قوستانايدىڭ جاس عالىمدارى وڭتۇستىك كورەيادان تابىسپەن ورالدى

قوستاناي. 11 ناۋرىز. قوستانايداعى مەكتەپ وقۋشىلارى حالىقارالىق «جاس عالىم» بايقاۋىنان تابىسپەن ورالدى. قوستانايلىقتار ءۇش اتالىم بويىنشا جەڭىمپاز اتاندى. ولار ەندى ءوز ونەرتابىستارىن پاتەنتتەۋدى ويلاستىرىپ وتىر. بۇل تۋرالى alau.kz حابارلادى. 11-سىنىپ وقۋشىسى ارمان قابدىشەۆ حالىقارالىق ءبىلىم جارىسىنا وسىمدىك زيانكەستەرىنە قارسى ءوزى ويلاپ تاپقان پرەپاراتىن اپاردى. ارمان قابدىشەۆ: «مەن ويلاپ تاپقان پرەپارات ەكولوگيالىق تازالىعىمەن ەرەكشەلەنەدى, ادام اعزاسىنا زيانسىز. قازىرگى حيميالىق پرەپاراتتار قورشاعان ورتانى لاستايدى», دەدى. 11-سىنىپتاعى ارمان قابدىشەۆ پەن ولاس سۇندەتباەۆ ءوز اتالىمى بويىنشا سۋىرىلىپ العا شىقتى. ولار بايقاۋدىڭ التىن مەدالى مەن ءوز اتىنا جازىلعان ديپلوممەن ماراپاتتالدى. ولجاس سۇندەتباەۆتىڭ جۇمىسى تىم يننوۆاتسيالىعىمەن ەرەكشەلەنىپ, ول العاشىندا جۇرەكسىنگەن بولاتىن. الايدا, ونىڭ تاۋەكەلى ءۇمىتىن اقتادى. ولجاس سۇنداتباەۆ: «كەڭىستىكتە تەپە-تەڭدىكتى ساقتاۋدى ۆەرتولەت قۇراستىرۋدا جانە سمورتفون وندىرىسىندە پايدالانۋعا بولادى» دەيدى. قازىر جاس عالىمدار ءوز جاڭالىقتارىن پاتەنتتەۋ ءۇشىن قۇجاتتار جيناستىرىپ جاتىر. وڭتۇستىك كورەياداعى «جاس عالىمدار» حالىقارالىق بايقاۋىنا قوستانايدان 6 وقۋشى قاتىستى. ونىڭ تورتەۋى تابىسپەن ورالدى. ولار وبلىس ورتالىعىنداعى №7 مەكتەپتىڭ, قازاق-تۇرىك ليتسەيىنىڭ, «وزات» ارىندى بالالار مەكتەبىنىڭ جانە زاتوبول گيمنازياسىنىڭ وقۋشىلارى. ءنازيرا جارىمبەتوۆا. دەرەك, سۋرەت: alau.kz.