پرەزيدەنتتىككە ۇمىتكەر تۇرعىن سىزدىقوۆ انا ءتىلىن جەتىك بىلەدى

استانا. 10 ناۋرىز. كوممۋنيستىك حالىق پارتياسى اتىنان كەزەكتەن تىس پرەزيدەنت سايلاۋىنا تۇسۋگە تىلەك بىلدىرگەن تۇرعىن سىزدىقوۆ مەملەكەتتىك ءتىلدى جەتىك بىلەتىنى بەلگىلى بولدى. بۇل تۋرالى «24kz» حابارلادى. لينگۆيستيكالىق كوميسسياعا قازاقستاننىڭ كوممۋنيستىك پارتياسى اتىنان كەلگەن كانديدات تۇرعىن سىزدىقوۆ ءداستۇرلى سىناقتىڭ ءۇش كەزەڭىنەن وتكەنىن ايتقان كوميسسيا توراعاسى م.جولداسبەكوۆ: «ءبىرىنشى سىناقتا «ءبىزدىڭ كۇشىمىز بىرلىكتە» دەگەن تاقىرىپتاعى جازباشا جۇمىس بولدى. تاقىرىپ اشىلعان. 6 قاتە جىبەرىپتى. ونىڭ ىشىندە 3-ەۋى ەملە, 2-ەۋى تىنىس بەلگىسى, 1-ەۋى ستيلدىك قاتە.  ايتايىن دەگەنىم, ل.قويشيەۆادان كەيىن ساۋاتتى, تاقىرىبى اشىلعان جۇمىس وسى سىزدىقوۆ مىرزانىڭ جۇمىسى بولدى», – دەدى. كوميسسيا توراعاسىنىڭ ايتۋىنشا, ەكىنشى كەزەڭدە كانديدات باۋىرجان مومىش ۇلىنىڭ پروزاسىنان ءۇش بەتتىك ءماتىن وقىعان. «جاقسى وقىدى. ءبىز وقىعان ءماتىندى ءتۇسىندى مە, تۇسىنبەدى مە دەگەن ويمەن  بارلىق كانديداتتارىمىزعا سۇراق قويىپ ءجۇرمىز. كوبى نە وقىعانىن بىلمەيتىن ەدى. ال ەندى سىزدىقوۆ مىرزا ءوز وقىعان ءماتىندى وتە ادەمى جاقسىلاپ ايتىپ بەردى», – دەدى ول. كانديدات ءۇشىنشى سىناقتا «استانا - تاۋەلسىزدىك تۇعىرى» تاقىرىبىندا 15 مينۋت ءسوز سويلەگەن. «ءساتتى تاقىرىپ كەلگەن سياقتى. جاقسى جاۋاپ بەردى. سونىمەن ءبىزدىڭ كوميسسيا مۇشەلەرى ريزا بولىپ وتىر. قورىتىندىمىز,  تۇرعىن ىسقاق ۇلى سىزدىقوۆ مەملەكەتتىك ءتىلدى ەركىن مەڭگەرگەن», – دەدى م.جولداسبەكوۆ. ۇمىتكەردىڭ ءومىربايانىنا توقتالا كەتسەك, تۇرعىن سىزدىقوۆ 1947 جىلى كوكشەتاۋ قالاسىندا تۋعان. جوعارى ءبىلىمدى. ماماندىعى – عالىم-اگرونوم. ايتا كەتەتىن جايت, تۇرعىن سىزدىقوۆ – پارتيا اتىنان ەمتيحان تاپسىرىپ وتىرعان العاشقى ۇمىتكەر. وسى كۇنگە دەيىن لينگۆيستيكا كوميسسياسى الدىنا تەك ءوزىن-ءوزى ۇسىنعان ازاماتتار كەلگەن بولاتىن. سونىمەن وسك بەرگەن سوڭعى مالىمەتتەر بويىنشا, ءوتىنىش بەرگەن 14 ۇمىتكەردىڭ ازىرگە تەك ەكەۋى عانا لينگۆيستيكالىق كوميسسيا ەمتيحانىنان ءوتتى. جولدىباي بازار. دەرەك, سۋرەت: «24kz».