5,6 ميلليارد تەڭگە ينۆەستيتسيالىق قاراجاتتى يگەرۋدىڭ ارقاسىندا جالپى قۋاتتىلىق 63 مۆت-عا كوبەيدى
«سەۆكازەنەرگو» اق وبلىستىڭ 2,2 مىڭ بيۋدجەتتىك, ونەركاسىپ, كوممەرتسيالىق ۇيىمدارى مەن 580 مىڭ تۇرعىنىن ەلەكتر قۋاتىمەن جابدىقتايدى. بۇگىندە ەلەكتر جەلىلەرىنىڭ ۇزىندىعى 135 مىڭ شاقىرىمدى, جىلۋ قۇبىرلارى 233 شاقىرىمدى قۇرايدى. جالپى ەلەكتر قۋاتتىلىعى 455 مۆت-عا, ال جىلۋ ەنەرگياسى 791,65 گكال/ساعاتقا تەڭ. كومپانيا توزىعى جەتكەن قوندىرعىلار مەن قۇرال-جابدىقتاردى قالپىنا كەلتىرۋگە قوماقتى قارجى قۇيىپ كەلەدى. وعان قاراستى № 2 پەتروپاۆل جىلۋ-ەلەكتر ورتالىعى قىسقى ماۋسىمعا ازىرلىك قارساڭىندا رەسەيدەن جەتكىزىلگەن جاڭا قۇبىر اگرەگاتىن قۇراستىرىپ, ىسكە قوستى. جارتى عاسىردان استام ۇزدىكسىز جۇمىس ىستەپ كەلگەن نىساندى قايتادان تۇرعىزۋعا 5,6 ميلليارد تەڭگە ينۆەستيتسيا تارتىلدى. ەلەكتر قۋاتتىلىعى 63 مۆت-عا دەيىن ۇلعايتىلىپ, جىلىنا 40 مىڭ تونناداي كومىردى ۇنەمدەۋگە مۇمكىندىك بەردى.
– يندۋستريالىق-يننوۆاتسيالىق قۋاتتى جوبالار اياسىندا كوپتەگەن الەۋمەتتىك نىساندار, تۇرعىن ۇيلەر تۇرعىزىلۋدا. ولاردى قوسىمشا جىلۋ جانە ەلەكتر قۋاتىمەن قامتۋ ءۇشىن ستانسادا قوسىمشا رەزەرۆتىڭ پايدالانۋعا بەرىلىپ وتىرعانىن ايتۋلى وقيعاعا بالاۋعا بولادى. وڭىردە قىتىمىر قىستان قىسىلماي شىعۋدىڭ بارلىق جولدارى قاراستىرىلعان. قازىر كوپقاباتتى تۇرعىن ۇيلەردىڭ 92 پايىزعا جۋىعى جاۋاپتى ماۋسىمعا تاس ءتۇيىن دايىندىقتارى تۋرالى قۇجاتتارىن الدى, – دەدى سالتاناتتى جيىندا سويلەگەن سوزىندە ايماق باسشىسى ەرىك سۇلتانوۆ.
مۇنىڭ الدىندا وسىندا № 4 تۋربينا جاڭارتىلعان بولاتىن. الدا № 7 قۇبىر اگرەگاتى مەن № 6 بۋ قازاندىعى ءوز كەزەگىن كۇتىپ تۇر. جەو-نىڭ ديرەكتورى ۆيكتور ءبارميننىڭ ايتۋىنا قاراعاندا, جاڭا اكتيۆتەردى قۇرۋعا, تەحنيكالىق قايتا جاراقتاندىرۋعا, ءوندىرىس ورىندارىن كەڭەيتۋگە 34,5 ميلليارد تەڭگە قاراجات باعىتتالعان. ءسويتىپ, 2020 جىلعا دەيىن قۇبىر تسەحىنداعى قۇرال-جابدىقتاردىڭ 72 پايىزىن, قازاندىق تسەحىنىڭ جارتىسىنان استامىن الماستىرۋ جوسپارلانعان. ولارعا وزىق ۇلگىدەگى اۆتوماتتاندىرىلعان تەحنولوگيالىق باسقارۋ جۇيەسى ەنگىزىلەتىن بولادى.
جاڭا قۇبىر اگرەگاتىن وندىرىسكە ەنگىزۋ ستانسانىڭ جۇمىس تيىمدىلىگىن ارتتىرىپ, ەكولوگيالىق قاۋىپسىزدىگىن قامتاماسىز ەتىپ, قۇرال-جابدىقتاردىڭ توزۋىن 14 پايىزعا ازايتتى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
سۋرەتتەردى تۇسىرگەن
امانگەلدى بەكمۇراتوۆ.
