بۇل كۇندەرى وڭتۇستىكتە وسىنشاما جاڭا نىسان اشىلىپ, جۇمىس ىستەي باستادى
استانا – اسقاق ارماننىڭ ايناسى ءارى ايعاعى.
استانا – تاۋەلسىزدىكتىڭ تىرەگى, ەلدىڭ ەڭسەسى, ەگەمەندىكتىڭ ەرتەڭى, مەملەكەتتىڭ مەرەيلى مارتەبەسى, بولاشاقتىڭ باعدارشامى.
استانا – جاسامپازدىقتىڭ, جىگەرلىكتىڭ, جاراسىمدىلىقتىڭ جاڭا جۇلدىزى.
استانا – ءتۇرلى ءدىني كونفەسسيالاردىڭ, الا كوز بولعان مەملەكەتتەردىڭ تومسىرايىپ كەلىپ, كەلەلى جيىننان سوڭ جاراسىپ, جادىراسىپ قايتاتىن رۋحاني كەلىسىم ورتالىعى.
ارينە, استانا – ەلىم دەگەن ەلباسىنىڭ ەرەن ەڭبەگىنىڭ تاعى ءبىر تاريحي جوباسى, جەڭىسى.
بۇكىل الەم مويىنداعان, سان قيلى ماسەلەلەرىن كەلىسىپ وتىرىپ شەشىپ الاتىن استانا جايلى ايتار ءسوز كوپ.
ەلباسىنىڭ پاراساتتى ساياساتىنىڭ ارقاسىندا قازاقستاننىڭ قارقىندى قادامى تەك قانا استانادان ەمەس, سونىمەن قاتار, وڭىرلەردىڭ وركەندەۋىنەن دە كورىنىپ وتىر. وسىنىڭ انىق ايعاعى ۇلىستىڭ ۇيىتقىسى اتانعان وڭتۇستىك قازاقستان وبلىسىنىڭ بۇگىنگى كورسەتكىشتەرى.
استانا كۇنىنە قانداي تارتۋ-تارالعى جاساساڭ دا جاراسادى. سوندىقتان, قاشاندا ۇلىستىڭ ۇيىتقىسى مىنەزىمەن دارالانعان وڭتۇستىك قازاقستان وبلىسى وسى مەرەكەگە لايىقتى ءمان بەرىپ, اكتسيا وتكىزۋدى جوسپارلاعان.
ەلباسىعا قاشان دا قىزۋ قولداۋ كورسەتىپ كەلە جاتقان, ىستىق ىقىلاسىن ءبىلدىرىپ وتىرعان وڭتۇستىكقازاقستاندىقتار استانا كۇنىنە وراي ءوز ريزاشىلىقتارىن تاعى دا جەتكىزىپ وتىر. ول – 75 الەۋمەتتىك نىسانداردىڭ اشىلۋى.
بۇل كۇندەرى سالتاناتتى اشىلىپ جاتقان نىساندارعا رەتىمەن توقتالاتىن بولساق, ءبىلىم, دەنساۋلىق ساقتاۋ, مادەنيەت, سپورت سالالارىندا 22 نىسان پايدالانۋعا بەرىلىپ جاتىر. بۇل كۇندەرى 18 مىڭ ادامدى قامتىعان جەتى ەلدى مەكەندە 8 اۋىزسۋ قۇبىرلارى ىسكە قوسىلدى.
بۇل كۇندەرى جالپى كولەمى 19 مىڭ شارشى مەتر 339 پاتەرلىك 5 تۇرعىن ۇيدە قونىس تويى تويلانۋدا.
بۇل كۇندەرى 14 ەلدى مەكەندەگى 37 مىڭ ادامنىڭ شاڭىراعىنا كوگىلدىر وتىن كىرگىزىلدى.
بۇل كۇندەرى ەلباسى تاپسىرماسىنا سايكەس ءىرى مەگاپوليسكە اينالىپ كەلە جاتقان شىمكەنتتە 2 ۇلكەن ەلەكتر ستانساسى 300 مىڭ حالىقتى جارىقپەن قامتاماسىز ەتىپ, تۇرمىستى جاقسارتىپ وتىر.
