بۇگىن استاناداعى تاۋەلسىزدىك سارايىندا «نۇر وتان» پارتياسىنىڭ كەزەكتى XVI سەزى وتەدى
ەل سەنىمىن ەسەلەگەن ساياسي ۇيىم
«نۇر وتان» پارتياسىنىڭ 2015-2025 جىلدارعا ارنالعان سىبايلاس جەمقورلىققا قارسى ءىس-قيمىل باعدارلاماسى – ەلباسىنىڭ «قازاقستان-2050» دامۋ ستراتەگياسىن ويداعىداي جۇزەگە اسىرۋدىڭ كەپىلى ادام بولعاننان كەيىن سول ادام بالاسىنىڭ ىشسەم, جەسەم, تويىنسام, قاعاناعىم قارق, ساعاناعىم سارق, ىشكەنىم الدىمدا, ىشپەگەنىم ارتىمدا بولارلىقتاي دۇنيەنى شايقاپ ءومىر سۇرسەم دەيتىن وسى ءبىر جابايى ويى مەن نيەتىنىڭ ىشىندە بۇگىپ جاتاتىنى دا بار. سول ادام بالاسى وسى ءبىر جابايى وي مەن نيەتتىڭ جەتەگىندە كەتپەسىن دەڭىز. سوعان جول بەرمەس ءۇشىن حالقىمىز دۇنيەنى جالعان دەپ تانىعان, بايلىقتى مانسۇق ەتكەن. «مالىم جانىمنىڭ, جانىم ارىمنىڭ ساداقاسى» دەگەندى دە ايتا بىلگەن قازاقتىڭ بار بايلىعى مەن اسىل دۇنيەسى دە ارى بولعان. الايدا, ادامدى تۇرمىستىڭ دا بيلەيتىنى بار. «كەدەيدىڭ كۇنىن باسقا بەرمەسىن» دەپ تىلەيتىندەي, بۇگىنگى قازاق بالاسى ءبىر عانا مالىنىڭ ەتى مەن سۇتىنە ەمىنىپ وتىرماعانى تاعى انىق. بۇگىنگى قازاقستاننىڭ جاعدايىندا كاسىپ تە كوپ, ءناسىپ تە كوپ. تەك ەڭبەك ەتە ءبىل. جانە دە ادال ەڭبەك ەتە ءبىل! ءبىزدىڭ بۇل ايتقانىمىز تالاي دا ءبىر ايتىلعان جاي. الايدا, دۇنيەگە دەگەن اشكوزدىكتىڭ ءورشي تۇسكەندىگى جانە دە جەڭ ۇشىنان بايلانىسىپ جاتقان جەمقورلىق دەرتى بۇگىنگى قوعامدى الاڭداتىپ وتىرعاندىعى تاعى دا بار. وسى جەمقورلىق دەرتى ەلىمىز تاۋەلسىزدىك العان كەزەڭمەن بىرگە كەلدى دەپ ايتار بولساق, مۇنىمىز ابدەن جاڭساقتىق بولار ەدى. جەمقورلىق پەن پاراقورلىق قازاق دالاسىنا پاراقور بيلەردىڭ جەمساۋىمەن دە, اق پاتشانىڭ بولىس سايلاۋىمەن كەلگەندىگى دە, ونان كەيىنگى كەڭەستىك ءداۋىردىڭ دە كەسەلى بولعاندىعى انىق. مىنە, سول جۇقپالى دەرتىڭىز ەندىگى قازاق ەلىندە دە ءوسىپ-ونگىسى بار. تاۋەلسىز قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ ەل بولاشاعىن, تاۋەلسىزدىگىمىزدىڭ باياندى بولۋىن ارىدەن ويلاپ, تۇبىندە وسى جەمقورلىق سياقتى جۇقپالى