«نۇر وتان» پارتياسى توراعاسىنىڭ ءبىرىنشى ورىنباسارى اسقار مىرزاحمەتوۆ ايدىن ايىمبەتوۆتى «حالىق قاھارمانى» اتانۋىمەن قۇتتىقتادى.
ەلباسى جارلىعىمەن قازاقستاننىڭ ءۇشىنشى عارىشكەرى ايدىن اقان ۇلى ايىمبەتوۆكە التىن جۇلدىز بەن «وتان» وردەنى تاپسىرىلىپ, «حالىق قاھارمانى» جانە «قازاقستاننىڭ عارىشكەر-ۇشقىشى» قۇرمەتتى اتاعى بەرىلگەنى بەلگىلى. وسىعان وراي, «نۇر وتان» پارتياسى توراعاسىنىڭ ءبىرىنشى ورىنباسارى اسقار مىرزاحمەتوۆ عارىشكەرگە قۇتتىقتاۋ جولدادى:
«عارىش كەڭىستىگىن يگەرۋگە سىڭىرگەن اسا زور ەڭبەگىڭىز بەن باتىرلىعىڭىز ءۇشىن «حالىق قاھارمانى» جانە «قازاقستاننىڭ عارىشكەر-ۇشقىشى» قۇرمەتتى اتاقتارىنىڭ بەرىلۋىمەن شىن جۇرەكتەن قۇتتىقتايمىن! ءسىز وسىناۋ ەرلىگىڭىزبەن قازاق ەلىنىڭ اتاعىن الەمگە ايگىلەپ قانا قويماي, ەلىمىزدىڭ عارىش سالاسىنىڭ دامۋىنا ۇلكەن ۇلەس قوستىڭىز. تاۋەلسىزدىككە قول جەتكەن كۇننەن بەرى ەلباسى ساياساتىمەن قارىشتاپ دامىپ وتىرعان ەلىمىز عارىش كەڭىستىگىن يگەرۋدە دە بيىكتەن كورىنىپ, ءىرى جوبالاردى جۇزەگە اسىرۋدا. سول جەتىستىكتەردىڭ جۇيەلى جالعاسى ىسپەتتى ءسىزدىڭ ساپارىڭىز وسكەلەڭ ۇرپاقتى وتانسۇيگىشتىككە, ماقساتكەرلىككە تاربيەلەۋگە ۇلكەن ىقپال ەتەتىنى ءسوزسىز. حالقىڭىزدىڭ ىستىق ىقىلاسىنا بولەگەن وسىناۋ تولاعاي تابىستارىڭىز كەلەر كۇندەردەگى جەڭىستەرىڭىزگە باستاۋ بولسىن, دەي كەلە, سىزگە زور دەنساۋلىق, جاڭا بەلەستەردىڭ جەتىستىگىن, وتباسىڭىزعا باق-بەرەكە تىلەيمىن!» – دەلىنگەن پارتيا توراعاسى ءبىرىنشى ورىنباسارىنىڭ قۇتتىقتاۋىندا.
«ەگەمەن-اقپارات».
ايدىن بۇل قۇرمەتكە ابدەن لايىق
بارشا قازاق ەلى ءۇشىنشى عارىشكەرىمىز ايدىننىڭ ءساتتى ورالۋىن تىلەپ, الاڭداپ, ءتۇنى بويى كوز ىلمەي, اسىعا كۇتكەندەرى كەشە عانا ەدى. شىن مانىندە ايدىن ۇلتىمىزدىڭ ايبىنىن اسىرىپ, رۋحىن كوتەردى. ەندى مىنە, عارىشكەرىمىزدىڭ باتىر اتاعىن الىپ, ەلباسى جارلىعىمەن «حالىق قاھارمانى» اتانعانى ەلدى تاعى ءبىر قۋانتتى. شىنىندا بۇل وتە ايرىقشا ءمانى بار وقيعا. توقتار اۋباكىروۆ, تالعات مۇساباەۆ سەكىلدى الدىڭعى تولقىن اعالارىنىڭ جولىن جالعاپ, ەلى مەن ۇلتىنىڭ ابىرويىن كوتەرگەن ايدىن ايىمبەتوۆ بۇل قۇرمەتكە ابدەن لايىق. بۇل تەك ايدىننىڭ عانا ەمەس, وسى ەلدىڭ ابىرويىن كوككە كوتەرگەن وقيعا بولدى. ارينە, عارىشقا ءۇشىنشى قازاقتىڭ ۇشۋى