شاعىن جانە ورتا بيزنەستى دوڭگەلەتىپ وتىرعان وڭتۇستىك وسى ماڭىزدى سالانى بۇدان ءارى دامىتۋ ءۇشىن بارلىق اۋدان, قالا ورتالىقتارىنان تيپتىك جوبادا 14 كاسىپكەرلەرگە قىزمەت كورسەتۋ ورتالىقتارى مەن كاسىپكەرلىك مەكتەپتەرىن اشىپ وتىر. ۇدەمەلى يندۋستريالىق دامۋ باعدارلاماسىنداعى ءاربىر بەسىنشى جوبا دا وڭتۇستىكتىڭ ۇلەسىندە ەكەنى بەلگىلى.
وسى كۇندەرى ونەركاسىپكە بايلانىستى جاڭا 4 كاسىپورىن ىسكە قوسىلۋ جاعدايىندا.
استانا كۇنىنە تارتۋ رەتىندە اشىلىپ وتىرعان 75 نىساننىڭ ارقايسىسىن سيپاتتاماي قىسقاشا قايىرعاندا بارلىق سالانىڭ قامتىلىپ وتىرعانىن ايتۋعا بولادى.
بۇل – مەملەكەتتىك كومەك, ەلباسىنىڭ تىكەلەي تاپسىرماسىمەن قولعا الىنىپ, حالىق يگىلىگىنە ۇسىنىلعان سۇبەلى ەڭبەك, قولدا باردى جاقسى ۇقساتقان جەرگىلىكتى بيلىكتىڭ ەلمەن بىرگە اتقارعان جەمىستى جۇمىسى.
بۇل – قازاقتىڭ اسەم ەلورداسىنا وڭتۇستىكقازاقستاندىقتاردىڭ لايىقتى تارتۋى.
جاقسى اعاعا كىشىپەيىل ءىنىنىڭ سىيلاستىعىنداي كىشىلىك, كىسىلىك, ىزەت, مەرەيتويعا قۇرمەت. وڭتۇستىك حالقىنىڭ كوكەيكەستى تالاي پروبلەمالارى تاماشا شەشىلگەن كۇندەر وسىنداي جاقسىلىعىمەن ەستە قالماق.
جاقىندا الىپ تيان-شان تاۋىنىڭ ەتەگىندە وتىرعان تولە بي اۋدانىنىڭ تۇرعىندارى ۇلكەن قۋانىشقا كەنەلدى. قۋانىش دەگەندە ارقايسىسى ات باسىنداي التىن تاۋىپ العان جوق, بىراق تۇرعىنداردىڭ ريزالىق سەزىمىن ەشقانداي قازىنا تولتىرا المايتىن ەدى.
اۋىلدارعا گاز كەلدى. ەلدى مەكەندەردە سۋ وتكىزگىش جەلىلەردىڭ قۇرىلىسى اياقتالدى.
زەرتاس, جاڭاكۇش, تاعاينا, بەينەتكەش, ىنتىماق, جاڭاجول, الىشەر ناۆوي, الاتاۋ, قوساعاش, ەكپىندى, شۇباراعاش, بىركولىك اۋىلدارىنىڭ ايەلدەرى ىس باسقان پەشتەرىن تاستاپ, تاماقتارىن كوگىلدىر وتىنعا ءپىسىردى.
تولە بي اۋدانىندا ءبىر كۇندە 24 نىساننىڭ ىسكە قوسىلۋىنا بايلانىستى سالتاناتتى ءىس-شارا ءوتتى.
قاراقۇرىم كوپتىڭ الدىندا وبلىس اكىمى اسقار مىرزاحمەتوۆ ءسوز سويلەدى.
قارجى داعدارىسى «مەن مىقتىمىن» دەيتىن تالاي مەملەكەتتەردىڭ اياق الىسىن اۋىرلاتىپ وتىرعان ۋاقىت.
كوپتەگەن مەملەكەتتەر ەسكىسىن ءىلدالاۋعا سىنىق شەگە تاپپاي ءجۇر.
ال وڭتۇستىكتىڭ شارۋاسى شاعىن ءبىر اۋدانىندا عانا 24 نىسان پايدالانۋعا بەرىلدى.
