پرەزيدەنتتىككە تاعى ءبىر ۇمىتكەر سىناقتان وتە المادى

استانا. 9 ناۋرىز. بۇرناعى كۇنى ورتالىق سايلاۋ كوميسسياسىندا پرەزيدەنتتىككە ۇمىتكەر قانات توقتار ۇلى جۇماننىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ وتىرىسى بولدى. بۇل تۋرالى «قازاقپارات» حابارلادى. الىنعان ەمتيحان ناتيجەلەرى بويىنشا, لينگۆيستيكالىق كوميسسيا اشىق داۋىس بەرۋ ارقىلى كوپشىلىك داۋىسپەن پرەزيدەنتتىككە كانديدات قانات جۇماننىڭ مەملەكەتتىك ءتىلدى ەركىن مەڭگەرمەگەنى تۋرالى شەشىم قابىلدادى. كوميسسيا توراعاسى مىرزاتاي جولداسبەكوۆ ءبىرىنشى جازباشا تاپسىرمادا كانديدات ءوزى تاڭداعان «مەنىڭ ەلىم - مەنىڭ جەرىم» تاقىرىبىن اشا الماعانىن, ويىن ناقتى جانە جۇيەلى جەتكىزە بىلمەگەنىن ايتتى. «جالپى, كانديدات 31 ورفوگرافيالىق, ستيليستيكالىق جانە پۋنكتۋاتسيالىق قاتە جىبەردى. ەكىنشى تاپسىرما بويىنشا, اباي قۇنانباي ۇلىنىڭ ولەڭىن وقۋ كەزىندە بىرقاتار ورفوەپيالىق نورمانى بۇزعاندىقتان, وقىلعان ءۇزىندى ماعىناسىنىڭ قابىلدانۋىن قيىنداتتى جانە داۋىس ىرعاعىنا سالىپ, مانەرلەپ وقي المادى», - دەدى جولداسبەكوۆ. سونىمەن قاتار قانات جۇمان قازاق تىلىندە بىردە-ءبىر پوەزيالىق تۋىندىنى جاتقا ايتىپ بەرە الماعان. ءۇشىنشى تاپسىرما بويىنشا, كوميسسيا بەلگىلەگەن كوپشىلىكتىڭ الدىندا 15 مينۋت ورنىنا 5 مينۋت قانا سويلەگەن, وندا دا ءوز ويىن بايلانىستى, جۇيەلى جانە قيسىندى تۇردە ەركىن جەتكىزە الماعان. «ادەبي ءتىل نورمالارىنان جۇرداي جانە سوزدىك قورى از. ناتيجەسىندە لينگۆيستيكالىق كوميسسيا ۇمىتكەر مەملەكەتتىك ءتىلدى ەركىن مەڭگەرمەگەن دەپ ءبىراۋىزدان شەشىم قابىلدادى», - دەپ اتاپ ءوتتى كوميسسيا توراعاسى. مۇرات ايتقوجا. دەرەك, سۋرەت: «قازاقپارات».