استانا. 10 ناۋرىز. «چەلسي» فۋتبول كومانداسىنىڭ قورعاۋشىلارى دجون تەرري مەن برانيسلاۆ يۆانوۆيچ ەكەۋى بيىلعى ماۋسىم باستالعالى 12 دوپ سوققان. اتالعان كورسەتكىش «مانچەستەر يۋنايتەدتىڭ» شابۋىلشىلارى رادامەل فالكاو مەن انحەل دي ماريانىڭ ناتيجەسىنەن كوپ. بۇل تۋرالى eurosport.ru حابارلادى.
بۇگىنگە دەيىن اعىلشىن پرەمەر-ليگاسىندا 28 تۋر ءوتتى. سودان بەرى تەرري مەن ءيۆانوۆيچتىڭ ارقايسىسى قارسىلاستارىنىڭ قاقپاسىنا 6 دوپتان سوققان. ياعني, ەكى قورعاۋشى ماۋسىم باسىنان بەرى 12 گولدىڭ اۆتورى اتانعان. ال فالكاو مەن دي ماريانىڭ ەنشىلەرىندە 8 دوپ بار. بۇگىنگە دەيىن ولاردىڭ ارقايسىسى 4 مارتە مەرگەندىگىمەن كوزگە تۇسكەن.
«مانچەستەر يۋنايتەد» قوس شابۋىلشىنى وسى ماۋسىمنىڭ باسىندا اتتاي قالاپ ساتىپ العان ەدى. كلۋب باسشىلىعى كولۋمبيالىق پەن ارگەنتينالىق شابۋىلشىدان كوپ ءۇمىت كۇتسە دە ازىرگە سەنىم اقتالماي كەلەدى.
قازىرگى تاڭدا اعىلشىن چەمپيوناتىندا «چەلسيدىڭ» كوش باستاپ تۇرعانىن ايتا كەتەيىك. اتاقتى جوزە موۋرينو جاتتىقتىراتىن كوماندانىڭ ەنشىسىندە 63 ۇپاي بار. ال «مانچەستەر يۋنايتەد» 53 ۇپايمەن تۋرنير كەستەسىندە 4-ساتىدا كەلەدى.
كەلەسى تۋردا لوندوندىقتار «ساۋتگەمپتوندى» قابىلداسا, لۋي ۆان گالدىڭ شاكىرتتەرى ءوز الاڭدارىندا «توتتەنحەممەن» كۇش سىناسادى.
ەلامان قوڭىر.
دەرەك: eurosport.ru.
Cۋرەت: sports.ru, thepeoplesperson.com.
