاتىنىن دا ايتقان. كاسىپكەردىڭ ايتۋىنا قاراعاندا, ساعاتتار تازا برەند ەمەس, جاساندى كوشىرمە عانا. گەنەرال ماتكەنوۆ وسىدان ءۇش اي ءبۇرىن الگى تاۋنحاۋستان كوشىپ كەتەدى. ول جالعا تۇرعان كەزدە ۇيگە تىركەلگەن جانە تەلەفوندى ءوز اتىنا جازدىرعان. بىراق كوشىپ كەتكەننەن كەيىن تەلەفوندى قايتا راسىمدەۋدى ۇمىتىپ كەتكەن. جاقىندا گەنەرال تىلەگەن ماتكەنوۆ جۋرناليستەردىڭ الدىنا شىعىپ, جاعدايدىڭ قالاي بولعانىن ءوزى ايتىپ بەرمەك ەكەن. ايتا كەتەتىنى, سوڭعى ۋاقىتتا قوستانايدا ۇرلىق ءورشىپ كەتتى. قازان ايىنىڭ العاشقى ەكى اپتاسى ىشىندە وبلىستا 203 ۇرلىق ورىن العان. سونىڭ ىشىندە 4 ءىرى ۇرلىقتان كەلگەن زيان ءبىر ميلليون تەڭگەنى قۇرايدى. ولاردىڭ ءىسىن تىلەگەن ماتكەنوۆ ءوزىنىڭ جەكە باقىلاۋىندا ۇستاپ وتىر. ءنازيرا جارىمبەوۆا. دەرەك: alau.kz. سۋرەت: ng.kz.