حاندار تاريحى قامتىلعان

كەشە استانادا قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە قازاق حاندىعىنىڭ 550 جىلدىعىنا ارنالعان «قازاق حاندارى» اتتى تاريحي-تانىمدىق كىتاپتىڭ تانىستىرىلۋ ءراسىمى ءوتتى. قالىڭ كوپشىلىككە ۇسىنىلىپ وتىرعان كىتاپتا ەلىمىزدىڭ تاريحى, كەرەي مەن تاۋكە حان ارالىعىنداعى 17 حانى تۋرالى قىسقاشا ءارى بارشاعا ۇعىنىقتى تىلمەن جازىلعان. اتالعان باسىلىم جالپىعا ورتاق قازاق, ورىس, اعىلشىن تىلدەرىندە جارىق كورىپ وتىر ەكەن. عىلىمي ەڭبەكتىڭ ءبىر ەرەكشەلىگى ءداستۇرلى سوقپاقپەن ەمەس, جاڭاشىل جولمەن وقىرمان قاۋىمعا جول تارتقانىن باسا ايتساق دەيمىز. «بۇل تازا عىلىمي مونوگرافيالىق ەڭبەك ەمەس. كەرىسىنشە, كوپشىلىككە تۇسىنىكتى بولۋ ءۇشىن جازىلعان عىلىمي تانىمدىق دۇنيە. اسىرەسە, جيناقتىڭ ديزاينىنا ەرەكشە نازار اۋدارىلعان. ىشىندەگى سۋرەتتەردىڭ بارلىعى ەلىمىزدىڭ ورتا عاسىرداعى كەزەڭىنەن جان-جاقتى كورىنىس بەرەدى. تاريحي ەڭبەكتەر اقتاڭداق جىلداردىڭ شىندىعىن اشىپ قانا قويماي, كەيىنگى ۇرپاققا تۇسىنىكتى بولۋىن دا باستى نازاردا ۇستادى», دەيدى كىتاپ اۆتورى, تاريح عىلىمدارىنىڭ دوكتورى بەرەكەت كارىباەۆ. «كىتاپ جارىققا شىققاننان كەيىن بىزگە پولشا مەن بولگاريادان حابارلاسىپ, ونى ساتىپ الۋعا تاپسىرىس بەردى. سونىمەن قاتار, پولشا تاراپى ونى ءوز تىلدەرىنە اۋدارۋعا نيەت ءبىلدىردى. ءبىز قازىر بۇل ەڭبەكتى ءوز تاراپىمىزدان قىتاي تىلىنە اۋدارۋعا نيەتتەنىپ وتىرمىز. مۇنىمەن قوسا, شەتەلدەگى قانداستارىمىز ءۇشىن كىتاپتى توتە جازۋمەن شىعارۋدى دا قاراستىرۋدامىز. قازىردىڭ وزىندە سۇرانىس كوپ بولعاندىقتان كىتاپتىڭ تارالىمىن ارتتىرۋ جوسپارى بار», – دەدى «ساردار» باسپا ءۇيىنىڭ ديرەكتورى ءادىل قويتانوۆ. شەبەر قولمەن بەزەندىرىلگەن كىتاپ بارلىق جاستاعى وقىرماندى قىزىقتىرارى ءسوزسىز. سونداي-اق, ۇستازدار مەكتەپ باعدارلاماسىنا قوسىمشا قۇرال رەتىندە پايدالانۋعا دا بولادى. جىل سوڭىنا قاراي پروفەسسور ب.كارىباەۆ قازاق حاندىعى تۋرالى تاعى ەكى تومدىق زەرتتەۋ ەڭبەگىن جارىققا شىعارۋدى جوسپارلاپ وتىرعان كورىنەدى. دينارا دوسپان.