كەسەل كەسىر كەلتىرەر دەگەن ويمەن سىبايلاس جەمقورلىقتىڭ تۇبىرىنە بالتا شابۋدى ەرتە قامدادى. مۇنىڭ دالەلىندەي, قازاقستان كەشەگى كەڭەستىك ءبىر جۇيەنىڭ قاتارىندا بولعان مەملەكەتتەر اراسىندا جەمقورلىققا قارسى كۇرەس جونىندەگى زاڭدى ءبىرىنشى بولىپ قابىلدادى. تاعى دا بۇعان قاراپ, قازاقستاندى جەمقورلىق جايلاپ الدى دەگەن پىكىر دە تۋىنداماۋى كەرەك. ەلباسى جەمقورلىق دەرتى الەمنىڭ بارلىق مەملەكەتتەرىندە, ءتىپتى, ءوستى, وركەندەدى دەيتىندەي الپاۋىت ەلدەردىڭ وزدەرىندە كەزدەسىپ جاتار كەسەل ەكەندىگىن ايتا وتىرىپ, وسى ءبىر دەرتكە قارسى بارلىق قازاقستاندىقتاردىڭ ءتوزىمسىز بولۋ كوزقاراسىن, جەمقورلىققا قارسى تۇرا بىلەر ءمادەنيەتىن قالىپتاستىرۋ ماسەلەسىنە ايرىقشا ءمان بەرىپ كەلە جاتقاندىعىن دا ايتقان ءلازىم. جەمقورلىققا قارسى كۇرەس ماسەلەسىن ەلباسىنىڭ ءوز نازارىنان بىردە-ءبىر قاعىس قالدىرماۋىن ەلدىڭ بولاشاعىن, تاۋەلسىزدىكتىڭ تاعدىرىن تەرەڭىنەن ويلاعاندىق دەپ پايىمدايمىز. وسى ورايدا, نۇرسۇلتان نازارباەۆ «نۇر وتاننىڭ» XV سەزىندە ساياسي كوشباسشىلىقتىڭ قاعيداتتى ماسەلەسى رەتىندە سىبايلاس جەمقورلىقپەن ىمىراسىز كۇرەسۋدىڭ ستراتەگياسىن ازىرلەۋدى دە تەگىننەن تاپسىرماعان بولاتىن. ءويتكەنى, ءبىز – ءوز الدىمىزعا «ماڭگىلىك ەل» بولۋ مۇراتىن قويعان ەلمىز. جانە دە ەلباسىنىڭ بۇل ەلدىك ءارى مەملەكەتتىك ماڭىزدى تاپسىرماسىن جۇزەگە اسىرۋ ءۇشىن «نۇر وتاننىڭ» 2015-2025 جىلدارعا ارنالعان سىبايلاس جەمقورلىققا قارسى ءىس-قيمىلدىڭ جاڭا باعدارلاماسىن ازىرلەپ, قازاقستاندىقتاردىڭ نازارىنا ۇسىنۋى ابدەن قۇپتارلىق جاي. جانە دە پارتيانىڭ وسى ستراتەگيالىق ماڭىزدى قۇجاتتى حالىقتىڭ تالقىلاۋىنا ۇسىنىپ بارىپ قابىلداۋى «نۇر وتاننىڭ» ناعىز حالىقتىق پارتيا ەكەندىگىن تاعى ءبىر مويىنداتقانداي. – قۇجات قاساڭ ساندارمەن ورىلگەن قۇقىقتىق قۇجات ەمەس, ەڭ باستىسى, حالىقتىڭ سانا-سەزىمىن وزگەرتۋگە شاقىراتىن ساياسي, يدەولوگيالىق باعىت بولىپ سانالادى, – دەگەن «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ وسى ءبىر ويىنا تەرەڭىرەك ۇڭىلگەنىمىز ابزال. ويتكەنى, «حالىقتىڭ سانا-سەزىمىن وزگەرتۋگە شاقىراتىن ساياسي, يدەولوگيالىق باعىت بولىپ سانالادى», دەپ وتىرىلعان سىبايلاس جەمقورلىققا قارسى كۇرەستىڭ جاڭا باعىتى ەڭ اۋەلى سانانى وزگەرتۋگە ىقپال ەتۋى كەرەك. سانامىزدا ەلدىك جانە مەملەكەتتىك مۇددە بارىنەن دە جوعارى تۇرۋعا ءتيىستى. ارينە, سانانى وزگەرتۋ مەن قالىپتاستىرۋ ارالىعىنداعى ۇدايى ءارى ۇزبەي جۇرگىزىلەر جۇمىستاردىڭ دا توقتاپ قالماسى انىق. بۇل باعىتتا دا «نۇر وتاننىڭ» 2015-2025 جىلدارعا ارنالعان سىبايلاس جەمقورلىققا قارسى ءىس-قيمىل باعدارلاماسىندا تەك قانا سىبايلاس جەمقورلىقتىڭ كورىنىسىمەن عانا ەمەس, سول جەمقورلىقتى تۋعىزاتىن جايلارمەن دە, سونىڭ سەبەپتەرىمەن دە كۇرەسۋ ەڭ نەگىزگى قاعيداتتارىنىڭ ءبىرى رەتىندە العا تارتىلۋىن ابدەن ورىندى دەپ سانايمىز. بىلايشا ايتقاندا, جەمقورلىققا جول اشار, بولماسا سول كەسەلگە قول ارتۋعا يتەرمەلەيتىن جايلاردى بولدىرماۋ ءۇشىن قازاقستاندىق قوعام جاپپاي ويلانۋعا ءتيىستى. ارينە, پارتيا العا تارتىپ وتىرعانىنداي, الەمدىك وزىق تاجىريبەنىڭ نەگىزىندە وتاندىق زاڭناما دا جەتىلدىرىلەر. بۇل, مەنىڭشە, قيىندىق تۋعىزاتىنداي كۇردەلى دە ماسەلە بولماس. ال ەڭ باستىسى, جاڭا باعدارلامادا بەلگىلەنىپ وتىرعان سىبايلاس جەمقورلىق پەن ونىڭ كورىنىسىنە توزبەيتىن قوعامنىڭ مادەنيەتىن قالىپتاستىرۋ بارىنەن دە كۇردەلى بولارى حاق. بۇل ارادا ايتا كەتەرلىك ءبىر جاي, قوعامنىڭ توزبەۋشىلىگى ەڭ اۋەلى ءاربىر جەكە ادامنىڭ توزبەۋشىلىگىنەن قۇرالسا كەرەك-ءتى. ال ەندى تاپ قازىر, «الاعان قولىم بەرەگەن», «قۇرعاق قاسىق اۋىز جىرتادى», «بەرگەن پەردە بۇزادى», بولماسا «قانىنا تارتپاعاننىڭ قارى سىنسىن» دەگەن سياقتى قازاقى دا اعايىنشىل پسيحولوگيامەن تاربيەلەنىپ وسكەن قوعامنىڭ بۇگىنگى پەندەلەرىنىڭ جاڭاشا كوزقاراسىن قالىپتاستىرۋ ءۇشىن تاربيەنىڭ جاڭا ءبىر ءتۇرى قاجەت. ول – وتانسۇيگىشتىك تاربيە! جاسىراتىنى جوق, جەرشىلدىك پەن رۋشىلدىق «تاربيەسى» بەلەڭ الىپ بارا جاتقان بۇگىنگى قوعامنىڭ «تانىس-تامىر» ارقىلى جەڭ ىشىنەن جالعاسىپ دامۋى جەمقورلىق اتتى پالەنىڭ باسى ما دەپ قالامىن؟! قازاقستان