اكادەميك كىتاپ قورىن تۇرىك اكادەمياسىنىڭ كىتاپحاناسىنا سىيلادى

الماتى. 15 قازان. ءتىل ءبىلىمىنىڭ كورنەكتى قايراتكەرى اكادەميك رابيعا سىزدىقوۆا ءوزىنىڭ عۇمىر بويى جيناعان 1500-گە جۋىق كىتاپ قورىن حالىقارالىق تۇركى اكادەمياسىنىڭ كىتاپحاناسىنا تاپسىردى. مۇنىڭ سىرتىندا عالىمنىڭ قولجازبالارى مەن ارحيۆتەردەن جيناعان كونە باسىلىمدارى, قۇندى قۇجاتتاردىڭ فوتوكوشىرمەلەرى بار. بۇل تۋرالى egemen.kz حابارلادى. سالتاناتتى شاراعا عالىممەن بىرگە حالىقارالىق تۇركى اكادەمياسىنىڭ پرەزيدەنتى دارحان قىدىرالى, ا.بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى مىرزابەرگەن مالباقوۆ, بەلگىلى عالىمدار جانە رابيعا سىزدىقوۆانىڭ شاكىرتتەرى مەن جاس عالىمدار قاتىستى. اكادەميانىڭ كىتاپحاناسى بىلتىر بەلگىلى ماجار تۇركىتانۋشىسى يشتۆان قوڭىر ماندوكيدىڭ جەكە كىتاپ قورىن قابىلداپ العان. سونداي-اق, قازاقستاندىق بەلگىلى عالىمدار ءابدۋالي قايدار مەن ءالجان قۇرىشجان ۇلىنىڭ دا جەكە كىتاپ قورلارى دا حالىقارالىق تۇركى اكادەمياسىنىڭ كىتاپحاناسىنا تابىس ەتىلگەن بولاتىن. حالىقارالىق تۇركى اكادەمياسىنىڭ پرەزيدەنتى دارحان قىدىرالى بىلىكتى عالىم رابيعا سىزدىقوۆاعا تۇركى مۇراسىنا قامقورلىعى مەن تۇركولوگيا عىلىمىنىڭ دامۋىنا قوسقان ولشەۋسىز ۇلەسى ءۇشىن العىس ايتىپ, حالىقارالىق تۇركى اكادەمياسىنىڭ سەرتيفيكاتىن تابىس ەتتى. تالعات ءسۇيىنباي. دەرەك, سۋرەت: egemen.kz.