قىزىلوردا وبلىسى بۋفەرلىك ايماقتان شىعادى

قىزىلوردا. 15 قازان. قىزىلوردا وبلىسى بۋفەرلىك ايماقتان شىعۋعا تولىق دايىن. وبلىس اكىمىنىڭ ورىنباسارى سەرىك قوجانيازوۆ جۋرناليستەرگە ارناپ وتكىزگەن ءباسپاسوز ءماسليحاتىندا وسىلاي مالىمدەدى. بۇل تۋرالى egemen.kz حابارلادى. رەسەي فەدەراتسياسى مەن قازاقستان رەسپۋبليكاسىنىڭ ۆەتەرينارلىق قىزمەتتەرىنىڭ 2011 جىلعى 11 ناۋرىزداعى شەشىمىنە سايكەس اۋسىل ىندەتىنە قولايسىز وزبەكستان, قىرعىزستان, قىتاي مەملەكەتتەرىنە كورشىلەس قازاقستاننىڭ 5 وبلىسى بۋفەرلىك ايماققا جاتقىزىلىپ, بۇل وبلىستاردان ەلىمىزدىڭ باسقا ايماقتارى مەن كەدەن وداعىنا مۇشە مەملەكەتتەرگە اۋسىلعا بەيىم اۋىل شارۋاشىلىعى جانۋارلارى مەن ولاردىڭ شيكى ەت ونىمدەرىن شىعارۋعا تىيىم سالىنعان بولاتىن. سودان بەرى وبلىس اۋماعىن بۋفەرلىك ايماقتان شىعارۋ ماقساتىندا بىرقاتار جۇمىستار اتقارىلدى. بيىلعى جىلدىڭ وزىندە اۋسىل ىندەتى بويىنشا بەكىتىلگەن جوسپارعا سايكەس, 480 باس مالدىڭ قان قۇرامىنا لابوروتوريالىق زەرتتەۋلەر جۇرگىزىلىپ, قۋانتارلىق ناتيجە كورسەتتى. سونداي-اق, قازان ايىنىڭ 8-11 ارالىعىندا حالىقارالىق ەپيزووتيالىق بيۋروسىنىڭ باس ديرەكتورى بەرنارد ۆالل استانا قالاسىنا ىسساپارمەن كەلىپ, پرەمەر-مينيستر كارىم ماسىموۆپەن جانە اۋىل شارۋاشىلىق ءمينيسترى اسىلجان مامىتبەكوۆپەن كەزدەسۋى بارىسىندا بۋفەرلىك ايماقتاعى 5 وبلىسقا ۆاكتسينا قولدانىلاتىن اۋسىلدان تازا ايماق ستاتۋسىن بەرۋ ماقساتىندا اتقارىلىپ جاتقان جۇمىستارعا توقتالعان بولاتىن. عىلىمي كەڭەستىڭ وڭ شەشىمى 2015 جىلعى 6 قاراشادا الماتى قالاسىندا وتەتىن ءىىى حالىقارالىق ۆەتەرينارلىق كونگرەسسىندە الىنادى دەپ كۇتىلۋدە. سودان كەيىن بارىپ 2016 جىلدىڭ مامىر ايىندا پاريج قالاسىندا وتەتىن حەب 84-اسسامبلەيا دەلەگاتتارىنىڭ قاراۋىنا ۇسىنىلماق. قىزىلوردا وبلىسىنىڭ ەتتى ەكسپورتتاۋعا الەۋەتى جەتكىلىكتى. بۇل باعىتتا جاسالىپ جاتقان جۇمىستار اۋقىمدى. ماسەلەن, قازىرگى تاڭدا وبلىستا 2 200 باستى بورداقىلاۋعا ارنالعان 18 الاڭ بار. سونداي-اق, سىرداريا اۋدانىندا 3 مىڭ باسقا جانە قازالى اۋدانىندا 500 باسقا ارنالعان مال بورداقىلاۋ الاڭى سالىنىپ جاتىر. كەلەر جىلى جالاعاش اۋدانىندا 3 مىڭ باسقا ارنالعان بورداقىلاۋ الاڭىنىڭ قۇرىلىسى باستالاتىن بولادى. ەرجان بايتىلەس. دەرەك: egemen.kz. سۋرەت: syrboyi.kz.