ۇلتتىق قۇندىلىقتاردى ۇلىقتايىق

جاستار – تاۋەلسىز ەلىمىزدىڭ بولاشاعى عانا ەمەس, بۇگىنى مەن ەرتەڭىن جاساۋشى دا. ويتكەنى, اعا ۇرپاقتىڭ ەلگە ۇلگى بولار قاي ءىسىن دە بۇگىنگى ءبىلىمدى, بەلسەندى جاس­تار ءىلىپ اكەتىپ, ءوز دەڭگەيىندە اتقارىپ, ءوز زامانداستارىنىڭ كوشىن ىلگەرى باس­تاۋدا. قازىرگى ۋاقىتتا «نۇر وتان» پارتياسى جانىنداعى «جاس وتان» جاستار قاناتىنىڭ نەگىزگى ماقساتى – جاستاردىڭ, سونىڭ ىشىندە, اۋىل جاستارىنىڭ الەۋمەتتىك سۇرانىسىن قاناعاتتاندىرۋ, جاستارعا ارنالىپ جاسالعان مەملەكەتتىك باعدارلامالاردى ناسيحاتتاۋ, ءتۇسىندىرۋ. «نۇر وتاننىڭ» مۇنىڭ الدىنداعى  سەزىندە قابىلدانعان دوكترينادا ۇلتتىق قۇندىلىقتارىمىز بەن ءتول مادەنيەتىمىزدىڭ, قازاقى وتباسى مەن عاسىرلاردان ۇزىلمەي كەلە جاتقان ءداستۇرىمىزدىڭ باسىم باعىت بەرىلۋى بارشانىڭ كوڭىلىنەن شىقتى. دۋالى اۋىزدى اعالارىمىز بۇل باعىتتا كوڭىلگە قونىمدى وي ايتتى. ەلىمىزدە ءار ازاماتتىڭ, اسىرەسە, جاستاردىڭ ءوز دارەجەسىندە ءبىلىم الۋىنا مۇمكىندىك جاسالىپ وتىر. ەلباسى پارتيا سەزىندە جاستارعا ارنايى كوڭىل ءبولىپ, ولاردىڭ ەرىنبەي, جالىقپاي ەڭبەك ەتۋىن, جوعارى ءبىلىم الىپ, ەل يگىلىگىنە قىزمەت ەتۋى ءتيىس ەكەندىگىن باسا ايتتى. جاستار ەلباسىنىڭ بۇل سەنىمىن اقتايتىنى داۋسىز. ءبىز – سان عاسىرلاردان بەرى اڭساعان تاۋەلسىزدىگىمىزدى بەكەم قىلۋعا تالپىنىپ, سول جولدا كوپتەگەن اۋقىمدى ىستەردى اتقارىپ كەلە جاتقان ايبىندى ەلدىڭ ۇرپاعىمىز. ءبىزدىڭ ماقساتىمىز –تاۋەلسىز قازاقستاننىڭ ەگەمەندىگىن ساقتاۋ, ەلىمىزدەگى ىشكى بىرلىكتى نىعايتىپ, ۇلتتار تاتۋلىعىنا سەلكەۋ تۇسىرمەۋ. جاھاندانۋ زامانىندا ءوز ەلىنىڭ تاريحىن, مادەنيەتى مەن ءداستۇرىن, انا ءتىلىن جەتىك مەڭگەرىپ, ونىڭ قاسيەتىن تۇسىنە بىلگەن حالىق قانا ماڭگى جاساي الادى جانە وركەندەۋدىڭ داڭعىل جولىنان اداسپايدى. ءبىزدىڭ باستى قۇن­دىلىعىمىز – ءتول تاريحىمىز, ءما­دەنيەتىمىز, ءتىلىمىز, ءداستۇرلى ءدىنىمىز. بۇل قۇندىلىقتار پارتيانىڭ دوكتري­ناسىندا ايقىن كورىنىس تاۋىپ, انىق جازىلعان. ۇلتىمىزدىڭ ۇرپاقتار ساباقتاستىعى مەن ۇلكەندەرگە قۇرمەت, كىشىگە ىزەت كورسەتۋ تاربيەسى وتباسىندا قالىپتاسادى. سوندىقتان وتباسىلىق تاربيە قازىرگى ۋاقىتتا باستى نازاردا تۇرۋى ءتيىس. بىراق, قازىرگى قازاق وتباسىنداعى اكە مەن انانىڭ مىندەتى, ۇلتتىق تاريبەنىڭ ماڭىزى مەن ناسيحاتتالۋى وتە تومەن دەڭگەيدە ەكەنى جاسىرىن ەمەس. كۇندەلىكتى كەشكى استى بىرگە ىشە وتىرىپ, وتباسىلىق جاعدايلاردى تالقىلاۋ, اتا-انالار تاراپىنان بالالارىنىڭ جاعدايىن سۇراپ وتىرۋ سەكىلدى ادەتكە اينالۋى ءتيىس جايتتار كوپ وتباسىلاردا جوعالىپ كەتكەن. سوندىقتان دا بولار, كوپتەگەن اتا-انا بالالارىنىڭ قايدا, نە ىستەپ, نەمەن اينالىسىپ جۇرگەنىن بىلمەيدى. بۇل جاستار اراسىنداعى جۇگەنسىز ارەكەتتەردىڭ تۋىنداۋىنا سەبەپ بولۋى ىقتيمال جايت. وسى ماسەلەلەردى نەگىزگە ال­عان دوكتريناداعى وتباسىلىق قۇن­دى­لىقتاردى ناسيحاتتاۋ نەگىزىندەگى باسىم باعىتتار قازاق جاستارىنىڭ ءتالىم-تاربيەسىنە ارقاۋ بولارىنا سەنەمىن. دوكترينانىڭ باستى قۇندىلىعىنا ءتول مادەنيەت پەن ۇلتتىق رۋح, حالىقتىڭ باقۋاتتى ءومىر ءسۇرۋى ءۇشىن جاقسى جاعداي جاساۋ ماسەلەلەرىنىڭ باس­تى ورىنعا قويىلۋى دا سول سەبەپتەن. قازاق – ەركىندىكتى سۇيگەن, ەركىندىكتىڭ قادىرىن بىلگەن ۇلى حالىق. سوناۋ تونىكوك پەن كۇلتەگىننەن باستالعان ەرلىك رۋحتىڭ وشپەگەنى حاق. ءبىز ارىدە ايبىندى ابىلاي, بەرىدە ەر يساتاي مەن ءور ماحامبەت اڭساعان ەركىندىكتىڭ ماڭگىلىك جاساۋىنا قىزمەت ەتۋدى ماقسات تۇتىپ, ۇلتىمىزدىڭ ۇلى مۇراتتارى مەن اسقاق ارماندارىن, ۇلتتىق قۇندى­لىقتارىمىزدى قاستەرلەۋ, كەلەشەك ۇرپاققا تولىعىمەن اماناتتاۋدى ىسكە اسىرۋىمىز كەرەكتىگىن بىلەمىز. سول سەبەپتەن, وسىناۋ اسىل مۇراتتى قازاقستان جاستارى, اسىرەسە, قازاقتىڭ ءار بالاسى تولىق سەزىنەدى دەپ ويلايمىن. اسقار بوپىلدىقوۆ, «جاس وتان» جاستار قاناتى اتىراۋ وبلىستىق فيليالىنىڭ اتقارۋشى حاتشىسى, اتىراۋ قالالىق ءماسليحاتىنىڭ دەپۋتاتى.