تورەشىنى تۇيگىشتەپ نەڭ بار ەدى, دي ماريا؟ (ۆيدەو)

استانا. 11 ناۋرىز. اعىلشىننىڭ «مانچەستەر يۋنايتەد» كومانداسىنىڭ ويىنشىسى انحەل دي ماريانىڭ باسى بالەگە قالدى. وسىدان ەكى كۇن بۇرىن انگليا كۋبوگىنىڭ شيرەك فينالىندا تورەشىنىڭ ارتىنان تۇيگىشتەگەنى ءۇشىن ەكىنشى سارى قاعازىن الىپ, الاڭنان قۋىلعان. سويتسەك, ماسەلە مۇلدەم باسقادا ەكەن. بۇل تۋرالى egemen.kz حابارلادى. سول ويىندا مانچەستەرلىكتەر لوندوننىڭ «ارسەنالىمەن» ويناپ, 1:2 ەسەبىمەن ەسە جىبەرگەن ەدى. بۇل جەڭىلىسكە تارتىستىڭ 76-مينۋتىندا دي ماريانىڭ الاڭنان قۋىلۋى دا ءوز سەپتىگىن تيگىزگەنى ءسوزسىز. ويىن بارىسىندا وزىنەن ءوزى جاسىل الاڭعا جالپ ەتىپ قۇلاپ, تورەشىدەن ايىپ دوبىن سۇراپ جاتىپ الدى. ءبارىن باقىلاپ تۇرعان باس قازى مايكل وليۆەر فۋتبولشىنىڭ بۇل ارەكەتىن سيمۋلياتسيا دەپ باعالاپ, ەسكەرتۋ جاسادى. سول-اق ەكەن ارگەنتينالىق بۇل شەشىمگە قارسىلىق ءبىلدىرىپ, تورەشىگە تۇرا ۇمتىلدى. ءتىپتى ويىننىڭ باستى قوجايىنى سانالاتىن ادامدى جەيدەسىنەن تارتىپ توقتاتپاق بولدى. ول ازداي, اشۋعا ەرىك بەرگەن فۋتبولشى سول ساتتە وليۆەر مىرزانىڭ جەر-جەبىرىنە جەتىپ, اۋزىنا كەلگەنىن ايتىپ تا ۇلگەرگەن ەكەن. ارنايى ماماندار ونىڭ قاي تىلدە, قانداي سوزدەر ايتقانىن انىقتاپ بەردى. سويتسە, دي ماريا يسپان تىلىندە تورەشىنىڭ اناسىنا ءتىل تيگىزگەن ەكەن. وسىلايشا ارگەنتينالىق فۋتبولشى ءبىر مينۋتتىڭ ىشىندە ەكى سارى قاعاز الىپ, ويىندى وزگەلەردەن ەرتە اياقتادى. ءبىر قىزىعى, ءاپ-ساتتە ەكى رەت ەسكەرتۋ الىپ, الاڭنان قۋىلۋ دي ماريا ءۇشىن تاڭسىق ەمەس. بۇعان دەيىن يسپانيا چەمپيوناتىندا ويناپ جۇرگەن كەزىندە وسىنداي جاعداي تىركەلگەن. 2013 جىلى «دەپورتيۆو» مەن ءمادريدتىڭ «رەالى» اراسىنداعى ويىندا دي ماريا ەكى رەت تورەشىنىڭ ايتقان سوزىنە قۇلاق اسپاي, ءتىلىن الماعان. ول كەزدەگى جاعداي بىلاي بولعان ەدى. فۋتبولشى «دەپورتيۆونىڭ» ايىپ سوققىسىن ورىنداۋعا كەدەرگى كەلتىرىپ, دوپقا تىم جاقىن تۇرادى. تورەشى ءبىر كەلىپ ەسكەرتىپ كەتەدى. ونىسىن شىبىن شاققان قۇرلى كورمەگەن ويىنشى ودان ءارى جاقىنداپ, قازىنىڭ ىزاسىن تۋدىرادى. مۇنداي ەركەلىكتى كوتەرەتىن تورەشى بار ما؟ سوزگە كەلمەستەن ەكىنشى سارى قاعازدى قالتاسىنان سۋىردى. باس-اياعى 10 سەكۋندتىڭ ىشىندە قىزىل قاعازدىڭ يەسى اتانعان دي ماريا امالسىز الاڭنىڭ جيەگىنە بەتتەي بەردى. «تەگىس جەردە ءسۇرىندى» دەپ وسىندايدا ايتسا كەرەك. تورەشىنى ارتىنان تۇيگىشتەپ, بالاعاتتاپ جۇرگەن ەندىگى قىلىعى مىناۋ. ەلامان قوڭىر. دەرەك: egemen.kz. سۋرەت: eurosport.ru.