«وسىنىڭ ءبارى ەلباسىنىڭ سىندارلى ساياساتىنىڭ جەمىسى, – دەدى وبلىس اكىمى. – بۇگىندە دامۋدىڭ داڭعىل جولىنا تۇسكەن مەملەكەتىمىزدىڭ جەتىستىكتەرى بولاشاقتى بولجاي بىلەتىن ءارى ۋاقىتىندا باتىل شەشىم قابىلداي بىلەتىن ەلباسىمىزدىڭ ارقاسى. كەشەگى پرەزيدەنتتىك سايلاۋدا وڭتۇستىكقازاقستاندىقتاردىڭ 98,4 پايىزدان ارتىق داۋىس بەرۋى مەملەكەت باسشىسىنىڭ اتقارىپ وتىرعان ساياساتىنا بىلدىرىلگەن العىس دەپ بىلەمىز. ءبىر اۋداندا استانا كۇنىنە وراي 24 نىسان پايدالانۋعا بەرىلىپ جاتسا, مەملەكەتىمىزدىڭ كەمەلدىگىنىڭ بەلگىسى. باردى باعالاي بىلەيىك, قۋانىشتارىڭىز قۇتتى بولسىن!», – دەدى.
ەسىمىزگە بالالىق شاق تۇسكەن. مىناۋ گەرمانيا دەگەن مەملەكەتتە قوناق شاقىرار بولسا ءبىر اپتا بۇرىن ەسكەرتىپ, وتىرار ۋاقىتىنىڭ ساعات, مينۋتىنا دەيىن كەلىسىپ الادى. بىزدەگىدەي تايقازان قايدا, ءبىر شىنىاياق كوفە, بىرەر ءتىلىم بۋتەربرودپەن قوناعىن جايعاپ, ءبىر-بىرىنە مىڭ مارتە راحمەت ايتىپ كەتەدى. قازاقتىڭ قۇدايى قوناعى قاشان كەلەتىنىن ءوزى دە بىلمەيدى عوي. بىلەتىنىمىز, كەشقۇرىم, كەيدە ءتۇن ورتاسى اۋا ساۋ ەتىپ كىرىپ كەلەدى. اكەي استىمىزعا موتوتسيكل تارتىپ, قويعا جىبەرەدى. شەشەمىز جالپىلداق وتىندى جارق ەتكىزىپ, ەسىك الدىنداعى پەشكە وت جاعادى. تەزەك, كومىر جەتكىزىپ بەرەمىز, ساماۋىر تۇتاتىلادى. جالپىلداعان وت, كومىردىڭ اششى يىسىنە تۇنشىعا ءجۇرىپ شەشەمىز ەت پىسىرەدى. ايايسىڭ. شىركىن-اي, وسى اۋىلعا قاشان گاز كەلەر ەكەن دەپ. ءالى كەلگەن جوق. قازىر شەشە ورنىندا كەلىن قازان قايناتىپ ءجۇر. بىراق, زامان وزگەرگەن سايىن قوناققا بارۋ, كەلۋ وزگەرگەن بە, باياعىداي جانتالاس جوق.
مىنە, ەندى تولە بي اۋدانىنىڭ انالارى, كەلىندەرى كۇيەلەش-كۇيەلەش بولىپ ىس باسقان قازاندى جاعالاپ جۇرمەيدى. يىناعاشپەن بەلى ۇزىلە جازداپ, قارى تالىپ بۇلاقتان سۋ تاسىمايدى.
گاز ۇيگە كەلىپ تۇر. سۋ ۇيگە كەلىپ تۇر. بۇدان ارتىق نە كەرەك. جالپى, وڭتۇستىك ۇلىستىڭ ۇيىتقىسى ەكەندىگىن ءاردايىم كورسەتىپ كەلەدى.
قازاق ءۇشىن قاشاندا وڭتۇستىكتىڭ ورنى ەرەكشە عوي. 1986 جىلى تەڭدىك سۇراعان جاستاردى شەتىنەن ۇرىپ سوعىپ, وقۋىنان ايىرعان زورلىقشىل كەڭەس يمپەرياسى قازاق زيالىلارىنا دا قىرعيداي تيگەن. ەلگە جانى اشىعانى قۋدالاندى, قىزمەتىنەن الىندى.
وسىنداي قيىن ۋاقىتتا قازاق زيالىلارى جينالىپ نە ىستەمەككە كەڭەسكەن ەكەن. ەشكىمدە ءۇن جوق. ايتارعا اقىل, سويلەرگە ءسوز جوق. – اۋ, ءابىش, ىشىمىزدەگى ءسوز ۇستاعان مارعاسقامىز سەن ەدىڭ, سەن نە اقىل بەرەسىڭ؟ دەيدى ءبىرى ءابىش كەكىلباەۆقا قاراپ.
