ءانشى روزا «مەن سىيعا تارتقان ورامال» دۇكەنىن اشتى

ۇلتتىق بوياۋىنان اجىراماعان حالىقتىڭ سۇيىكتى ءانشىسى, بەس بالانىڭ اناسى روزا القوجا ءوزىنىڭ جەكە كاسىبىن باستاعانى جايلى الدىمەن الەۋمەتتىك جەلىدەگى دوستارىنان ءسۇيىنشى سۇراعان-دى. ءانشىنىڭ بۇل باس­تاماسى كوپشىلىككە بىردەن ۇناپ, ءار ەلگە ەلىكتەي بەرگەنشە, ورامالدى كيە تۇتقان انالارىمىزدىڭ ونەگەسىن ۇلىقتايىق دەپ, جاقسى لەبىزدەرگە بولەنگەن ەدى. «قازاقتىڭ قىز-كەلىنشەكتەرىنە ارناپ ادەمى, ساپالى, ءوزىمىزدىڭ ءداستۇرىمىز بەن دىلىمىزگە ساي كيىم­دەر مەن ورامالدار ساتاتىن دۇكەن اشۋ ءبىرازدان بەرى ويدا ءجۇر­گەن ەدى. ەندى, مىنە, وسى يگى ءىستى باستاۋدىڭ ءساتى كەلدى. ءدۇيىم جۇرت­قا ءوزىمدى سۇيكىمدى ەتكەن «مەن سىي­عا تارتقان ورامال» اتتى ءاننىڭ اتاۋىن وسى دۇكەنگە بەرىپ وتىرمىز. ويتكەنى, دۇكەندە نەگىزىنەن قىز-كەلىنشەكتەرگە ارنالعان ورامالدار, انالارعا ارنالعان اق جاۋلىقتار, قازاقى ويۋ-ورنەك بەدەرلەنگەن باس كيىمدەر ساتىلادى. سونداي-اق, ۇلكەن اپا-اجەلەرىمىزگە ارنالعان توي كويلەكتەرىن دە ءبىز­دىڭ دۇكەنىمىزدەن تابا الاسىزدار. قازىرگى زاماندا جاسى ۇلكەن اپالارىمىز تويعا جاستاردىڭ ستيلىندە كيىنىپ بارىپ جۇرگەنىن كورىپ ءجۇرمىز. ۇلكەن كىسىلەر ءوزى­مىزدىڭ داستۇرىمىزگە جانە قازىرگى زامانعا ساي ادەمى كويلەكتەر كيىپ, جاۋلىعىن سالىپ جۇرگەنى قانداي جاراسىمدى بولار ەدى. جاس قىزدار مەن كەلىنشەكتەرگە ارنالعان ءساندى كيىمدەر دە بار. ءبىزدىڭ دۇكەندەگى ورامالدار, كيىم-كەشەكتەر ارنايى ستيليستەر مەن ديزاينەرلەردىڭ قولدارىنان شىققان» دەيدى وقىرماننان الدىمەن ءسۇيىنشى سۇراعان روزا القوجا «الاش ايناسى» سايتىندا. ايناش ەسالي, «ەگەمەن قازاقستان». الماتى.