«ارلاندار» قاتارىنان سەگىزىنشى رەت جەڭىسكە جەتتى

استانا. 8 ناۋرىز. بۇكىلالەمدىك بوكس سەرياسىندا (WSB) ەل نامىسىن قورعايتىن «استانا ارلاندارى» ۆەنەسۋەلادا جەرگىلىكتى «Caciques Venezuela» كومانداسىن 3:2 ەسەبىمەن جەڭدى. بۇل تۋرالى egemen.kz حابارلادى. جاسىراتىنى جوق, وتاندىق جانكۇيەرلەر بۇل جەكپە-جەكتە «ارلانداردىڭ» وڭاي جەڭىسكە جەتەتىنىنە سەنىمدى بولعان. وعان باستى سەبەپ, استانالىقتاردىڭ بيىلعى ماۋسىمداعى قارقىنى. وسىعان دەيىن 7 جەكپە-جەك وتكىزىپ, بارلىعىندا جەڭىسكە جەتكەن ءبىزدىڭ كوماندا ۆەنەسۋەلاعا فاۆوريت رەتىندە اتتاندى. تەك بۇل ايقاستا ەمەس, جالپى بيىلعى ماۋسىمداعى چەمپيوندىقتان باستى ۇمىتكەر «ارلاندارعا» ءدال ۆەنەسۋەلالىقتار لايىقتى قارسىلىق كورسەتەدى دەپ ەشكىم ويلاماعانى انىق. ونىڭ ۇستىنە, لاتىنامەريكالىق بوكسشىلار بۇگىندە «ۆ» توبىنداعى 7 كوماندانىڭ اراسىندا 5-ورىندا كەلەدى. قوس كوماندانىڭ العاشقى اينالىمداعى كەزدەسۋىندە «ارلانداردىڭ» 5:0 ەسەبىمەن «تالاپ» تاستاعانى تاعى بار. سوندىقتان بۇل تارتىستا قازاقستاندىق كوماندانىڭ جەڭىسىنە ەشكىم كۇمان كەلتىرمەدى. الايدا, ۆەنەسۋەلا استاناسى كاراكاستاعى ايقاس ءبىز ويلاعانداي وڭاي بولمادى. ءتىپتى جەكپە-جەك بارىسىندا جالپىەسەپتە شارشى الاڭ قوجايىندارىنىڭ العا شىققان كەزى دە تىركەلدى. دەسە دە, تاجىريبە مەن شەبەرلىكتىڭ سەپتىگىمەن مارات جاكيەۆتەن ءتالىم الاتىن بوكسشىلارىمىز ماۋسىمداعى سەگىزىنشى جەڭىستەرىنە قول جەتكىزدى. ۆەنەسۋەلاداعى ايقاستىڭ ناتيجەسى مىناداي: 52 كەلى, كارلوس وسكانيو پەرەس – ولجاس ساتتىباەۆ – 0:3 (46:49, 45:50, 46:49). 60 كەلى, ماكايو لەيۆا – زاكىر سافيۋللين – 2:1. 69 كەلى, ماەسترە پەرەس گابريەل – اسلانبەك شىمبەرگەنوۆ – 3:0 (50:44, 50:44, 50:45). 81 كەلى, راميرەس ديۋران البەرت رامون – حرۆوە سەپ – 1:2 (47:48, 47:48, 48:47). +91 كەلى, ەدگار مۋنوس – فيليپپ حرگوۆيچ – تەحنيكالىق نوكاۋت (تكو, R2). وسى جەڭىسىنەن كەيىن «استانا ارلاندارى» قورجىنداعى ۇپاي سانىن 24-كە جەتكىزدى. بۇل كورسەتكىشپەن ءبىزدىڭ بوكسشىلار WSB جوباسىنىڭ «ۆ» توبىندا جەكە دارا كوش باستاپ كەلەدى. ال «ا» توبىندا ءدال سونداي ۇپايعا يە كۋبانىڭ «Cuba Domadores» كومانداسى توپ باستاپ تۇر. «ارلاندار» كەلەسى جەكپە-جەكتەرىن 13 ناۋرىزدا پولشانىڭ «Rafako Hussars Poland» كومانداسىنا قارسى وتكىزەدى. بۇل تارتىستىڭ شىمكەنتتە وتەتىنىن ايتا كەتەيىك. ەلامان قوڭىر. دەرەك: egemen.kz. سۋرەت: astanaarlans.kz.