سوندا وكتەمشىل بيلىكتىڭ قازاققا ىستەگەن قياناتىنا قانى قارايىپ وتىرعان اعامىز «جىگىتتەر, ءبارىمىز شىمكەنتتىڭ ەتەگىنەن ۇستايىق. جاعاعا ءوزى الىپ شىعادى» دەپ قىسقا قايىرعان ەكەن.
قازاق قينالسا ارقاسىن سۇيەيتىن وڭتۇستىكتىڭ قادىرىن وسىدان-اق بىلە بەرىڭىز.
بىراق, وسى وڭتۇستىكتىڭ باسقا وڭىرلەرگە قاراعاندا پروبلەماسى شاش-ەتەكتەن ەدى. التىن قۇرساق وبلىس رەسپۋبليكا حالقىنىڭ بەستەن ءبىرىن قۇراسا دا ەش وبلىستا جوق ءۇش, ءتىپتى, ءتورت اۋىسىمدىق مەكتەپ, ساماننان تۇرعىزىلا سالعان ءبىلىم وشاقتارى وڭتۇستىكتە كوپ ەدى. قارجى از قارالعان, ينۆەستيتسيا تارتىلماعان. قول قىسقا بولعان. بۇگىندە قازاقستاننىڭ ەكونوميكاسىنىڭ داۋىرلەپ, الەۋەتىنىڭ ارتقانىن وڭتۇستىكتىڭ ءوسۋ ديناميكاسىنان ايقىن اڭعارۋعا بولادى. ءبىز مۇنى جەكەلەگەن سالالارداعى اتقارىلعان جۇمىستاردى زەردەلەۋ بارىسىندا ايقىن اڭعاردىق. ماسەلەن, ءبىلىم بەرۋ سالاسى بويىنشا بيىل 101 نىساننىڭ قۇرىلىسى جۇرگىزىلۋدە. جىل سوڭىنا دەيىن 67 نىساندى ىسكە قوسۋ جوسپارلانىپ, بۇگىنگى تاڭدا 19-ىنىڭ قۇرىلىسى اياقتالدى.
2015 جىلى 1 511 مەكتەپكە دەيىنگى مەكەمەلەردە جالپى 164,7 مىڭ بالا, ونىڭ ىشىندە «بالاپان» باعدارلاماسى اياسىندا 3 جاس پەن 6 جاس ارالىعىنداعى 152,6 مىڭ بالانى ورنالاستىرۋ جانە قامتۋ دەڭگەيى 77,7 پايىز بولىپ جوسپارلانعان. جىل باسىنان 1 451 مەكتەپكە دەيىنگى مەكەمەدە جالپى 156,8 مىڭ بالا, ونىڭ ىشىندە 3 جاس پەن 6 جاس ارالىعىنداعى 147,8 مىڭ بالا تاربيەلەنۋدە جانە قامتۋ دەڭگەيى 77,4 پايىزعا جەتىپ وتىر.
دەنساۋلىق ساقتاۋ سالاسى بويىنشا بيىل 25 نىساننىڭ قۇرىلىسى جۇرگىزىلۋدە. جىل سوڭىنا دەيىن 23-ءىن ءبىتىرۋ كوزدەلۋدە.
مادەنيەت سالاسى بويىنشا بيىل 13 نىساننىڭ قۇرىلىسى جۇرگىزىلۋدە, ال سپورت سالاسى بويىنشا بيىل 10 نىساننىڭ قۇرىلىسى جۇرگىزىلىپ, ناتيجەسىندە 8 نىسان پايدالانۋعا بەرىلەدى.
تولە بي اۋدانىندا بۇگىنگى تاڭدا 7 ەلدى مەكەندە اۋىزسۋ قۇبىرى جاڭارتىلىپ, 18 مىڭ حالىق ساپالى اۋىزسۋمەن قامتاماسىز ەتىلدى. سونىمەن قاتار, 1 ماگيسترالدى سۋ اققىنىڭ قۇرىلىسى اياقتالدى. جالپى, اۋىزسۋمەن قامتىلعان ەلدى مەكەندەر سانى 51-گە جەتىپ, 108,9 مىڭ حالىقتى, قامتۋ كورسەتكىشى 93 پايىزدى قۇرادى.
2015 جىلى وبلىستا 28 اۋىزسۋ نىساندارىنىڭ قۇرىلىسى جۇرگىزىلىپ, جىل سوڭىنا دەيىن 15 نىسان پايدالانۋعا بەرىلەتىن بولادى.
