پرەزيدەنتتىككە ۇمىتكەر ەرجان سەرعازين سىناقتان ءسۇرىندى

استانا. 10 ناۋرىز. پرەزيدەنتتىككە ۇمىتكەر رەتىندە تىركەلگەن ەرجان سەرعازينگە لينگۆيستيكالىق كوميسسيانىڭ كوڭىلى تولمادى. بۇل تۋرالى «قازاقپارات» حابارلادى. وسىعان بايلانىستى كوميسسيا توراعاسى مىرزاتاي جولداسبەكوۆ: «ەرجان مەرەكە ۇلى سەرعازين مىرزانىڭ بۇگىن قازاق تىلىنەن تاپسىرعان ەمتيحانىنىڭ ناتيجەسى مىناداي بولدى. ءبىرىنشى جازبا جۇمىسىنىڭ تاقىرىبى: «كونستيتۋتسيا – تۇراقتى دامۋ كەپىلى». ەرجان مىرزا ەكى بەت جۇمىس جازىپتى. جۇمىستىڭ باس جاعىندا اجەپتاۋىر جاقسى تاريحي دەرەكتەر بار. بىراق قازىرگى ءبىزدىڭ كونستيتۋتسيامىزدىڭ تۇراقتى دامۋ كەپىلدىگى جايى اشىلماي قالعان. ونىڭ ۇستىنە, جۇمىسىندا 24 قاتە كەتىپتى. ەملەدەن – 6, تىنىس بەلگىدەن – 13, ستيلدىك 5 قاتە جىبەرگەن. جالپى, ءبىزدىڭ تالابىمىزدا پرەزيدەنتتىككە ۇمىتكەر ازاماتتار ساۋاتتى جازۋى كەرەك, ساۋاتتى سويلەۋى كەرەك», – دەدى. كانديدات ەكىنشى كەزەڭدە ابايدىڭ پوەزياسى مەن قارا سوزدەرىنەن 3 بەتتىك ءماتىن وقىعان. «شىنىن ايتۋ كەرەك, ەرجان مىرزا ەجىكتەپ وقىدى. كەيبىر ءماتىننىڭ ماعىناسىن تولىق تۇسىنبەدى. سول ءماتىن ىشىندە كەزدەسەتىن قازاقتىڭ بايىرعى سوزدەرىن, ماسەلەن, قارەكەت, كوكىرەك تازالاۋ سىندى سوزدەردى ءتۇسىندىرىپ ايتا المادى», – دەدى م.جولداسبەكوۆ. كوميسسيا توراعاسىنىڭ ايتۋىنشا, ءۇشىنشى كەزەڭدە «قازاق ونەرىنىڭ بەل-بەلەستەرى» دەگەن تاقىرىپتا 15 مينۋت سويلەگەن ە.سەرعازيننىڭ ويى شاشىراڭقى بولعان. جولدىباي بازار. دەرەك, سۋرەت: «قازاقپارات».