تۇتاس ءبىر ەل, تۇتاس ءبىر مەملەكەت! ولاي بولسا, سول ءبىر تۇتاس ەلىمىزدى جەرشىلدىك پەن رۋشىلدىقتىڭ كەسەلىنەن تازا ۇستاي بىلەيىك. تاعى دا وتانسۇيگىشتىك تاربيەنى ايتا وتىرىپ, «نۇر وتان» پارتياسىنىڭ «سىبايلاس جەمقورلىق قازاقستاننىڭ بارلىق تابىستارىنا قول جەتكىزۋگە ءمۇمكىندىك تۋعىزعان مەملەكەتىمىزدىڭ نەگىزگى قۇندىلىعى – تاۋەلسىزدىككە قاۋىپ ءتوندىرەدى. سىبايلاس جەمقورلىق قوعامنىڭ مەملەكەتكە دەگەن سەنىمىنە سەلكەۋ تۇسىرەدى, ەلدىڭ الەۋمەتتىك-ەكونوميكالىق جانە رۋحاني ورلەۋىنە ايتارلىقتاي كەدەرگى كەلتىرە وتىرىپ, مەملەكەتتىك بيلىكتىڭ تيىمدىلىگىن تومەندەتەدى», دەگەن وسى ءبىر ۇستانىمدار بۇگىنگى جانە بولاشاقتاعى قازاقستاندىقتاردىڭ ساناسىنا ءسىڭىرىلۋى كەرەك. جانە دە ەرتەرەك سىڭىرىلگەنى ابزال! ول مەكتەپ قابىرعاسىنان باستالۋى كەرەك. سول ءۇشىن جوعارى سىنىپتاردا «نۇر وتاننىڭ» وسى ايتىپ وتىرعانىن مەكتەپ قابىرعاسىندا ايتاتىن, جاس ساناعا سىڭىرەتىن ارنايى فاكۋلتاتيۆتىك ساباقتار ەنگىزىلگەنى ءجون بولار ەدى. «جەمقورلىققا جول بەردىڭ بە, سەن ءوز وتانىڭنىڭ مۇددەسىن ساتتىڭ», «جەمقورلىق تا مەملەكەتىڭە جاساعان قاستاندىعىڭ, ءوز ەلىڭ مەن ءوز حالقىڭا دەگەن وپاسىزدىعىڭ» دەگەن سياقتى ويدى ەندىگى ۇرپاقتىڭ ساناسىنا ەرتەرەك, سول مەكتەپ قابىرعاسىنان سىڭىرگەن دۇرىس. بۇل بولاشاقتا قوعامنىڭ جەمقورلىققا دەگەن توزىمسىزدىگىن قالىپتاستىرۋدىڭ نەگىزگى ءبىر بۋىنى بولارى دا انىق. ەڭ باستىسى, ساناداعى توزىمسىزدىكتى قالىپتاستىرا بىلەيىك! ءبىز ايتىپ وتىرعان وسى جايدىڭ «نۇر وتان» پارتياسىنىڭ سىبايلاس جەمقورلىققا قارسى كۇرەستى جانداندىرۋ جونىندەگى باعدارلاماسىندا وتە ءدال ءارى انىق ءارى ناقتىلى ايقىندالىپ وتىرعانداعى قۋانتتى. باعدارلامادا, «سونىمەن بىرگە, ازاماتتاردىڭ بويىندا سىبايلاس جەمقورلىققا قارسى تۇرارلىق مادەنيەت, سىبايلاس جەمقورلىقتى جۋىتپايتىن تۇراقتى يممۋنيتەت, ونى جاريالى تۇردە ايىپتاۋ بولمايىنشا, قالاعان ناتيجەگە قول جەتكىزۋ مۇمكىن ەمەس. ءار قازاقستاندىق, ءار وتباسى سىبايلاس جەمقورلىققا قارسى كۇرەس بۇكىل قوعامنىڭ, ءار ازاماتتىڭ ءىسى ەكەنىن