استانا. 10 ناۋرىز. انگليانىڭ «مانچەستەر يۋنايتەدىندە» وينايتىن جاس فۋتبولشى ادنان يانۋزاي بيىلعى ماۋسىمدا سۇرەڭسىز ونەر كورسەتۋدە. وتكەن ماۋسىمدا جارق ەتىپ كوزگە تۇسكەن ول بۇگىندە سول كەزدەگى ويىن ورنەگىن تابا الماي كەلەدى. بۇل تۋرالى egemen.kz حابارلادى.
ءتىپتى ماۋسىم باستالعالى بارلىعى 19 ويىن وتكىزىپ, بىردە ءبىر رەت ناتيجەلى سوققى جاساماعان. ەسەسىنە, العان ەسكەرتۋلەرىنىڭ سانى كوبەيۋدە. سونىڭ ناتيجەسىندە, قازىر فۋتبولشىنىڭ «ميۋ» ءۇشىن سوققان گولىنان سارى قاعازى كوپ. سوڭعى ەسكەرتۋىن وتكەن تۇندە انگليا كۋبوگىنىڭ شيرەك فينالىندا الدى. سول ويىندا مانچەستەرلىكتەر لوندوننىڭ «ارسەنالىمەن» كۇش سىناسىپ, 1:2 ەسەبىمەن جەڭىلىپ قالدى. يانۋزاي ماتچتىڭ 73-مينۋتىندا ويىنعا قوسىلدى. الاڭعا شىققانىنا 14 مينۋت وتكەن كەزدە تورەشى جاس فۋتبولشىنى سيمۋلياتسيا ءۇشىن سارى قاعازبەن «ماراپاتتادى». بۇل ونىڭ «مانچەستەر يۋنايتەد» ساپىنداعى بەسىنشى ەسكەرتۋى. ال يانۋزايدىڭ وسى كوماندادا ءجۇرىپ سوققان گولدارىنىڭ سانى تورتەۋ. بارلىعىن دا وتكەن ماۋسىمدا سوققانىن ايتا كەتەيىك.
ادنان يانۋزاي 1995 جىلى بەلگيادا تۋعان فۋتبولشى. تەگى البانيالىق ول تۋعان ەلىنىڭ ۇلتتىق قۇراماسىن تاڭدادى. بۇگىنگە دەيىن بەلگيا قۇراماسى ءۇشىن بەس ويىن وتكىزىپ ۇلگەرگەن. يانۋزايدىڭ اتى فۋتبول الەمىنە 2013-2014 جىلعى ماۋسىمدا كەڭىنەن تانىمال بولدى. سول كەزدە جاس فۋتبولشى «ميۋ» ساپىندا جاسىنداي جارقىلداپ, كوپشىلىكتىڭ نازارىنا ىلىككەن ەدى. ءتىپتى بەلگىلى كوماندالار قىزىعۋشىلىق تانىتقاندا «مانچەستەر يۋنايتەد» «وزىمىزگە كەرەك» دەپ ساتپاي قويعان. الايدا, بۇگىندە العاشقى قارقىنىن جوعالتىپ العان ول جانكۇيەرلەر سەنىمىن اقتاي الماي كەلەدى.
ەلامان قوڭىر.
دەرەك: egemen.kz.
سۋرەت: eurosport.ru.
