پرەزيدەنتتىككە ۇمىتكەرلىككە 15 ادام تىلەك ءبىلدىردى

استانا. 9 ناۋرىز. بۇگىن ورتالىق سايلاۋ كوميسسياسىندا قازاقستان رەسپۋبليكاسى پرەزيدەنتى سايلاۋىنا ۇمىتكەرلەر ۇسىنۋدىڭ بارىسى جانە ورتالىق سايلاۋ كوميسسياسىنىڭ قازاقستان رەسپۋبليكاسى پرەزيدەنتى سايلاۋىن ۇيىمداستىرۋ جونىندەگى جۇمىستارى تۋرالى بريفينگى بولدى. بۇل تۋرالى ورتالىق سايلاۋ كوميسسياسىنىڭ ءباسپاسوز قىزمەتى حابارلادى. ورتالىق سايلاۋ كوميسسياسىنىڭ 26 اقپاندا بەكىتكەن كۇنتىزبەلىك جوسپارىنا سايكەس, 2015 جىلعى 26 ساۋىرگە بەلگىلەنگەن قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا ۇمىتكەرلەر ۇسىنۋ باستالدى. قازاقستان رەسپۋبليكاسى ورتالىق سايلاۋ كوميسسياسىنا 2-9 ناۋرىز ارالىعىندا ءوزىن ءوزى ۇسىنۋ جولىمەن 14 ءوتىنىش ءتۇستى. ءوزىن ءوزى ۇسىنۋ جولىمەن مىنا ازاماتتار ءوز كانديداتۋرالارىن ۇسىندى:

1. سىرعاباەۆ اسقار جوراباي ۇلى;
2. الداجانوۆ سافيوللا قالاباي ۇلى;
3. قويشيەۆا ليمانا;
4. ابدىكارىموۆ باقىت تولەگەن ۇلى;
5. مىرزاشوۆ سۋحراب امينجان ۇلى;
6. وكتەشباەۆ ەسەنبەك جاپار ۇلى;
7. جۇنىسبەكوۆ ياكوبجان;
8. جۇمان قايرات توقتار ۇلى;
9. سەرعازين ەرجان مەرەكەن ۇلى;
10. مايشەۆ قايرات الەمباي ۇلى;
11. قايساروۆ ءۋاليحان ءابىش ۇلى;
12. ەستەمەسوۆ باقتيار وكسىكباي ۇلى;
13. تۇراگەلديەۆ قانات سباش ۇلى.

سىزدىقوۆ تۇرعىن ىسقاق ۇلى «قازاقستان حالىقتىق كوممۋنيستىك پارتياسى» قوعامدىق بىرلەستىگى اتىنان ۇسىنىلدى. ورتالىق سايلاۋ كوميسسياسى قازاقستان رەسپۋبليكاسى پرەزيدەنتتىگىنە كانديداتتاردىڭ كونستيتۋتسيا مەن سايلاۋ تۋرالى زاڭناما تالاپتارىنا قانشالىقتى ساي كەلەتىندەرى تەكسەرۋ جونىندەگى قاجەتتى شارالاردى جۇرگىزەدى. باس پروكۋراتۋرا مەن ىشكى ىستەر مينيسترلىگىنە ءتيىستى سۇراۋلار جىبەرىلدى. قازاقستان رەسپۋبليكاسى پرەزيدەنتتىگىنە كانديداتتاردىڭ مەملەكەتتىك ءتىلدى قانشالىقتى دارەجەدە ەركىن مەڭگەرگەندەرى جونىندە لينگۆيستيكالىق كوميسسيا تەكسەرۋ جۇرگىزەدى. قازىرگى تاڭدا بىرقاتار ۇمىتكەرلەردى تەكسەرۋدىڭ قورىتىندىلارى بەلگىلى بولدى. ابدىكارىموۆ باقىت تولەگەن ۇلى, مىرزاشوۆ سۋحراب امينجان ۇلى ءالى قىرىققا تولماعان, وسىعان بايلانىستى 2015 جىلعى 6 ناۋرىزدا ورتالىق سايلاۋ كوميسسياسى ولاردى تىركەۋدەن باس تارتتى. بۇدان باسقا, ورتالىق سايلاۋ كوميسسياسى لينگۆيستيكالىق كوميسسيانىڭ قورىتىندىسىنا بايلانىستى تاعى ەكى ۇمىتكەردى – سىرعاباەۆ اسقار جوراباي ۇلى مەن الداجانوۆ سافيوللا قالاباي ۇلىن تىركەۋگە العان جوق. 6 ناۋرىز كۇنى قويشيەۆا ليماناعا قاتىستى كونستيتۋتسيا مەن سايلاۋ تۋرالى زاڭنىڭ تالاپتارىنا سايكەس ءتيىستى قاۋلى قابىلدادى. وعان ءوز كانديداتۋراسىن قولداۋشىلار قولدارىن جينايتىن پاراقشا تاپسىرىلدى. «ورتالىق سايلاۋ كوميسسياسى ءتىپتى ۇمىتكەرلەردىڭ ءوز قولدارىمەن جازعان مالىمەتتەرىنىڭ ءوزىن تەكسەرەدى. مىسالعا ءوزىن ءوزى ۇسىنعان ۋ.قايساروۆ پرەزيدەنتتىككە ۇمىتكەر بولىپ تۇسۋگە نيەتى بار ەكەنى تۋرالى وتىنىشىندە ءوز قولىمەن باسقا مەملەكەتتىڭ ازاماتى بولىپ تابىلاتىنىن جازىپتى. اتالمىش ماسەلە بويىنشا ءبىز ىشكى ىستەر مينيسترلىگىنە بۇل مالىمەتتى تەكسەرىپ بەرۋدى سۇراعان ءوتىنىش جولدادىق. سونداي-اق ۇمىتكەردىڭ مەملكەتتىك تىلدە جازعان ومىرباياندىق مالىمەتتەرىندە بىرنەشە قاتە بار», - دەدى بريفينگ بارىسىندا ورتالىق سايلاۋ كوميسسياسىنىڭ مۇشەسى ل.ج.سۇلەيمەن. مۇرات ايتقوجا. دەرەك: election.kz.