ورتالىق سايلاۋ كوميسسياسى ءۇش ۇمىتكەردى تىركەۋدەن باس تارتتى

استانا. 10 ناۋرىز. ورتالىق سايلاۋ كوميسسياسى پرەزيدەنت سايلاۋىنا قاتىسۋعا تىلەك بىلدىرگەن تاعى ءۇش ۇمىتكەردى تىركەۋدەن باس تارتتى. بۇل تۋرالى ورتالىق سايلاۋ كوميسسياسىنىڭ ءباسپاسوز قىزمەتى حابارلادى. «قوعام قايراتكەرى ەسەنبەك ۇكتەشباەۆ, «كەنەسارى حان» قورىنىڭ باسشىسى ءۋاليحان قايساروۆ جانە ماي قۇيۋ ستانساسىنىڭ باستىعى قانات جۇمان مەملەكەتتىك ءتىل بويىنشا ەمتيحاننان وتە المادى», - دەلىنگەن حابارلامادا. وسىعان بايلانىستى ورتالىق سايلاۋ كوميسسياسى قازاقستان پرەزيدەنتتىگىنە ۇمىتكەرلەر ساناتىنداعى بۇل ۇشەۋدى تىركەۋدەن باس تارتقان. ناۋرىزدىڭ 9-ى كۇنى لينگۆيستيكالىق كوميسسيا قوعام قايراتكەرى ەسەنبەك ۇكتەشباەۆ پەن «كەنەسارى حان» قورىنىڭ باسشىسى ءۋاليحان قايساروۆتى مەملەكەتتىك ءتىلدى ەركىن مەڭگەرمەگەن دەپ تاپتى. ال 7 ناۋرىز كۇنى ماي قۇيۋ ستانساسىنىڭ باستىعى قانات جۇمان وسى سىناقتان وتە الماعان بولاتىن. لينگۆيستيكالىق كوميسسيانىڭ توراعاسى مىرزاتاي جولداسبەكوۆ جۋرناليستەرگە ۇكتەشباەۆتىڭ تاپسىرعان ەمتيحانى بارىسى تۋرالى بىلايشا اڭگىمەلەپ بەردى: «تاقىرىپتى اشۋ تالاپ ەتىلەتىن جازبا جۇمىسى تاپسىرماسىن ورىنداۋدا ۇمىتكەر سوزدەر قۇرىلىمىنداعى ادەبي ءتىلدىڭ نورمالارىن بۇزا وتىرىپ, سويلەمدى ستيليستيكالىق جاعىنان بۇرىس جازعانىنان بولەك, ءوز ويلارىن قيسىن جاعىنان دۇرىستاپ جەتكىزىپ بەرە المادى. ۇمىتكەر شىعارمانىڭ كولەمىن ەكى پاراققا جەتكىزۋ جونىندەگى تاپسىرمانىڭ دا ۇدەسىنەن شىققان جوق. ول كەلەسى تاپسىرمادا مۇقاعالي ماقاتاەۆتىڭ «سەزىم» دەگەن ولەڭىن وقىپ تۇرعاندا, قاتەلىكتەر جىبەردى جانە كوميسسيانىڭ شىعارما مازمۇنى تۋرالى قويعان سۇراعىنا جاۋاپ بەرە المادى. كانديدات «قوعام جانە دەموكراتيا» تاقىرىبىندا ءسوز سويلەۋ جونىندەگى تاپسىرما بويىنشا ءتيىستى 15 مينۋتتىڭ ورنىنا 10 مينۋت قانا سويلەدى. وندا دا ادەبي ءسوزدىڭ نورماسىن بۇزىپ, قويىلعان سۇراقتارعا قاناعاتتانعىسىز جاۋاپ بەردى». مۇرات ايتقوجا.