ءتۇسىنۋى ءتيىس. سوندىقتان بالا كۇننەن باستاپ وتانعا دەگەن سۇيىسپەنشىلىككە, ادامداردى جانە داستۇرلەردى قۇرمەتتەۋگە, ءبىلىم مەن ەڭبەككە ۇمتىلۋعا, كورەگەندىلىك پەن ادالدىققا تاربيەلەۋ كەرەك», دەپ وتە ورىندى ايتىلىپ وتىر. ەندىگى ارادا بۇل قاعيدات ءار قازاقستاندىقتىڭ ومىرلىك قاعيداتىنا, ءومىر ءسۇرۋ زاڭى ەسەبىندەگى ۇستانىمىنا اينالۋى كەرەك. بۇل ءۇشىن كۇنبە-كۇنگى تاربيە مەن تۇسىنىك جۇمىستارى كەرەك. ويتكەنى, ءبىز ەندىگى ارادا ۇلتتىڭ وركەنيەتتى دامۋىنا كەدەرگى كەلتىرەتىن جاعداي رەتىندە بۇل قۇبىلىسقا قارسى قۇلشىنىستى كۇشەيتىپ, جەمقورلىقتى مىنەز-ق ۇلىقتان جويۋعا ءتيىستىمىز. وتان تاعدىرى ءۇشىن اسا قاجەتتى وسى ءبىر سانالىق كريتەريگە جەتۋ ءۇشىن بۇعان اۋەلى ءار وتباسى جانە ءبىلىم بەرۋ سالالارى زور مۇددەلىلىك تانىتۋلارى قاجەت. جانە دە جەمقورلىققا قارسى كۇرەس جۇمىستارىن مەكتەپ تاربيەسىنەن باستاعاندى ابزال ساناي وتىرىپ, سول تاربيە مەن ءبىلىم بەرۋدەگى سىبايلاس جەمقورلىققا قارسى جۇيەنى قۇرۋ ءۇشىن پەداگوگيكا, پسيحولوگيا, قۇقىقتانۋ, ساياساتتانۋ, ەكونوميكا, مادەنيەتتانۋ, سونداي-اق الەۋمەتتانۋ سالالارىنىڭ ەڭ ۇزدىك ماماندارىن تارتۋ قاجەت دەگەن «نۇر وتان» بۇل قاعيداتتى ماسەلەنى شەشۋدىڭ جولدارىن دا تەرەڭىنەن قاراستىرىپ وتىر. جانە دە سىبايلاس جەمقورلىققا قارسى تاربيە جۇرگىزۋ مەن ءبىلىم بەرۋدىڭ نەگىزگى مازمۇنى دا «زاڭ», «ادىلدىك» جانە «تەڭ قۇقىقتىق» سياقتى ىرگەلى تۇسىنىكتەرمەن تىعىز ۇشتاسۋعا ءتيىستى. ەڭ اۋەلى ءاربىر قازاقستاندىقتىڭ قوعام مەن مەملەكەت ءۇشىن سىبايلاس جەمقورلىقتىڭ قاۋپىن ءتۇسىنۋ, سونان سوڭ سىبايلاس جەمقوردىڭ جاعىمسىز بەينەسىن قالىپتاستىرۋ, سىبايلاس جەمقورلىق ارەكەتى مەن مورالىنەن باس تارتۋ, سىبايلاس جەمقورلىققا قارسى ءومىر سالتىن قالىپتاستىرۋ, قۇقىقتىق نيگيليزمدى جەڭۋ باستى مىندەت بولسا كەرەك-ءتى. وسى ءبىر دايەكتى دە جۇيەلى ارەكەتتەر بولعاندا عانا قوعامداعى سىبايلاس جەمقورلىققا دەگەن «نولدىك» توزىمدىلىك قالىپتاسارى بار. پارتيانىڭ ويى دا, نيەتى دە وسى! جالپى, حالىقتىق پارتياعا اينالىپ وتىرعان «نۇر وتان» پارتياسىنىڭ سىبايلاس جەمقورلىققا قارسى ارەكەت جاساۋدىڭ اسا ماڭىزدىلىعى مەن وزەكتىلىگىن جانە قوعامنىڭ بارلىق كۇشىن سىبايلاس جەمقورلىققا قارسى ىمىراسىز كۇرەسكە جۇمىلدىرۋ قاجەتتىلىگىنە دەر ۋاعىندا باسا كوڭىل ءبولىپ كەلە جاتقاندىعى قازاقستاندىقتاردىڭ شىنايى ريزاشىل ىقىلاستارىن تۋدىرىپ وتىرعاندىعىن دا ايتقاندى ءجون كوردىك. «نۇر وتان» پارتياسىنىڭ سىبايلاس جەمقورلىققا قارسى كۇرەستى جانداندىرۋ جونىندەگى جاڭا باعدارلاماسى قوعامدا ءبىر سەرپىلىس تۋعىزدى. ول سەرپىلىس «ءبىز جەمقورلىقتى جەڭەمىز, جەمقورلىققا جول بەرمەيمىز, ءبارىمىز بىرىگىپ جەمقورلىققا قارسى تۇرا الامىز!» دەگەن سەنىم سەرپىلىسى ەدى. وسى ءبىر سەنىم سەرپىلىسىنىڭ كۇشىن السىرەتىپ الماۋ تەتىگى دە كەرەك بولار. ءويتكەنى, «سىبايلاستاردا» دا كۇش بار! جانە دە ولاردىڭ قولدارىندا مەملەكەتتىك باسقارۋ اپپاراتتارىنىڭ كەيبىر ىقپالدى ءارى اسەر ەتە الار تەتىكتەرى دە بار ەكەندىگى تاعى دا جاسىرىن ەمەس. بيلىگى مەن بايلىعى, قۇرىعى مەن قارجىسى بار ىقپالدى سىبايلاستارعا نە ىستەي الار ەكەنبىز دەگەن قوعام الاڭداۋشىلىعى دا بار. ويتكەنى, ءبىر كەزدەرى «ەگەر دە ءبىر مەكەمەنىڭ قاتارداعى بىرەۋى پارامەن قولعا تۇسسە, سول مەكەمەنى باسقارىپ وتىرعان باسشى ءوز ورنىنان ءوز ەركىمەن كەتۋى كەرەك» دەگەن دە ايتىلدى. سول بىردە ورىندالدى, بىردە ورىندالماي جاتتى. ال بۇل كەلىپ, قوعامنىڭ جەمقورلىققا قارسى كۇرەسۋ سەنىمىن السىرەتكەنى دە بار. ءبىز «نۇر وتاننىڭ» ەندىگى ارادا سىبايلاس جەمقورلىققا قارسى كۇرەستىڭ جاڭا يدەلوگياسىن ۇسىنىپ وتىرعاندىعىن ۇعىندىق. ول – ادال ەڭبەك يدەولوگياسى! ادال ەڭبەكتى قۇرمەتتەۋ اياسىن بارىنشا كەڭەيتۋ ارقىلى وسكەلەڭ ۇرپاقتىڭ ساناسىنا ادال ەڭبەك, ماڭداي تەرىڭمەن عانا تاپقانىڭ اسىل قۇندىلىق بولاتىندىعىن ءسىڭىرۋىمىز كەرەك. مۇنى ءار بالا ءوز وتباسىندا كورىپ, سەزىنىپ ءوسۋى ءجون. داراقىلىققا سالىنىپ, ارامنان تاپقان دۇنيەسىن شايقاپ ءىشىپ, جەپ جۇرگەن اتا-انالارىن كورىپ وسكەن وتباسى بالالارىنىڭ مىنەز-قۇلقىندا ەرتە قالىپتاسار دۇنيەگە دەگەن قىزىعۋشىلىق كۇنى ەرتەڭ سول دۇنيەنىڭ ق ۇلى