بيىل تولە بي اۋدانىندا 13 ەلدى مەكەنگە گاز قۇبىرى تارتىلىپ, 37 مىڭ ادام تابيعي گازعا قوسىلدى جانە قامتۋ دەڭگەيى 55 پايىزعا جەتەدى.
وبلىستا 2015 جىلى جالپى 41 ەلدى مەكەندى گازداندىرۋ قۇرىلىسى ءجۇرگىزىلىپ, جىل سوڭىنا دەيىن 20 ەلدى مەكەن نەمەسە 92 مىڭ ادام گازبەن قامتىلاتىن بولادى.
بيىل 69 تۇرعىن ءۇيدىڭ قۇرىلىسى جۇرگىزىلىپ, 43-ءىن پايدالانۋعا بەرۋ جوسپارلانعان. بۇگىنگى تاڭدا 5 ءۇيدىڭ قۇرىلىسى اياقتالدى.
وڭتۇستىكتە وسىنداي ىرگەلى ىستەر اتقارىلىپ جاتىر. وسى ماقالانى جازاردا وبلىستا بەس جىل كولەمىندە اتقارىلعان جۇمىستاردى دا جۇلگەلەپ, باستى-باستى سالالار بويىنشا ساراپتاما جۇرگىزىپ كوردىك. ءبىر سوزبەن ايتقاندا, وبلىستىڭ ەكونوميكاسى 2,5 ەسە وسكەن ەكەن.
وڭتۇستىك شاعىن جانە ورتا كاسىپتەن دە, باۋ-باقشا, كوكونىس وندىرۋدەن دە رەسپۋبليكامىزدىڭ الدى بولىپ وتىر.
وبلىستاعى ەتنومادەني ورتالىقتاردىڭ وكىلدەرى دە استانا كۇنى قۇرمەتىنە ەل يگىلىگىنە بەرىلىپ جاتقان نىسانداردىڭ جۇمىسىنا ءبىر كىسىدەي اتسالىسىپ, حالىق قۋانىشىن ءبولىسىپ جاتىر.
ءۇش ميلليونعا جۋىق حالقى بار وڭتۇستىكتە تاعدىر-تالايىمەن قازاقستاننان ءدام بۇيىرعان 108 ەتنوستىڭ وكىلدەرى تۇرادى. ەركىنەن تىس دەپورتاتسيالانىپ, ساياسي قۋعىن-سۇرگىن كورگەن دياسپورالاردىڭ وكىلدەرى دوسقا قۇشاعى اشىق, كوڭىلى كەڭ قازاق حالقىنا باۋىر باسىپ, اعايىنىم, قورعانىم دەپ بىلەدى.
وسىنداعى يران ەتنومادەني ورتالىعىنىڭ توراعاسى كاپار پۋر «وڭتۇستىك ءبىزدىڭ تاريحي وتباسىمىزعا اينالدى. باسقا باقىت ىزدەپ يرانعا كەتۋ ويىمىزدا جوق. بۇرىن ولار قازاقستان جايلى كوپ بىلمەيتىن ەدى. قازىر مەملەكەت باسشىسى نۇرسۇلتان نازارباەۆتىڭ ارقاسىندا قازاقستان الەمگە تانىمال بولعاندىقتان قىزىعا قارايتىن بولدى.
قيىن تاعدىر كەزىندە ءبىزدىڭ اتالارىمىزدى يران مەملەكەتىنەن اۋلاقتاتتى, بىرگە تۋعان اعايىندار شەكارانىڭ ەكى جاعىندا قالىپ كەتتى. ەس ءبىلىپ, ەتەگىمىزدى جيعان سوڭ اكەلەرىمىزدىڭ اماناتىن ورىنداپ, يرانداعى اعايىن-تۋعاندى تاپتىق. قاتىسىپ تۇرامىز. يراننىڭ حالقى ۇلكەن, جەرى تار. تاۋ-تاستى جەردى دە قالىنشە يگەرىپ, وتباسىن اسىراپ وتىرعاندار كوپ. بىردە اكەمنىڭ اتالاس تۋىستارىن قازاقستانعا شاقىردىم. استاناعا اپارۋ ءۇشىن ۇشاققا ەمەس, ادەيى پويىزعا بيلەت الدىم. ۇشان-قيىرى بىتپەيتىڭ كەڭ دالا. اكەمنىڭ ءىنىسى, بۇگىندە ۇلكەن اقساقال ەكى كوزىن تەرەزەدەن المايدى. «قۇداي-اۋ, مىنانىڭ ءبارى قازاقستاننىڭ جەرى مە؟! اللا قازاققا مول نەسىبە بەرگەن ەكەن. ەستەرىڭ بولسا, بالا-شاعاڭا ايت, مىناداي قۇت-مەكەننەن ىرگە اۋدارماسىن», دەدى. رەسەيدە تۇراتىن قانداستارىمىز قازاقستاندا ءومىر سۇرگەن جاقسى عوي دەيدى. ونى ءوزىمىز دە بىلەمىز. جۇرەگى جىلى وڭتۇستىكتە ءبىزدى ەشكىم بوتەن كورمەيدى. قاي جەرگە بارساق تا, جۇرەگى كەڭ قازاق حالقى باۋىرىم دەپ ارقادان قاعادى. ءبىز ءۇشىن قازاقستاننان ارتىق وتان جوق» دەگەن.
