كوممۋنيست سىناقتان ءوتتى

كەشە ورتالىق سايلاۋ كوميسسياسىندا قازاقستان رەسپۋبليكاسىنىڭ پرەزيدەنتتىگىنە كانديداتتاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسياعا سىناق تاپسىرۋى ءارى قاراي جالعاستى. العاشقى بولىپ سىناق تاپسىرۋشى ەرجان سەرعازيننىڭ ناتيجەسىن كوميسسيا توراعاسى مىرزاتاي جولداسبەكوۆ حاباردار ەتتى. «ەرجان مەرەكە ۇلى سەرعازين مىرزانىڭ بۇگىن قازاق تىلىنەن تاپسىرعان سىناعىنىڭ ناتيجەسى مىناداي بولدى. جازبا جۇمىسىنىڭ تاقىرىبى «كونستيتۋتسيا – تۇراقتى دامۋ كەپىلى». ول ەكى بەت جۇمىس جازىپتى. جۇمىستىڭ باس جاعىندا اجەپتاۋىر جاقسى تاريحي دەرەكتەر بار. بىراق, قازىرگى ءبىزدىڭ كونس­تيتۋتسيامىزدىڭ تۇراقتى دامۋ كەپىلدىگى جايى اشىلماي قالعان. ونىڭ ۇستىنە جۇ­مىسىندا 24 قاتە كەتكەن. ەملەسى – 6, تىنىس بەلگىسى – 13, ستيلدىك قاتە – 5. جالپى, كوميسسيانىڭ تالابىن پرەزيدەنتتىكتەن ۇمىتكەرلەر ساۋاتتى جازۋى كەرەك, ساۋاتتى سويلەۋى ءتيىس», – دەدى ول. كانديدات ەكىنشى كەزەڭدە ابايدىڭ پوەزياسى مەن قارا سوزدەرىنەن 3 بەتتىك ءماتىن وقىعان. «شىنىن ايتۋ كەرەك, ەرجان ەجىكتەپ وقىدى. كەيبىر ءماتىننىڭ ماعىناسىن تولىق تۇسىنبەدى. سول ءماتىن ىشىندە كەزدەسەتىن قازاقتىڭ بايىرعى سوزدەرىن, ماسەلەن, قارەكەت, كوكىرەك تازالاۋ سىندى سوزدەردى ءتۇسىندىرىپ ايتا المادى», – دەدى م.جولداسبەكوۆ. كوميسسيا توراعاسىنىڭ ايتۋىنشا, ءۇشىنشى كەزەڭدە «قازاق ونەرىنىڭ بەل-بەلەستەرى» دەگەن تاقىرىپتا 15 مينۋت سويلەگەن ە.سەرعازيننىڭ ويى شاشىراڭقى شىققان. «جالپى, سويلەم قۇراۋى وزگە ءبىر شەتەلدىك ازاماتتىڭ  قازاق ءتىلىن جاڭا ۇيرەنىپ جۇرگەنىندەي ەستىلدى. لوگيكا, جۇيە جوق. وسىنىڭ ءبارىن ەسكەرە كەلىپ, كوميسسيا ەرجان مەرەكە ۇلى قازاق ءتىلىن ەركىن مەڭگەرمەگەن دەگەن قورىتىندى شىعارىپ وتىر», – دەدى ول. ال قازاقستاننىڭ كوممۋنيستىك حالىق پارتياسىنان پرەزيدەنتتىككە كانديدات تۇرعىن سىزدىقوۆ مەملەكەتتىك ءتىلدى جەتىك مەڭگەرگەنىن دالەلدەدى. «ءبىرىنشى سىناقتا «ءبىزدىڭ كۇشىمىز بىرلىكتە» دەگەن تاقىرىپتاعى جازباشا جۇمىس بولدى. تاقىرىپ اشىلعان, 6 قاتە جىبەرىپتى. ونىڭ ىشىندە 3-ەۋى ەملە, 2-ەۋى تىنىس بەلگىسى, 1-ەۋى ستيلدىك قاتە.  ايتايىن دەگەنىم, ل.قويشيەۆادان كەيىن ساۋاتتى, تاقىرىبى اشىلعان جۇمىس وسى سىزدىقوۆ مىرزانىڭ جۇمىسى بولدى», – دەدى م.جولداسبەكوۆ. كوميسسيا توراعاسىنىڭ اتاپ وتكەنىندەي, ەكىنشى كەزەڭدە كانديدات باۋىرجان مومىش ۇلىنىڭ پروزاسىنان ءۇش بەتتىك ءماتىن وقىعان. «جاقسى وقىدى. ءبىز وقىعان ءماتىندى ءتۇسىندى مە, تۇسىنبەدى مە دەگەن ويمەن  بارلىق كانديداتتارعا سۇراق قويىپ ءجۇرمىز. ال سىزدىقوۆ مىرزا ءوزى وقىعان ءماتىندى وتە جاقسى ايتىپ بەردى», – دەدى كوميسسيا توراعاسى. كانديدات ءۇشىنشى كەزەڭدە «استانا – تاۋەلسىزدىك تۇعىرى» تاقىرىبىندا 15 مينۋت ءسوز سويلەگەن. «ءساتتى تاقىرىپ كەلگەن سياقتى. جاقسى جاۋاپ بەردى. كوميسسيا تۇرعىن ىسقاق ۇلى سىزدىقوۆتى مەملەكەتتىك ءتىلدى ەركىن مەڭگەرگەن دەگەن قورىتىندىعا كەلدى», – دەدى م.جولداسبەكوۆ. ورتالىق سايلاۋ كوميسسياسىنىڭ مۇشەسى مارات سارسەمباەۆ مەملەكەتتىك ءتىلدى ەركىن مەڭگەرگەندىگىن انىقتاۋ سىناعىنا كەلمەگەن ۇمىتكەر قايرات مايشەۆقا تاعى ءبىر مۇمكىندىك بەرىلەتىنىن ءمالىم ەتتى. «كانديداتتارىمىزدىڭ ءبىرى مەملەكەتتىك ءتىلدى ەركىن مەڭگەرگەندىگىن انىقتاۋ سىنىنا كەلمەي قالدى. ءبىز قازىرگى ۋاقىتتا بۇل ازاماتتىڭ نە ءۇشىن كەلمەي قالعاندىعىن انىقتاۋ ۇستىندەمىز. ەگەر سىناققا كەلمەۋى شىنايى سەبەپتەردىڭ سالدارىنان بولسا, وندا اتالعان ازاماتتى مەملەكەتتىك ءتىلدى قانشالىقتى دەڭگەيدە مەڭگەرگەندىگىن انىقتاۋ ءۇشىن لينگۆيستيكالىق كوميسسيا سىناعىنا جىبەرۋ تۋرالى شەشىم قابىلدايتىن بولامىز. سودان كەيىن ونىڭ پرەزيدەنتتىكتەن ۇمىتكەر رەتىندە تىركەلۋىنە نەمەسە تىركەۋدەن باس تارتىلۋىنا قاتىستى ناقتى شەشىم قابىلدانادى», – دەدى وسى جونىندە م.سارسەمباەۆ. ءاليسۇلتان قۇلانباي, «ەگەمەن قازاقستان».