مەملەكەت باسشىسى رەسەي پرەزيدەنتىمەن كەزدەستى

استانا. 15 قازان. ەلباسى قازاقستانعا مەملەكەتتىك ساپارمەن كەلگەن رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەستى. بۇل تۋرالى akorda.kz حابارلادى. قازاقستان پرەزيدەنتى كەزدەسۋ بارىسىندا ۆ.ءپۋتيننىڭ ەلىمىزگە ساپارى ءۇشىن ريزاشىلىق بىلدىردى. «ءسىزدىڭ قازاقستانعا بۇدان بۇرىنعى مەملەكەتتىك ساپارىڭىز ءتورت جىل بۇرىن بولدى. وسى ۋاقىت ارالىعىندا ءبىز ۇنەمى ەكىجاقتى قارىم-قاتىناستىڭ وزەكتى ماسەلەلەرىن ءتۇرلى ورىنداردا شەشىپ وتىردىق. ءسىزدىڭ بۇل جولعى ساپارىڭىز دا وسىناۋ كۇردەلى كەزەڭدەگى ىنتىماقتاستىعىمىزدى نىعايتۋعا جانە تەرەڭدەتە تۇسۋگە سەپتىگىن تيگىزەتىنىنە سەنىمدىمىن», – دەدى نۇرسۇلتان نازارباەۆ. مەملەكەت باسشىسى 16 قازاندا وتەتىن تمد-عا مۇشە مەملەكەتتەر باسشىلارى كەڭەسى مەن جوعارى ەۋرازيالىق ەكونوميكالىق كەڭەس اياسىنداعى كەلىسسوز ماسەلەلەرىن دە قوزعادى. «بۇگىندە ەاەو حالىقارالىق ارەنادا قۇرمەت پەن بەدەلگە يە بولىپ, ءوز اياسىن كەڭەيتىپ كەلەدى. ءبىز دۇرىس جولدا كەلەمىز دەپ ەسەپتەيمىن», – دەدى قازاقستان پرەزيدەنتى. نۇرسۇلتان نازارباەۆ قازاقستان مەن رەسەيدىڭ ەكىجاقتى قارىم-قاتىناسىن دامىتۋ كەلەشەگى تۋرالى دا ايتتى. «ءبىز سوچيدە ءوزارا قارىم-قاتىناستارىمىزعا قاتىستى نەگىزگى ماسەلەلەردى تالقىلاۋعا مۇمكىندىك الدىق, ەندى بۇگىن سولارعا قاتىستى ءتيىستى قۇجاتتار دايىندالىپ وتىر. ءبىزدىڭ قارىم-قاتىناستارىمىز «ءححى عاسىرداعى تاتۋ كورشىلىك جانە وداقتاستىق تۋرالى» ىرگەلى كەلىسىم نەگىزىندە دامىپ جاتقانىن دا ايتقىم كەلەدى. وداقتاستىق ۇجىمدىق قاۋىپسىزدىك تۋرالى شارتپەن, ال ەكونوميكالىق تۇرعىدان ەاەو-نىڭ جارعىلىق قۇجاتتارىمەن بەكىتىلگەن. قازاقستان ءاردايىم رەسەي فەدەراتسياسىنىڭ جاقىن ءارى سەنىمدى كورشىسى, وداقتاسى بولعان, الداعى ۋاقىتتا دا سولاي بولىپ قالا بەرەدى. بۇل قازاقستان حالقىنىڭ تۇپكى مۇددەلەرىمەن توعىسىپ جاتىر», – دەپ اتاپ ءوتتى مەملەكەت باسشىسى. ۆ.پۋتين ءوز سوزىندە جوعارى دەڭگەيدەگى كەزدەسۋلەر مەن كەلىسسوزدەر جۇيەلى تۇردە جۇرگىزىلىپ كەلە جاتقانىن اتاپ ءوتتى. «مەنىڭ رەسەي-قازاقستان قارىم-قاتىناسىنا سيپاتتاما بەرۋىمنىڭ كەرەگى جوق. بۇل – جاي ءوزارا سەنىمدى سەرىكتەستىك قانا ەمەس, تولىق ماعىناسىنداعى وداقتاستىق قارىم-قاتىناس. قازاقستان – ءبىزدىڭ ءىرى ساۋدا-ەكونوميكالىق سەرىكتەسىمىزدىڭ ءبىرى. بۇگىندە 6 مىڭعا جۋىق رەسەي كومپانيالارى قازاقستاندا جۇمىس ىستەپ جاتىر, دوللارلىق ەكۆيۆالەنتپەن ەسەپتەگەندە مول كولەمدەگى ينۆەستيتسيا جيناقتالدى. ءسىزدىڭ ءتول باستاماڭىز – ەۋرازيالىق ەكونوميكالىق وداق بەلسەنە دامىپ, ەكونوميكالارىمىزدىڭ ءتيىمدى دامۋىنا جاعداي تۋعىزۋدا. ءبىز كوپتەگەن سەرىكتەستەرىمىز ەاەو-مەن ءتۇرلى فورماتتا ىنتىماقتاسۋ نيەتىندە ەكەنىن كورىپ وتىرمىز», – دەدى رەسەي پرەزيدەنتى. ايدار ورىسباەۆ. دەرەك, سۋرەت: akorda.kz.