ءوزارا ىقپالداستىق ماسەلەلەرى تالقىلاندى

مەملەكەت باسشىسى نۇرسۇلتان نازارباەۆ VIII استانا ەكونوميكالىق فورۋمىنا قاتىسۋعا كەلگەن ليتۆا پرەمەر-ءمينيسترى الگيرداس بۋتكياۆيچيۋسپەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى. كەزدەسۋ بارىسىندا ەكىجاقتى, سونىڭ ىشىندە ساۋدا-ەكونوميكالىق جانە ينۆەستيتسيالىق سالالارداعى ءوزارا ىقپالداستىق ماسەلەلەرى تالقىلاندى. ەلباسى 2007-2009 جىلدارداعى جاھاندىق قارجى-ەكونوميكالىق داعدارىسقا جاۋاپ رەتىندە ۇيىمداستىرىلعان فورۋمعا قاتىساتىنى ءۇشىن ليتۆا پرەمەر-مينيسترىنە العىس ايتتى. – فورۋمعا 90 ەلدەن كەلگەن ءۇش مىڭ دەلەگات قاتىسادى. ءبىز قازاقستاننىڭ ينفرا­قۇرى­لىمدىق جانە يندۋستريالىق دامۋ تۇرعىسىنان قابىلداپ جاتقان شارالارى مەن جۇزەگە اسىرىپ جاتقان وزگە دە باعدارلامالارى تۋرالى ايتپاق نيەتتەمىز, – دەدى مەملەكەت باسشىسى. نۇرسۇلتان نازارباەۆ ەكى ەلدىڭ اراسىنداعى ساياسي ۇنقاتىسۋ مەن ەكونوميكالىق ىن­تى-­ ماقتاستىقتىڭ دەڭگەيى جوعارى ەكەنىن اتاپ ءوتتى. – ليتۆامەن ارقاشان جاقسى قارىم-قاتىناستا بولدىق. ءسىزدىڭ ساپارىڭىز ىنتى­ماقتاستىقتى ودان ءارى كەڭەيتۋگە قىزمەت ەتەدى دەپ ۇمىتتەنەمىن, – دەدى مەملەكەت باسشىسى. ا.بۋتكياۆيچيۋس ەكىجاقتى قارىم-قاتى­ناس­تار­دى نىعايتۋعا جانە دامىتۋعا قوسقان ەلەۋلى ۇلەسى ءۇشىن قازاقستان پرەزيدەنتىنە العىس ايتتى. – قازاقستان ليتۆانىڭ ورتالىق ازياداعى ماڭىزدى سەرىكتەسى بولىپ سانالادى, – دەپ اتاپ ءوتتى ا.بۋتكياۆيچيۋس. ليتۆا پرەمەر-ءمينيسترى, سونداي-اق, نۇر­سۇلتان نازارباەۆتى ەل پرەزيدەنتى لاۋازىمىنا قايتا سايلانۋىمەن قۇتتىقتاپ, قازاقستاننىڭ العا قويعان بارلىق ماقساتتارىنا جەتەتىنىنە سەنىم ءبىلدىردى.