پرەزيدەنتتىككە نيەت ءبىلدىرۋشى 4 ادام تىركەۋگە الىنبادى

استانا. 9 ناۋرىز. ورتالىق سايلاۋ كوميسسياسى پرەزيدەنتتىككە ۇمىتكەر بولۋعا نيەت بىلدىرگەن ءتورت ادامدى تىركەۋدەن باس تارتتى. بۇل تۋرالى Tengrinews.kz ءتىلشىسى حابارلادى. اگەنتتىكتىڭ حابارلاۋىنشا, ولاردىڭ ەكەۋى – «JH –قۇرىلىس» جشس قۇرىلىسشىسى باقىت ابدىكارىموۆ پەن جۇرگىزۋشى سۋحراب مىرزاشوۆتىڭ جاستارى ءالى 40-قا تولماعان ەكەن. بۇلاردىڭ ءبىرى - 37-دە بولسا, ەكىنشىسى - 30-دا عانا. سوندىقتان تىركەۋگە الىنبادى. كوميسسيا حاتشىسى باقىت مەلدەشوۆتىڭ ايتۋىنشا, بۇل ەكەۋىنە تالاپتارعا ساي كەلمەيتىندەرى بىردەن ەسكەرتىلگەن. «ولار كەلدى دە: «بۇل - ءبىزدىڭ كونستيتۋتسيالىق قۇقىمىز» دەدى. ءبىز سوسىن جانجالعا بارماي, وتىنىشتەرىن قابىلدادىق تا, كەيىن قايتارىپ بەردىك», - ول. «ءبىز بۇلاردىڭ ءبىز ءۇشىن تۇسىنىكسىز ادامدار بولعانىن ناقتىلاپ ايتقانبىز», - دەدى ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ. كوميسسيا الدىمەن اسقار سىرعاباەۆتى تىركەۋدەن باس تارتقان. سەبەبى, ول مەملەكەتتىك ءتىلدى ەركىن مەڭگەرۋى تەكسەرىلگەن ەمتيحاننان وتە المادى. سونداي-اق قازاق ءتىلىن جەتىك بىلمەيتىنى ءۇشىن سافيوللا الداجانوۆ تا تىركەۋگە الىنعان جوق. ورتالىق سايلاۋ كوميسسياسى ۇمىتكەرلىككە نيەت ءبىلدىرۋشى ليمانا قويشيەۆانىڭ ۇسىنىلعان تالاپتارعا ساي كەلەتىنى تۋرالى قاۋلى قابىلدادى. وعان قول جيناۋ قاعازدارىن بەرۋ تۋرالى شەشىم قابىلداندى. قويشيەۆا مەملەكەتتىك ءتىلدى جاقسى بىلەدى ەكەن. «بۇل كانديداتۋرا كونستيتۋتسيا تالاپتارىنا تولىق سايكەس كەلەدى», - دەدى كوميسسيا وكىلدەرى وتىرىس بارىسىندا. بىراق ليمانا قويشيەۆا وتىرىسقا ۋاقىتىندا كەلە الماي قالدى. «ول كولىك كەپتەلىسىندە تۇر», - دەدى مەلدەشوۆ. تۇرعانقۇلوۆ ۇمىتكەردىڭ قاتىسۋى مىندەتتى ەمەس ەكەنىن اتاپ ءوتتى. بۇعان دەيىن ورتالىق سايلاۋ كوميسسياسى پرەزيدەنت سايلاۋىندا داۋىسقا تۇسۋگە نيەت بىلدىرگەن 10 ادامنىڭ ءتىزىمىن جاريا ەتكەن ەدى. مۇرات ايتقوجا. دەرەك, سۋرەت: Tengrinews.kz.