بولۋعا ىقپال ەتەتىندىگىن دە ويلايىق. وسى ورايدا, «نۇر وتان» پارتياسىنىڭ سىبايلاس جەمقورلىققا قارسى مادەنيەتتى قالىپتاستىرۋ ار مەن يمان ارقىلى ءجۇزەگە اسىرىلۋى قاجەت دەگەن ويدى العا تارتا وتىرىپ, وتباسى مەن قوعامدا ءداستۇرلى حالىقتىق قاناعاتشىلدىق قۇندىلىقتاردى دارىپتەۋ, قاناعات پەن ىنساپ, يماندىلىق, ىسىراپشىلدىققا جول بەرمەۋ, ماتەريالدىققا قاراعاندا رۋحاني بايلىققا باسىمدىق بەرۋ ماسەلەسىن كوتەرۋى دە, ءسوز جوق, توعىشار ساناعا دا ءسىلكىنىس اكەلەر دەپ ويلادىق. جانە دە «سىبايلاس جەمقورلىق جوق ەل – وركەندەۋشى ەل» يدەولوگيالىق برەندىن ىلگەرiلەتۋ» ماسەلەسى دە ءبىزدىڭ الداعى بار جۇمىسىمىزدىڭ وزەگىنە اينالۋى كەرەك. قازىرگى ۋاقىتتا قوعامدى ەكونوميكا جانە مەملەكەتتىك قىزمەت پەن باسقارۋ سالاسىنداعى سىبايلاس جەمقورلىق كوبىرەك الاڭداتىپ وتىرعان سىڭايلى. قاراپايىم قاعيداعا سۇيەنەر بولساق, ەكونوميكا اركىمنىڭ تىرشىلىگى مەن كۇنكورىسى بولسا, مەملەكەتتىك قىزمەت پەن باسقارۋ سالاسى – سول اركىمنىڭ ءوز بولاشاعىنا دەگەن سەنىمىنىڭ تىرەگى. ال ەندى مەملەكەتتىك قىزمەت پەن باسقارۋ سالاسى سياقتى مەملەكەت تىرەگىنىڭ السىرەۋىنىڭ كەز كەلگەن كورىنىسى حالىقتىڭ بيلىككە دەگەن سەنىمىنىڭ السىرەۋى ەكەندىگىن, مۇنىڭ ەل تاۋەلسىزدىگىنە تيگىزەر زالالى مەن قاۋپى اسا قاتەرلى بولارىن ۇعىنار كەز كەلدى. «نۇر وتان» پارتياسى ەلدىڭ بيلەۋشى ساياسي كۇشى رەتىندە ءوزىنىڭ ساياسي دوكتريناسىندا جازىلىپ, اتاپ كورسەتىلگەنىندەي, حالىقتىڭ كەلەشەگى مەن ازاماتتارىمىزدىڭ لايىقتى ءومىر ءسۇرۋىن قامتاماسىز ەتۋدەگى تاريحي جاۋاپتىلىعىن تاعى دا ايقىن سەزىنە وتىرىپ, سىبايلاس جەمقورلىققا قارسى تەرەڭ مازمۇندى دا تەرەڭ ويلى جاڭا ءبىر تاريحي ءىس-قيمىلدى باستادى. «سىبايلاس جەمقورلىقتى جويۋ – ءبىزدىڭ حالقىمىز بەن مەملەكەتىمىزدىڭ ىرگەلى قۇندىلىعى – تاۋەلسىزدىگىمىزدى نىعايتۋدىڭ وزەكتى شارتى!» دەگەن تاريحي ۇرانمەن جورىققا شىققان «نۇر وتاننىڭ» ءبىز دە ساپىندامىز, ءبىز دە قاتارىندامىز! جابال ەرعاليەۆ, جازۋشى, قازاقستاننىڭ ەڭبەك سىڭىرگەن قايراتكەرى, پارلامەنت سەناتىنىڭ دەپۋتاتى.
