ەلەۋسىنوۆ پەن دىچكو الەم چەمپيوناتىنىڭ كۇمىس جۇلدەگەرلەرى!

استانا. 16 قازان. بۇگىن كاتار استاناسى – دوحا قالاسىندا وتكەن بوكستان الەم چەمپيوناتى مارەسىنە جەتتى. بۇل سىندا 69 كيلوعا دەيىنگى سالماقتا ەل نامىسىن قورعاعان بوكسشىمىز دانيار ەلەۋسىنوۆ پەن اسا اۋىر سالماقتاعى (+91 كگ) ساڭلاعىمىز يۆان دىچكو كۇمىس مەدالگە قول جەتكىزدى. بۇل تۋرالى egemen.kz حابارلادى. ەلەۋسىنوۆ فينالدا ماروككولىق موحاممەد رابيگە ەسە جىبەرسە, دىچكونىڭ فرانتسۋز توني يوكاعا شاماسى جەتپەدى. سونداي-اق, دانيار كەلەسى جىلى برازيليانىڭ ريو-دە-جانەيرو قالاسىندا وتەتىن وليمپيالىق ويىندارعا جولداما الدى. وسىلايشا, قازاقستان XVIII الەم چەمپيوناتىندا ەكى كۇمىس مەدال جانە ءبىر وليمپيادا جولداماسىن يەمدەندى. 69 كيلوعا دەيىنگى سالماقتىڭ فينالدىق جەكپە-جەگىندە ماروككولىقتىڭ ءبىزدىڭ بوكسشىدان باسىم بولعانىن مويىنداۋىمىز كەرەك. بيىلعى چەمپيوناتتىڭ باستى جاڭالىقتارىنىڭ ءبىرى بولعان موحاممەد رابي دانياردىڭ اتاق-داڭقىنان ەش قايمىققان جوق. العاشقى سەكۋندتاردان باستاپ العا ۇمىتىلعان ول ءبىرىنشى جانە ەكىنشى راۋندتاردا ءۇش تورەشىدەن دە جوعارى ۇپاي الدى. ال جەكپە-جەكتىڭ سوڭعى بولىگىندە ءبىر تورەشى قازاقستاندىقتىڭ جەڭىسىن تىركەگەنىمەن, جالپى ەسەپتە افريكالىقتىڭ مەرەيى ۇستەم بولدى. وسى رەتتە موحاممەد ءرابيدىڭ ماروككودان شىققان بوكستان تۇڭعىش الەم چەمپيونى ەكەنىن اتاپ وتكەن ءجون. سونىمەن بۇگىندە قازاقستان قورجىنىندا بوكستان ءتورت جولداما بار. ەلەۋسىنوۆتەن بولەك, بوكسشىلارىمىز – ءبىرجان جاقىپوۆ (49 كگ), بەرىك ءابدىراحمانوۆ (60 كگ) جانە ۆاسيلي لەۆيت بۇعان دەيىنگى جارىستاردا جولداماعا قول جەتكىزگەن بولاتىن. ايتا كەتەيىك, قازاقستان كاتارعا سەگىز بوكسشى الىپ باردى. قايرات ەراليەۆ (56 كگ) پەن زاكىر سافيۋللين (60 كگ) العاشقى جەكپە-جەكتەرىندە ەسە جىبەرسە, ولجاس ساتتىباەۆ (52 كگ), جانىبەك ءالىمحان ۇلى (75 كگ), ادىلبەك نيازىمبەتوۆ (81 كگ) جانە ۆاسيلي لەۆيت (91 كگ) شيرەك فينالدان اسا المادى. وسىعان دەيىنگى 2013 جىلى الماتىدا وتكەن الەم چەمپيوناتىندا بوكسشىلارىمىز 4 التىن, 2 كۇمىس جانە 2 قولا مەدال ەنشىلەپ, كوماندالىق ەسەپتە توپ جارعان ەدى. سول كەزدە دانيار الەم چەمپيونى اتانىپ, يۆان فينالدا ءسۇرىندى. ەلامان قوڭىر. دەرەك: egemen.kz. سۋرەت: vesti.kz.