ەلباسى نۇرسۇلتان نازارباەۆتىڭ بەدەلى, ىسكەرلىك قاسيەتىنىڭ ارقاسىندا مۇمكىن بولعانىن ءبارىمىز سەزىپ, كورىپ وتىرمىز. الەمدە ەكى جۇزدەن اسا مەملەكەت بار بولسا, سولاردىڭ باسىم بولىگىنىڭ عارىشكەرلەرىن ۇشىرۋعا مۇمكىندىكتەرى جوق ەكەن. ەلباسىمىز ايتقانداي, مۇنداي مۇمكىندىگى بار ەلدەر سيرەك جانە ءبىز وسى مەملەكەتتەردىڭ اراسىندامىز. 1960 جىلى الەمدەگى ەڭ ءىرى عارىش ايلاعى بولىپ سانالاتىن بايقوڭىردىڭ قۇرىلىسى باستالدى. ءدال وسى جەردەن 1961 جىلى ادام جەردىڭ تارتىلىس كۇشىن ەڭسەرىپ, عارىشقا ۇشتى. سودان بەرى ءبىز بايقوڭىردان ۇشقان ادامداردىڭ بارلىعىن ءوزىمىزدىڭ جەرلەستەرىمىزدەي قابىلدايمىز. بۇگىندە قازاقستاننىڭ جەر سەرىكتەرى ماڭىزدى كوممۋنيكاتسيالىق جانە عىلىمي-زەرتتەۋ قىزمەتتەرىن اتقارۋدا. پولكوۆنيك ايدىن ايىمبەتوۆ ساپار بارىسىندا وزىنە جۇكتەلگەن بارلىق مىندەتتى ورىندادى. وسى ماقساتقا بولىنگەن قاراجات ۇزاق مەرزىمدى, كەلەشەكتە ءوزىن اقتايدى جانە ءىس جۇزىندە زور پايدا اكەلەتىن بولادى. ايدىن باتىرىمىزدىڭ «حالىق قاھارمانى» اتانۋى اسىرەسە, جاس ۇرپاقتىڭ, جاستاردىڭ جىگەرىن جانىپ, ۇلكەن ارمانعا جەتەلەپ, قيالىنا كۇش-قۋات بەرگەنى انىق. مۇراتحان شۇكەەۆ, بايزاق اۋدانىنىڭ اكىمى. جامبىل وبلىسى.توقتار مەن تالعاتتىڭ ءىزباسارى
ايدىن ايىمبەتوۆ باۋىرىمىزدىڭ حالىق الدىنداعى بەدەلىنە, ابىرويىنا ارقاشان تىلەكتەسپىز. ويتكەنى, اسپان الەمىندە جۇمىس ىستەۋ وڭاي ەمەس. ۇشۋ ساپارى تولىق دايىندىقتى, مۇقيات ازىرلىكتى قاجەت ەتەدى. بۇل – كەز-كەلگەن ادام تۇرماق, كاسىبي ۇشقىشتاردىڭ ماڭدايىنا جازىلا بەرمەيتىن باقىت. ارينە, عارىش عالاماتىن يگەرۋگە مەملەكەتتىك دەڭگەيدە ءمان بەرىلەدى. بۇل وتە ۇلكەن جاۋاپكەرشىلىك دەگەن ءسوز. ەكىنىڭ ءبىرى شىداس بەرە بەرمەيتىن وسىنداي ساپاردان امان-ەسەن ورالعان ايدىن باۋىرىمىزعا بەرىلگەن «حالىق قاھارمانى» اتاعى قۇتتى بولسىن! ول – قازاقستاننىڭ جوعارى ماراپاتىنا ابدەن لايىق تۇلعا. تاۋەلسىزدىكتىڭ شيرەك عاسىرىنا جۋىق ۋاقىتتا ورىندالعان وتاندىق عارىش ساپارىن جۇزەگە اسىرۋدا مەملەكەت باسشىسى نۇرسۇلتان نازارباەۆتىڭ ەڭبەگى زور. ەلباسى رەسەي فەدەراتسياسىمەن ءتيىمدى كەلىسىمدەر جۇرگىزە وتىرىپ, مەملەكەت مەرەيىن ارتتىرعان مارتەبەلى جۇلدىزدى جول ساپارىنا قول جەتكىزدى. بۇل وقيعا قازاقستاننىڭ عارىشتى باعىندىرۋ تاريحىندا التىن ارىپتەرمەن جازىلاتىن بولادى. باعلان رايىمحانوۆ, قازاقستاننىڭ ەڭبەك سىڭىرگەن جاتتىقتىرۋشىسى. وسكەمەن.باتىرعا لايىق باعا
