«جاستار ءۇنى» ۇلت رۋحانياتىنا ءۇن قوسادى

استانا كۇنىنە وراي, ەلوردا اكىمدىگى جانە تىلدەردى دامىتۋ باسقارماسىنىڭ قولداۋىمەن «جاستار ءۇنى» اكتسياسى وتكىزىلدى. ءىس-شارانىڭ ماقساتى − ەلىنىڭ بولاشاعى ءوز قولدارىندا ەكەنىن جاس ۇرپاقتىڭ ساناسىنا ءسىڭىرۋ, جاستار اراسىنداعى بىرلىكتى نىعايتۋ ارقىلى قازاق ءتىلىنىڭ مارتەبەسىن ارتتىرىپ قانا قويماي, قولدانىس اياسىن كەڭەيتۋ. قازاقتىڭ ءتول مادەنيەتىنىڭ جاڭعىرۋىنا سەپ­تىگىن تيگىزەتىن بۇل جوبانىڭ جاستار اراسىن­داعى سالماعى زور بولىپ وتىر. «تاۋەلسىزدىگىمىزدىڭ سيمۆولى ىسپەتتى بولعان استانا بارلىق جەتكەن جەتىستىكتەرىمىزدىڭ كورسەتكىشىنە اينالدى. ول تەك اسەم عيمارات­تارمەن شەكتەلمەيدى, ول بويىمىزداعى وتان­شىلدىعىمىز بەن قازاقي رۋحىمىزدى, ءتىلىمىز مەن ءداستۇرىمىزدى قۇرمەت تۇتۋىمىزدا. ءاربىر قازاقتىڭ بويىندا وسىنداي قاسيەتتەر تۇنىپ تۇرعاندا تاۋەلسىزدىگىمىز ماڭگى باياندى بولادى», دەيدى ونەرلى ورەل, قوعام قايراتكەرى بەكبولات تىلەۋحان شارا بارىسىندا. جىل سايىنعى داستۇرگە اينالعان بۇل ءىس-شارادا «دومبىرا كەشى» ۇيىمداستىرىلىپ, جاستار اراسىندا ۇلتتىق ونەر ۇلىقتالدى. سونىمەن قاتار, قازاقستاننىڭ تانىمال ەسترادا جۇلدىزدارى اشىق اسپان استىندا ونەر كورسەتىپ, مەرەكە قارساڭىندا كوپشىلىككە تاماشا كوڭىل كۇي سىيلادى. دينارا دوسپان.