مۇنداي پىكىردى ەتنومادەني ورتالىقتاردىڭ وكىلدەرىنەن ءجيى ەستۋگە بولار ەدى.
وبلىستا 20 ەتنومادەني ورتالىق جۇمىس جاساسا, ولاردىڭ اۋدان, قالالاردا 51 فيليالى بار. وبلىس اكىمدىگى ارقايسىسىنا جىل سايىن قارجىلاي كومەكتەسىپ, گرانت ءبولىپ تۇرادى.ۇلتارالىق قاتىناس, دوستىقتى نىعايتقانى ءۇشىن «باۋىرمال» سىيلىعى بەرىلەدى.
وبلىستىق اسسامبلەيا جانىنان عىلىمي-ساراپشىلىق توپ قۇرىلعان. ونىڭ قۇرامىنا عالىمدار, ەتنومادەني ءبىرلەستىكتەردىڭ وكىلدەرى, ءبىلىم سالاسى, بۇقارالىق اقپارات قۇرالدارى جانە جەرگىلىكتى اتقارۋشى بيلىكتىڭ وكىلدەرى كىرگەن. وبلىستىق ءماسليحاتتىڭ ىشىنەن قوعامدىق تاتۋلىق, ۇلتارالىق قاتىناستى نىعايتۋعا قىزمەت ەتەتىن «ەل بىرلىگى» توبى جۇمىس جاسايدى. انالار كەڭەسى قۇرىلعان.
م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە جاڭا قازاقستاندىق پاتريوتيزم جانە ەتنوكونفەسسيالىق توزىمدىلىك رۋحىندا ءتاربيەلەيتىن «دوستىق» كلۋبى جاقسى جۇمىس جاساپ جاتىر.
وبلىستىق اكىمدىكتىڭ ۇيىتقى بولۋىمەن بارلىق اۋدان, قالالاردى قامتىعان «ىرىس الدى – ىنتىماق» قوعامدىق فورۋمى تالاي كۇردەلى ماسەلەلەردىڭ ءتۇيىنىن تارقاتىپ كەلەدى. قۇرامىنا مەملەكەتتىك قۇرىلىم جانە ءماسليحات, ساياسي پارتيالار, ۇكىمەتتىك ەمەس ۇيىمدار, ءدىني بىرلەستىكتەر, باق وكىلدەرىمەن قاتار ەتنومادەني ورتالىقتارى كىرەتىن فورۋم جىل سايىن ءىرى تاقىرىپتار بويىنشا جۇرتشىلىقتىڭ باسىن قوسىپ, احۋالدى وڭالتۋ باعىتىندا جۇمىس جاسايدى.
سونىمەن قاتار, تەك دياسپورا وكىلدەرىنە عانا ەمەس بارلىق ۇلت- ۇلىستاردىڭ ورتاق يگىلىگىنە اينالىپ كەتكەن مەرەكەلەر بار. اتاپ ايتساق, «روجدەستۆو», «ماسلەنيتسا», مادەني ورتالىقتار كۇنى, «سابانتوي», «اسكيا», «وفورين» سياقتى مەرەكەلەر «ناۋرىز» مەيرامىمەن استاسادى.
