كونترابانداشىلارعا قاتىستى ۇكىم زاڭدى كۇشىنە ەندى

استانا. 15 قازان. جامبىل وبلىسىنىڭ مەركە اۋدانىندا تاۋارلار كونترابانداسىمەن اينالىسقان ترانسۇلتتىق قىلمىستىق توپتىڭ مۇشەلەرىنە قاتىستى ۇكىم زاڭدى كۇشىنە ەندى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى. باس پروكۋراتۋرانىڭ ارنايى پروكۋرورلارى تەرگەگەن وسى قىلمىستىق ءىس بويىنشا قۇرامىندا 4 شەكارا قىزمەتكەرى بار قازاقستان مەن قىرعىزستاننىڭ 22 ازاماتى سوتقا بەرىلدى, ولار شەكارا ارقىلى حالىق تۇتىناتىن تاۋارلاردى زاڭسىز تاسىمالداعان. وسى توپتى بيىلعى ءساۋىر ايىندا 14 جۇك اۆتوكولىگىمەن شەكارانى زاڭسىز كەسىپ وتكەن كەزدە شەكارا قىزمەتى ۇستادى. ساراپتاما قورىتىندىسى بويىنشا, حالىق تۇتىناتىن تاۋارلاردىڭ كەدەندىك قۇنى 162 ملرد. تەڭگەنى قۇرادى. كونتراباندالىق تاۋارلاردىڭ بارلىعىنا تىيىم سالىندى. ءۇش ايدان استام ۋاقىت بويىنا ءبىرىنشى ساتىداعى سوتتا ەكى پروكۋرور مەملەكەتتىك ايىپتاۋدى قولداپ, ۇيىمداسقان قىلمىستىق توپ مۇشەلەرىنىڭ كىناسىن دالەلدەدى. مامانداندىرىلعان اۋدانارالىق اسكەري سوتتىڭ 2015 جىلعى 24 شىلدەدەگى ۇكىمىمەن سوتتالۋشىلار ءارتۇرلى مەرزىمدەگى جازاعا سوتتالدى. زاتتاي ايعاق رەتىندە تانىلعان حالىق تۇتىناتىن تاۋارلارى بار 14 جۇك اۆتوكولىگى مەملەكەت كىرىسىنە تاركىلەندى. ايدار ورىسباەۆ. دەرەك, سۋرەت: باس پروكۋراتۋرانىڭ ءباسپاسوز قىزمەتى.