قىزىلوردادا ۇلتتىق سپورت تۇرلەرىنەن رەسپۋبليكالىق فەستيۆال باستالدى

قىزىلوردا. 15 قازان. قىزىلوردا قالاسىندا قازاق حاندىعىنىڭ 550 جىلدىعىنا جانە قازاقستان حالقى اسسامبلەياسىنىڭ 20 جىلدىعىنا ارنالعان ۇلتتىق سپورت تۇرلەرىنەن قازاقستان رەسپۋبليكاسىنىڭ ءىV فەستيۆالى ءوتىپ جاتىر. 20 قازانعا دەيىن جالعاساتىن سايىسقا استانا, الماتى قالالارى مەن بارلىق وبلىستاردان 2000-عا جۋىق سپورتشى قاتىسۋدا. بۇل تۋرالى egemen.kz ءتىلشىسى حابارلادى. ءتورت جىلدا ءبىر ۇيىمداستىرىلاتىن فەستيۆال باعدارلاماسىندا بايگە, قازاق كۇرەسى, كوكپار, اۋدارىسپاق, تەڭگە ءىلۋ, قىز قۋ, توعىزقۇمالاق, اسىق اتۋ, قۇسبەگىلىك, جامبى اتۋ, جەكپە-جەك سەكىلدى سپورتتىڭ 13 تۇرىنەن جارىستار بولادى. بۇل تۋرالى بۇگىن «سىر مەديا» جشس جانىنداعى وبلىستىق كوممۋنيكاتسيا ورتالىعىندا وتكەن بريفينگ بارىسىندا وبلىستىق دەنە شىنىقتىرۋ جانە سپورت باسقارماسىنىڭ باسشىسى سادىق مۇستافاەۆ مالىمدەدى. سونداي-اق, جيىنعا ويىنداردىڭ باس تورەشىسىنىڭ ورىنباسارى سەيدوللا جەڭىس ۇلى, مادەنيەت جانە سپورت مينيسترلىگىنىڭ ۇلتتىق سپورت تۇرلەرى باسقارماسىنىڭ باسشىسى ماقسات قويشىباەۆ, ۇلتتىق سپورت تۇرلەرى قاۋىمداستىعىنىڭ اتقارۋشى ديرەكتورى ەرلەن وسپانوۆ قاتىستى. ەلىمىزدە ۇلتتىق سپورت تۇرلەرىن دامىتۋ, سالاۋاتتى ءومىر سالتىن قالىپتاستىرۋ, جاستاردى وتانسۇيگىشتىككە جانە حالىقتار اراسىندا دوستىق پەن تاتۋلىقتى نىعايتۋ, ەڭ باستىسى ۇلتتىق سپورت تۇرلەرىن دامىتۋداعى ەڭ مىقتى ءوڭىردى انىقتاۋ ماقساتىندا وتكىزىلىپ جاتقان فەستيۆالدىڭ رەسمي اشىلۋى 16 قازان كۇنى ساعات 17.00-دە ورتالىق ستاديوندا وتەدى. سپورتتىق شارالار عاني مۇراتباەۆ اتىنداعى ورتالىق ستاديوندا, «ەۋرازيا» سپورت كەشەنىندە, «مۇز ايدىنى» جانە «ءنۇرسات» تەننيس ورتالىعىندا وتەدى. ەرجان بايتىلەس. دەرەك, سۋرەت: egemen.kz.