اسسامبلەيانىڭ ەڭ باستى مىندەتى – مەملەكەتىمىزدەگى قوعامدىق كەلىسىم مەن ۇلتارالىق تاتۋلىقتى ساقتاۋ بولسا, وڭتۇستىكتەگى ەتنو-ورتالىقتار بۇعان قال-قادەرىنشە ەڭبەك ءسىڭىرىپ كەلەدى.
ەلباسى وڭتۇستىككە كەلگەن ساپارىنىڭ بىرىندە
«قازاقستاننىڭ باياندى بولاشاعىنا وسى وڭتۇستىك قازاقستان وبلىسى ءومىرىنىڭ وزىنەن كوز جەتكىزۋگە بولادى. بۇرىندارى وسى وبلىستا ءتورت, ءۇش اۋىسىمدىق مەكتەپتەر بولعان. ءبىز ازداعان جىلداردىڭ ىشىندە ساۋلەتتى مەكتەپتەر, بالاباقشالار, اۋرۋحانالار سالىپ, كۇردەلەنگەن ماسەلەلەردىڭ ءتۇيىنىن تارقاتتىق. وڭتۇستىكتە انا مەن بالا ءولىمى بۇرناعى جىلداردان ايتارلىقتاي ازايدى. ادامداردىڭ ءومىر ءسۇرۋ جاسىنىڭ ۇزاقتىعى ارتىپ كەلەدى. مۇنىڭ ءبارى – ەلگە جاسالىپ جاتقان جاقسىلىقتاردىڭ قايتارىمى. شىمكەنت – ساۋلەتتى قالا. تاڭەرتەڭ دەندروباقتى ارالاپ, كولدى كوردىم. ۇلكەن جۇمىستار اتقارىلىپتى. مىنا ساياباق قانداي اسەم. تاريحقا تۇنىپ تۇر. استانا, الماتىدان كەيىنگى قازاقستاننىڭ ءۇشىنشى قالاسى – شىمكەنت دەگەندى مەن بۇرىن دا ايتقانمىن. قالا ورتالىعىنىڭ سيقىن الىپ, قورشاعان ورتاعا زالالىن تيگىزىپ وتىرعان قورعاسىن زاۋىتى سىرتقا كوشىرىلەدى. حالقىنىڭ سانى 1 ملن.-عا جەتەعابىل قالانىڭ كوركى بۇگىنگىسىنەن دە كوركەم بولادى. جىل سايىن ەلىمىزگە 75 مىڭ ءسابي سىيلايتىن التىن قۇرساق وڭتۇستىكتەگى بۇگىنگى اتقارىلىپ جاتقان جۇمىستاردىڭ اۋقىمى ۇلكەن, بولاشاعى زور», دەگەن ەدى.
بۇگىندە رەسپۋبليكانىڭ بار ايماعى, وبلىس ورتالىقتارى استاناعا قاراپ بوي تۇزەيتىن بولدى. باس قالانىڭ الەمدىك ساۋلەت ونەرىنىڭ وزىق ۇلگىلەرىمەن استاسقان اسەم كەلبەتى قازاقستاننىڭ تۇكپىر-تۇكپىرىنە شۋاق بولىپ تاراۋدا. سونىڭ ءبىرى – شىمكەنت قالاسى اينالدىرعان ءتورت-بەس جىلدىڭ ىشىندە ادام تانىماستاي اجارلاندى. جاڭا اكىمشىلىك-ىسكەرلىك ورتالىعىنان بولەك رەسپۋبليكادا العاشقى بولىپ سالت-ءداستۇر ورتالىعى اشىلدى. «قازىنا» تاريحي-مادەني كەشەنى وبلىس تۇرعىندارىنىڭ ماقتانىشىنا اينالدى. وڭتۇستىك جۇرتى وسىنىڭ ءبارىن ەلباسىنىڭ اتىمەن بايلانىستىرادى.
استانا – قازاقستان ەكونوميكاسىنىڭ لوكوموتيۆى. ەلىمىزدىڭ بارلىق ايماعى استانادان قۋات الىپ, جان-جاقتى دامىپ كەلەدى. كەشەگى دەشتى قىپشاقتىڭ ورتالىعى بولعان وردالى مەكەندە, سارىارقانىڭ تورىندەگى جاۋھار قالادا التى الاشتىڭ بالاسى مەرەكەلەيتىن مەرەيتوي وتپەك. بۇكىلحالىقتىق تويعا وڭتۇستىكقازاقستاندىقتار وسىنداي جاقسى ناتيجەلەرىمەن كەلىپ وتىر.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.
