«تۇركسوي باس حاتشىلىعىنىڭ كوميسسياسى 2014 جىلدىڭ قورىتىندىسى بويىنشا ءسىزدى حالىقارالىق تۇركسوي ءباسپاسوز سىيلىعىنىڭ لايىقتى يەگەرى دەپ باعالاعانىن قۋانىشپەن حابارلايمىن» – «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ پرەزيدەنتى ساۋىتبەك ابدراحمانوۆتىڭ اتىنا تۇركسوي باس حاتشىسى دۇيسەن قاسەيىنوۆتەن اقپاننىڭ باسىندا كەلگەن حات وسىلاي باستالاتىن.
بۇل سىيلىق ەڭ الدىمەن ەل گازەتىنىڭ بەتىندە تۇركى دۇنيەسىنىڭ تۇتاستىعىن قامداعان ماتەريالداردىڭ, ودان كەيىن سىيلىق يەگەرىنىڭ تۇركىتىلدەس مەملەكەتتەردەن جازعان ماقالا, رەپورتاجدارىنىڭ باعاسى دەپ بىلگەن ورىندى.
تاياۋدا دۇيسەن قاسەيىنوۆ استاناعا ىسساپارمەن كەلىپ, اتالعان سىيلىقتى بەلگىلى قالامگەرگە تابىس ەتتى. سىيلىق تاپسىرۋ راسىمىنە قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى قاتىستى.
سىيلىقتا BIRLIKTE DIRLIK VARDIR دەگەن تۇرىك ماقالى ويىلىپ جازىلعان. بۇل كادىمگى قازاقتاعى «بىرلىك بار جەردە تىرلىك بار» دەگەن ماقالدىڭ ناق ءوزى ەكەندىگىن ايتقان دۇيسەن قاسەيىنوۆ باس باسىلىم بەتىندە تۇركى مادەنيەتىنىڭ حالىقارالىق ۇيىمىنىڭ قىزمەتى الداعى كەزدە دە جان-جاقتى كورسەتىلە بەرەدى دەگەن سەنىمىن ءبىلدىردى. ساۋىتبەك ابدراحمانوۆ حالىقارالىق تۇركى اكادەمياسىمەن بىرلەسىپ «تۇركى دۇنيەسى: تۇلعالار تاعىلىمى» اتتى جاڭا جوبا قولعا الىنعانىن, ونىڭ اياسىندا ءبىزدىڭ ورتاق بابالارىمىز, بۇگىنگى بارشامىزعا ماقتانىش زامانداستارىمىز تۋرالى تانىمدىق ماقالالار جۇيەلى جاريالانىپ تۇراتىنىن جەتكىزدى.
«ەگەمەن-اقپارات».
