استانا مەن الماتى ەگىز ۇعىم

الاتاۋ بوكتەرىندەگى الىپ شاھار ەگە­مەن­دىكتىڭ كۋاسى, تاۋەلسىزدىكتىڭ تىرەگى. ەلدىگىمىزدىڭ ىرگەسى قالانعان مەكەن. تاۋەلسىزدىك تۋرالى دەكلاراتسيا قابىلدانعان قالا دا – الماتى. ەلباسىمىز ايتقانداي, «الماتى – قازاق مەملەكەتىنىڭ التىن بەسىگى». كەزىندە ەل اراسىندا «الماتى – باس قا­لام, استانا – جاس قالام», – دەگەندى كوپ ەستي­تىن­بىز. جاس قالا دەيمىز-اۋ. سول سارى­ارقانىڭ سارى بەلىندە قانجىعالى قارت بوگەن­باي ەلىندە ۇلان-بايتاق قازاق جەرىنىڭ قاسيەت­تى ورتالىعىنداعى جاس استانا – بۇگىن­دە وتانىمىزدىڭ كۇرەتامىرىنا قان جۇگى­ر­تەتىن, ساۋلەتتى دە, قۋاتتى قالاعا اينالعانىن كوز كورىپ وتىر. تاريحقا كوز جۇگىرتسەك, 1994 جىلى قازاقستان رەسپۋبليكاسى پارلامەنتىنىڭ وتىرىسىندا پرەزيدەنت نۇرسۇلتان نازارباەۆ قازاقستاننىڭ استاناسىن الماتىدان اقمولاعا كوشىرۋ تۋرالى ۇسىنىس جاساپ, كەيىننەن 1997 جىلى قازاننىڭ 20-ىندا استانانى اۋىستىرۋ تۋرالى جارلىققا قول قويعان بولاتىن. 1998 جىلى مامىردىڭ 6-دا اقمولا قالاسىنىڭ اتاۋى استانا بولىپ وزگەردى. سول ءبىر تۇستا استانا قالاسىنىڭ بولا­شاعىنا كۇمانمەن قاراعاندار بولمادى ەمەس, بولدى. الايدا, مەملەكەت باسشىسى جاساعان باتىل شەشىم ەل سەنىمىن اقتادى. از ۋاقىتتىڭ ىشىندە ەلباسىمىزدىڭ ءتول تۋىندىسى استانا قالاسى جاڭا ءبىر مادەني-عىلىمي ءھام ساياسي-ەكونوميكالىق الىپ ورتالىققا اينالدى. ەلوردا الەمگە تانىلدى جانە ەلىمىزدى الەمگە تانىتتى. جەر-جاھاننىڭ باسشىلارى ءجيى باس قوساتىن, ەكسپو-2017 حالىقارالىق كورمەسى سىندى الەمدىك ءىس-شارالاردى وتكىزەتىن دەڭگەيگە جەتتى. الماتى مەن استانا ەگىز ۇعىم. ءبىرى الا­تاۋدىڭ بوكتەرىندەگى, ال ەكىنشىسى سايىن دالا – سارىارقانىڭ توسىندە كۇن ساناپ گۇلدەنىپ, وركەندەپ كەلە جاتقان قازاقستاننىڭ سەرپىن­دى دامۋىنىڭ جارقىن بەينەلەرى ىسپەتتەس. بيىل ەلدىگىمىزدىڭ نىشانى, ابىروي­ىمىز­دىڭ ايعاعى سانالاتىن ەلوردامىز 17-ءشى رەت «تۋعان كۇنىن» اتاپ ءوتىپ وتىر. بۇل كۇللى قازاقستاندىقتار ءۇشىن ورتاق مەرەكە ەكەنى انىق. جاننا دوسانوۆا, الماتى قالاسى مەدەۋ اۋدانى اكىمى اپپاراتىنىڭ مادەنيەت جانە تىلدەردى دامىتۋ ءبولىمىنىڭ باسشىسى. الماتى.