وسكەمەندە بەلگىلى حوككەيشىنىڭ ايەلى كىسى قولىنان قازا بولدى

وسكەمەن. 15 قازان. وسكەمەندە «تورپەدو» حوككەي كومانداسىنىڭ حوككەيشىسى ەۆگەني فادەەۆتىڭ 30 جاستاعى ايەلى ماريا ءوز پاتەرىندە كىسى قولىنان قازا بولدى. بۇل تۋرالى egemen.kz ءتىلشىسى حابارلادى. ازىرگە پوليتسيا قىزمەتكەرلەرى ورىن العان وقيعا تۋرالى تارقاتىپ ايتپاسا دا, ماريا فادەەۆا توناۋ ماقساتىندا ءولتىرىلۋى مۇمكىن دەگەن بولجامدار بار. مارقۇمنىڭ تۋىستارىنىڭ ءبىرى الەۋمەتتىك جەلىگە جاريالاعان جازباسىندا ونى ءوز پاتەرىندە تورۋىلداپ, بالالاردىڭ ۇيدە جوقتىعىن, جالعىز ەكەنىن بىلگەندىكتەن ولتىرگەنىن جانە ۇيدەگى بارلىق اقشا مەن كارتوچكالاردى الىپ كەتكەنىن مالىمدەگەن. قالالىق ينتەرنەت-فورۋمدارىنىڭ بىرىندە ايەلدى تۇنشىقتىرىپ ولتىرگەنى جايلى دا ءسوز بولىپ وتىر. «بۇل وقيعا بويىنشا قر قىلمىستىق كودەكسىنىڭ 1 ءبولىمىنىڭ 99 بابى بويىنشا قىلمىستىق ءىس قوزعالدى. اسا اۋىر قىلمىستى اشۋ شارالارى بويىنشا كەشەندى شارالار جۇرگىزىلۋدە», – دەدى وبلىستىق ىشكى ىستەر دەپارتامەنتى ءباسپاسوز قىزمەتىنىڭ باستىعى باقىتجان تورعاەۆ. ماريا فادەەۆا – قازاقستاندىق بەلگىلى حوككەي جاتتىقتىرۋشىسى ۆلاديمير بەلياەۆتىڭ قىزى. ول ءوزى دە سپورتپەن بەلسەندى تۇردە شۇعىلدانعان. كوركەم گيمناستيكادا ءبىرشاما تابىستارعا جەتكەن. س.امانجولوۆ اتىنداعى شقمۋ-دى ءبىتىرىپ, جاتتىقتىرۋشى بولىپ جۇمىس ىستەگەن. ماريانىڭ تۋعان اعاسى ماكسيم دە اكە جولىن جالعاپ, حوككەيشى بولدى. كۇيەۋى دە بەلگىلى حوككەيشىلەردىڭ ءبىرى. سوڭعى جىلدارى استانادا تۇردى. ەۆگەني فادەەۆ استانالىق «بارىس» كومانداسى ساپىندا وينادى. ماريا ەكى بالا تاربيەلەدى. ۇلكەن ۇلى جاقىندا عانا جەتى جاسقا تولدى. جارتى جىلداي ۋاقىت بۇرىن ەۆگەني فادەەۆ وتباسىمەن وسكەمەنگە قايتا ورالىپ, جەرگىلىكتى «تورپەدو» كومانداسىنىڭ كاپيتانى بولعان ەدى. تاياۋدا عانا كلۋبتىڭ ءباسپاسوز قىزمەتىنە بەرگەن سۇحباتىندا حوككەيشى ويىننان تىس ۋاقىتىنىڭ بارلىعىن وتباسىنا ارنايتىنىن ايتقان بولاتىن. دۋمان اناش. دەرەك: egemen.kz. سۋرەت: ۋk.kz.