مەملەكەتتىك حاتشى بۇۇ دامۋ باعدارلاماسىنىڭ جەتەكشىسىمەن كەزدەستى

استانا. 21 مامىر. مەملەكەتتىك حاتشى گۇلشارا ابدىقالىقوۆا بۇۇ دامۋ باعدارلاماسىنىڭ جەتەكشىسى حەلەن كلاركپەن كەزدەستى. بۇل تۋرالى akorda.kz حابارلادى. كەزدەسۋ بارىسىندا ءوزارا ءتيىمدى ىنتىماقتاستىقتىڭ نەگىزگى باعىتتارى, سونداي-اق, ونى ەلىمىزدىڭ ورنىقتى الەۋمەتتىك-ەكونوميكالىق دامۋى جاعدايىندا كەڭەيتۋدىڭ كەلەشەگى تالقىلاندى. مەملەكەتتىك حاتشى قازاقستان مەن بۇۇ دامۋ باعدارلاماسى اراسىندا قالىپتاسقان ورنىقتى سەرىكتەستىك قارىم-قاتىناسقا توقتالىپ, كەدەيشىلىك پەن جۇمىسسىزدىقتى, انا مەن بالا ءولىمىن تومەندەتۋدى, تۇراقتى دامۋدى, قورشاعان ورتانى جاقسارتۋدى, ايۆ/جيتس جانە تۋبەركۋلەزدىڭ الدىن الۋدى, گەندەرلىك تەڭدىكتى, سىبايلاس جەمقورلىققا قارسى كۇرەستى قوسا قامتيتىن مەملەكەتتىك باسقارۋدىڭ تيىمدىلىگىن ارتتىرۋعا باعىتتالعان ماڭىزدى جوبالاردى ىسكە اسىرۋعا تەحنيكالىق جاردەم جاساعانى ءۇشىن ريزاشىلىعىن ءبىلدىردى. دامۋ باعدارلاماسىمەن ىنتىماقتاستىق قازاقستاننىڭ زاڭناماسى مەن ءىس تاجىريبەسىنە بۇۇ-نىڭ جوعارى ستاندارتتارىن جانە حالىقارالىق ۇزدىك تاجىريبەنى ويداعىداي ەنگىزۋ ىسىنە ءوز ۇلەسىن قوستى. گۇلشارا ابدىقالىقوۆا قازاقستان مەن بۇۇ دامۋ باعدارلاماسى اراسىنداعى 2016-2020 جىلدارعا ارنالعان سەرىكتەستىكتىڭ نەگىزدەمەلىك جاڭا باعدارلاماسى «قازاقستان-2050» ستراتەگياسى, «نۇرلى جول – بولاشاققا باستار جول» جاڭا ەكونوميكالىق ساياساتى جانە مەملەكەت باسشىسىنىڭ باستاماسى – 5 ينستيتۋتسيونالدىق رەفورمانىڭ ماقساتتارى مەن مىندەتتەرىنە قول جەتكىزۋگە مۇمكىندىك تۋعىزاتىنىنا سەنىم ءبىلدىردى. ءبىزدىڭ جەتىستىكتەرىمىز حالىقارالىق رەيتينگتەر ارقىلى دا ايقىن كورىنىس تاۋىپ وتىر. قازاقستان ءتىرى تۋعان ءار 1000 سابيگە قاتىستى العانداعى انا ءولىمى دەڭگەيىن 1999 جىلعى 55-تەن 2013 جىلعى 12,6-عا دەيىن 3 ەسە تومەندەتۋ ارقىلى مىڭجىلدىق دامۋدىڭ بەسىنشى ماقساتىنا (مدم) قول جەتكىزدى. بۇعان دەيىن كەدەيشىلىكتى ازايتۋ, باستاۋىش بىلىمگە قولجەتىمدىلىك جانە گەندەرلىك تەڭدىكتى قامتاماسىز ەتۋ جونىنەن مىڭجىلدىقتىڭ ءبىرىنشى, ەكىنشى جانە ءۇشىنشى دامۋ ماقساتتارىنا مەرزىمىنەن بۇرىن قول جەتكىزىلگەن بولاتىن. 2013 جىلعى مالىمەتتەر بويىنشا قازاقستان ۇلتتىق ءال-اۋقات دەڭگەيىنىڭ حالىقارالىق رەيتينگىندە 47-ورىن يەلەنىپ, تمد-نىڭ بارلىق ەلدەرىنەن وزىپ شىقتى. بىلىمگە تەڭ قولجەتىمدىلىك قامتاماسىز ەتىلدى. يۋنەسكو مالىمەتىنە سايكەس, ءبىلىمنىڭ دامۋ كورسەتكىشى بويىنشا قازاقستان الەمنىڭ 129 ەلى اراسىندا 4-ءشى ورىندى يەلەندى. كەزدەسۋ قورىتىندىسى بويىنشا تاراپتار جاڭا جوبالاردى ءتيىمدى ىسكە اسىرۋ ماقساتىندا بەلسەندى ىنتىماقتاستىقتى جالعاستىرۋدىڭ ماڭىزدىلىعىن نازارعا الدى. ەلامان قوڭىر. دەرەك, سۋرەت: akorda.kz.