استانا. 9 ناۋرىز. «روسبالت» مالىمدەگەندەي, بوريس نەمتسوۆتى ءولتىردى دەگەن ايىپ تاعىلىپ وتىرعان «سەۆەر» باتالونى پولكى كومانديرىنىڭ بۇرىنعى ورىنباسارى زاۋر داداەۆ «ساياساتكەردىڭ مۇسىلماندار مەن ولاردىڭ دىندەرى تۋرالى بىرنەشە رەت جاعىمسىز سوزدەر ايتۋى قىلمىستىڭ سەبەبى بولعانىن جەتكىزدى. بۇل تۋرالى «كوممەرسانت» حابارلادى.
نەمتسوۆتىڭ وسىنداي سوزدەر ايتىپ جۇرگەنىن داداەۆ 2015 جىلعى قاڭتاردا ەستىگەسىن, «قاتتى ءدىندار» ادام رەتىندە شىداماي كەتىپ, كەك قايتارعان. باسىلىمنىڭ قۇقىق قورعاۋ ورگاندارىنداعى مانبەسىنىڭ مالىمەتىنشە, «داداەۆ ءىس جۇزىندە ءوزىنىڭ وسى قىلمىستى ۇيىمداستىرۋشى ەكەنىن مويىنداپ تا قويعان».
قۇقىق قورعاۋ ورگاندارىندا مانبەنىڭ «روسبالتقا» حابارلاعانىنداي, «سەۆەر» باتالونى پولكى كومانديرىنىڭ بۇرىنعى ورىنباسارى زاۋر داداەۆ ءوزىنىڭ بوريس نەمتسوۆتى ءولتىرۋدى ۇيىمداستىرۋشى ەكەنىن ءىس جۇزىندە مويىنداپ قويعان. قىلمىستىڭ سەبەبى رەتىندە نەمتسوۆ مىرزانىڭ رەسەي تەرريتورياسىندا تۇراتىن مۇسىلماندار, مۇحاممەد پايعامبار, سونداي-اق يسلام ءدىنى تاراپىندا بىرنەشە رەت جاعىمسىز پىكىرلەر بىلدىرگەنى اتالدى. مۇنى 2015 جىلدىڭ قاڭتارىندا بىلگەن داداەۆ كەك قايتارۋعا بەكىنەدى.
باسىلىمنىڭ اقپارىنشا, وپپوزيتسيونەردى ولتىرۋگە قاتىستارى بار دەپ ايىپ تاعىلىپ وتىرعان قالعان تورتەۋدى داداەۆ ماسكەۋدىڭ ىرگەسىندە تۇراتىن بولعاندىقتارىنان قالانى جاقسى بىلەتىندىكتەرى ءۇشىن قىلمىستى ۇيىمداستىرۋعا تارتقان بولىپ شىقتى. «داداەۆ ءىس جۇزىندە بۇل قىلمىستى ۇيىمداستىرعانىن مويىندادى, - دەپ حابارلادى «روسبالت» مانبەسى. – سوندىقتان تەرگەۋ شەڭبەرىنەن الدەقانداي ءبىر جۇرتتى ءدۇر سىلكىندىرەتىن اشكەرەلەۋدى نەمەسە تاعى بىرەۋلەردى قاماۋعا الۋدى كۇتۋدىڭ قاجەتى جوق».
ەسكە سالا كەتەيىك, ماسكەۋدىڭ باسمان سوتى 8 ناۋرىز كۇنى زاۋر داداەۆتى 28 ساۋىرگە دەيىن قاماۋعا العان بولاتىن. سول كەزدە-اق ايىپتالۋشى داداەۆتىڭ قىلمىسقا قاتىسى بارىن مويىنداعانى بەلگىلى بولعان. ونىمەن بىرگە اعايىندى انزور جانە شاگيد گۋباشەۆتەر, تامەرلان ەسكەرحانوۆ جانە حامزات باحاەۆ قاماۋعا الىندى. ولار دا بوريس نەمتسوۆتى ءولتىرۋ جونىندەگى قىلمىستىڭ ءىستىڭ فيگۋرانتتارى بولىپ سانالدى. تاعى ءبىر كۇدىكتى – گروزنىي قالاسىنىڭ 30 جاسار تۇرعىنى بەسلان شاۆانوۆ مۇنىڭ الدىندا پوليتسەيلەرمەن اتىس كەزىندە ءوزى جارعان گراناتادان قازا تاپتى.
رەسەيدىڭ رپس-پارناس پارتياسىنىڭ تەڭ توراعاسى جانە ياروسلاۆل وبلىستىق دۋماسىنىڭ دەپاتۋتاتى بوريس نەمتسوۆ 28 اقپان كۇنى تۇندە ماسكەۋدىڭ ورتالىعىندا, ۇلكەن موسكۆورەتسك كوپىرى ۇستىندە ولتىرىلگەن ەدى. تەرگەۋ مەن بيلىك بەلگىلى ساياساتكەردىڭ ءولىمىن بىردەن تاپسىرىسپەن جاسالعان دەگەن قورىتىندىعا كەلگەن. سونىمەن بىرگە, تەرگەۋشىلەر قىلمىستى جاساۋشىلاردىڭ ءوز ءىسىنىڭ كاسىبيلەرى ەمەس ەكەنىن دە مالىمدەگەن. بۇعان قۇقىق قورعاۋشىلار دالەل رەتىندە كيللەرلەردىڭ بۇدان جيىرما جىل بۇرىنعى وقتى پايدالانۋلارى مەن بوريس نەمتسوۆتىڭ جانىنداعى باستى كۋاگەر - ۋكراين فوتومودەلى اننا دۋريتسكايانى ءتىرى قالدىرۋلارىن كەلتىرگەن ەدى.
مۇرات ايتقوجا.
دەرەك, سۋرەت: كوممەرسانت.