تاعى ءبىر ۇلانىمىز عارىشقا سامعاپ, ەلىمىزدىڭ ەڭسەسىن كوتەرىپ, حالقىمىزدىڭ ابىرويىن اسقاقتاتقانى كۇنى كەشە عانا. مۇندا ەلباسى نۇرسۇلتان نازارباەۆتىڭ رەسەي الدىنداعى بەدەلى مەن ىقپالىنىڭ زور ەكەنىن دە ايتۋ ءلازىم. تاڭداۋدىڭ ايدىڭ ايىمبەتوۆكە ءتۇسۋى دە تەگىن ەمەس. ول بۇرىن دا عارىشكەرلەر دايىندىعىنان ءوتىپ, انە-مىنە ۇشادى دەپ ايتىلىپ جۇرگەن ازامات بولاتىن. قازاق عارىشكەرى ەلباسى سەنىمىن اقتادى, الدىنا قويىلعان مىندەتتەردى ابىرويمەن ورىنداپ, جەرگە امان-ەسەن ورالدى. بۇل – تەك ۇلتىن سۇيگەن, ەلىنە قىزمەت ەتۋدى باستى ماقسات ەتكەن ادامنىڭ عانا قولىنان كەلەتىن ءىس, وتانعا قالتقىسىز قىزمەت ەتۋدىڭ ەرەن ۇلگىسى. وسىنداي جولدان مۇدىرمەي ءوتىپ, باتىرلىق پەن باتىلدىق, بىلىكتىلىك پەن بىلىمدىلىك كورسەتكەن عارىشكەر ۇلانىن حالقى قۇرمەتپەن قارسى الىپ, الاقانىنا سالىپ ايالاۋى وتە ورىندى. ەلباسىنىڭ عارىشكەر ايدىن ايىمبەتوۆكە «حالىق قاھارمانى» اتاعىن بەرۋى, التىن جۇلدىز بەن «وتان» وردەنىن تاپسىرۋى بارشا قازاقستاندىقتاردى قۋانىشقا بولەدى. ءبىزدىڭ مەرەيىمىز ءوسىپ, باتىرعا لايىق باعالاۋ ەكەنىن تۇسىندىك. ەلىنىڭ مەرەيىن وسىرگەن ۇلتىمىزدىڭ ۇلانى مۇنداي جوعارى اتاققا ابدەن لايىق. الدىڭعى تولقىن قازاق عارىشكەرلەرى توقتار اۋباكىروۆ پەن تالعات مۇساباەۆ سالعان باتىرلىق پەن باتىلدىق جولىن لايىقتى جالعاستىرا ءبىلدى. ارتىندا نامىسىن جىرتىپ قالىڭ ەلى تۇرعانىن ايدىن ءىنىمىز ايقىن سەزىندى. ءسويتىپ, ول عارىش كەڭىستىگىنە ءوز جولىن سالىپ قانا قويماي, قازاقستاندى عارىشكەرلەرى ۇشتەن كەم ەمەس الەمدەگى توعىز ەلدىڭ قاتارىنا قوستى. بۇل – تاڭعاجايىپ تابىس, تالاسسىز تاريحي وقيعا. مۇندايدا كەۋدەڭدى ماقتانىش سەزىمى كەرنەپ, عارىشكەر ايدىن ايىمبەتوۆ پەن ونىڭ عارىش كەڭىستىگىن يگەرۋگە قوسقان زور ۇلەسى مەن باتىرلىعىن باعالاي بىلگەن ەلباسى نۇرسۇلتان نازارباەۆقا العىس سەزىمىمىزدى ءبىلدىرىپ, يگى تىلەگىمىزدى ايتۋدى ازاماتتىق پارىزىمىز سانايمىز. جاسا, كوك بايراقتى قازاقستان, جاسا قازاقتىڭ باتىر ۇلاندارى دەۋ ورىندى مۇندايدا. ىزباسقان ايماعامبەتوۆ, قازاقستان رەسپۋبليكاسىنىڭ ەڭبەك سىڭىرگەن دارىگەرى. اقتوبە وبلىسى.
